മുണ്ടക്കൈ-ചൂരൽമല പുനരധിവാസം വേഗത്തിലാക്കും; പദ്ധതികൾ സമയബന്ധിതമായി പൂർത്തിയാക്കുമെന്ന് മന്ത്രി ടി. സിദ്ദീഖ് | Mundakkai Chooralmala Rehabilitation

കൽപ്പറ്റ: മുണ്ടക്കൈ-ചൂരൽമല ഉരുൾപൊട്ടൽ ദുരന്തബാധിതർക്കായുള്ള പുനരധിവാസ പദ്ധതികൾ വേഗത്തിൽ പൂർത്തിയാക്കുമെന്ന് കൃഷിവകുപ്പ് മന്ത്രി അഡ്വ. ടി. സിദ്ദീഖ്. ദുരന്തബാധിതരുടെ ഉപജീവന ആവശ്യങ്ങൾക്കായി കുടുംബശ്രീ മിഷൻ മുഖേന നടപ്പാക്കുന്ന മൈക്രോ പ്ലാൻ പദ്ധതിയിലേക്ക് മുഖ്യമന്ത്രിയുടെ ദുരിതാശ്വാസ നിധിയിൽനിന്ന് അനുവദിച്ച അധിക ധനസഹായത്തിന്റെ വിതരണോദ്ഘാടനം കൽപ്പറ്റയിൽ നിർവഹിച്ചാണ് മന്ത്രി ഇക്കാര്യം അറിയിച്ചത്. (Mundakkai Chooralmala Rehabilitation)

പുനരധിവാസ ഗുണഭോക്തൃ പട്ടിക സമയബന്ധിതമായി പൂർത്തിയാക്കുമെന്നും ഉരുൾപൊട്ടലിൽ നാശനഷ്ടം സംഭവിച്ച വ്യാപാരികൾക്കും കെട്ടിട ഉടമകൾക്കുമുള്ള നഷ്ടപരിഹാരം നൽകുന്ന നടപടികൾ വേഗത്തിലാക്കുമെന്നും മന്ത്രി പറഞ്ഞു. വായ്പ ഏറ്റെടുക്കൽ, നാശനഷ്ടം സംഭവിച്ച ഭൂമി കൃഷിയോഗ്യമാക്കൽ തുടങ്ങിയ പദ്ധതികളും സമയബന്ധിതമായി പൂർത്തിയാക്കുമെന്ന് അദ്ദേഹം വ്യക്തമാക്കി. ദുരന്തബാധിതരുടെ ഉപജീവന പദ്ധതികൾക്കായി ആദ്യഘട്ടത്തിൽ 1.98 കോടി രൂപയും രണ്ടാംഘട്ടത്തിൽ 2.31 കോടി രൂപയുടെ പദ്ധതികളും അനുവദിച്ചിരുന്നു. തുടർന്ന് മന്ത്രിസഭാ ഉപസമിതിയുടെ നേതൃത്വത്തിൽ നടത്തിയ ചർച്ചകളുടെ അടിസ്ഥാനത്തിൽ ഉപജീവനത്തിനായി ഓരോ കുടുംബത്തിനും രണ്ട് ലക്ഷം രൂപ വീതം അനുവദിച്ചു. ഇതിനായി മുഖ്യമന്ത്രിയുടെ ദുരിതാശ്വാസ നിധിയിൽനിന്ന് 5.11 കോടി രൂപയാണ് അനുവദിച്ചത്.
വയനാട്ടിലെ കാലാവസ്ഥാ വ്യതിയാനങ്ങളും ദുരന്തസാധ്യതകളും നിരീക്ഷിക്കുന്നതിനായി ഡോപ്ലർ റഡാർ ഡിസംബറോടെ പ്രവർത്തനസജ്ജമാകുമെന്നും മന്ത്രി അറിയിച്ചു. കാലാവസ്ഥാ മുന്നറിയിപ്പുകൾ കൂടുതൽ ഫലപ്രദമായി ലഭ്യമാക്കുന്നതിനൊപ്പം ദുരന്തനിവാരണത്തിൽ അവബോധമുള്ള സമൂഹത്തെ വളർത്തിയെടുക്കുകയാണ് സർക്കാരിന്റെ ലക്ഷ്യമെന്നും അദ്ദേഹം പറഞ്ഞു.

അതേസമയം, കാലാവസ്ഥാ വ്യതിയാനത്തെ തുടർന്നുണ്ടാകുന്ന ദുരന്തങ്ങൾ ഫലപ്രദമായി നേരിടുന്നതിനായി ജില്ലാ ഭരണകൂടം മാസ്റ്റർ പ്ലാനുമായി മുന്നോട്ടുപോകുകയാണെന്ന് പരിപാടിയിൽ അധ്യക്ഷനായ എം.എൽ.എ ഐ.സി. ബാലകൃഷ്ണൻ പറഞ്ഞു. സർക്കാർ, ജില്ലാ ഭരണകൂടം, തദ്ദേശ സ്ഥാപനങ്ങൾ എന്നിവയുടെ നേതൃത്വത്തിൽ ദുരന്തബാധിതർക്ക് ആത്മവിശ്വാസത്തോടെ ജീവിതം പുനഃസ്ഥാപിക്കാൻ ആവശ്യമായ പിന്തുണ തുടരുമെന്നും അധികൃതർ അറിയിച്ചു.

Summary: Kerala Minister T. Siddique said rehabilitation projects for the Mundakkai-Chooralmala landslide survivors will be completed on a time-bound basis. The government has also allocated additional financial assistance for livelihood initiatives, while a Doppler radar is expected to become operational in Wayanad by December.