ഗവർണറുടെ നടപടികളിൽ സർക്കാർ മൗനം; ‘ഇവിടെ ഒരു സർക്കാരുണ്ടോ?’ പിണറായിയുടെ ചോദ്യം, യുവജനത ഒന്നിക്കണമെന്ന് ആഹ്വാനം | Pinarayi Vijayan on Vande Mataram controversy

തൃശൂർ: ഗവർണറുടെ നടപടികളിലും വന്ദേമാതരം വിവാദത്തിലും സംസ്ഥാന സർക്കാരിനും കോൺഗ്രസിനുമെതിരെ രൂക്ഷ വിമർശനവുമായി പ്രതിപക്ഷ നേതാവ് പിണറായി വിജയൻ. ഗവർണർ ഭരണഘടനാപരമായ പരിധികൾ ലംഘിക്കുന്നുവെന്ന് ആരോപിച്ച പിണറായി, അദ്ദേഹത്തിന്റെ നടപടികളെ സർക്കാർ ചോദ്യം ചെയ്യാത്തത് ചൂണ്ടിക്കാട്ടി ‘ഇവിടെ ഒരു സർക്കാരുണ്ടോ?’ എന്ന് ചോദിച്ചു (Pinarayi Vijayan on Vande Mataram controversy). ഡിവൈഎഫ്ഐ സംസ്ഥാന സമ്മേളനത്തിന്റെ പൊതുസമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

വന്ദേമാതരം വിഷയത്തിൽ കോൺഗ്രസിന്റെ നിലപാടിനെയും പിണറായി വിമർശിച്ചു. എഐസിസി ആസ്ഥാനത്തും കോൺഗ്രസ് ഭരിക്കുന്ന സംസ്ഥാനങ്ങളിലും വന്ദേമാതരം പൂർണമായി ആലപിച്ചതായി ചൂണ്ടിക്കാട്ടിയ അദ്ദേഹം, കോൺഗ്രസ് ആർഎസ്എസ് അജണ്ടയ്ക്കൊപ്പമാണെന്നതിന് ഇത് തെളിവാണെന്ന് ആരോപിച്ചു. ദേശീയഗീതവുമായി ബന്ധപ്പെട്ട നിലപാടുകൾ കോൺഗ്രസിന്റെ പ്രീണന രാഷ്ട്രീയമാണ് വ്യക്തമാക്കുന്നതെന്നും അദ്ദേഹം പറഞ്ഞു.

വിദ്യാഭ്യാസ രംഗത്തെ കാവിവൽക്കരണത്തിന് സംസ്ഥാനത്ത് മുഖ്യമന്ത്രി വി.ഡി. സതീശൻ നേതൃത്വം നൽകുകയാണെന്നും പിണറായി ആരോപിച്ചു. പിഎം ശ്രീ പദ്ധതിക്കെതിരെ നേരത്തെ നിലപാട് സ്വീകരിച്ചവർ ഉന്നത വിദ്യാഭ്യാസ മേഖലയിലെ കാവിവൽക്കരണത്തിന് ഇപ്പോൾ ഒത്താശ ചെയ്യുകയാണെന്നും അദ്ദേഹം വിമർശിച്ചു. കാലടി സർവകലാശാലയിലെ പ്രതിഷേധത്തിന്റെ പേരിൽ ഗവർണർ ഡിജിപിയെയും പിന്നീട് പിഎസ്‌സി സെക്രട്ടറിയെയും വിളിച്ചുവരുത്തിയ സംഭവവും പിണറായി പരാമർശിച്ചു. ഭരണഘടനാപരമായ പരിധികൾ മറികടന്ന് ഗവർണറെ ഉപയോഗിച്ച് കേരളത്തിൽ ആർഎസ്എസ് ഭരണം നടത്താനുള്ള നീക്കങ്ങൾക്കെതിരെ യുവജനത ഒന്നിക്കണമെന്നും അദ്ദേഹം ആഹ്വാനം ചെയ്തു.

വഖഫ് നിയമവുമായി ബന്ധപ്പെട്ട വിഷയത്തിലും സർക്കാരിന്റെ നിലപാടിനെ പിണറായി വിമർശിച്ചു. അമുസ്ലിങ്ങളെ ഉൾപ്പെടുത്തി വഖഫ് ബോർഡ് പുനഃസംഘടിപ്പിക്കണമെന്ന നിലപാട് കോടതിയിൽ സ്വീകരിച്ചിരുന്ന സർക്കാർ പിന്നീട് നിലപാട് മാറ്റിയെന്നും അദ്ദേഹം ആരോപിച്ചു. വിഷയത്തിൽ ശക്തമായ എതിർപ്പ് കോടതിയിൽ അറിയിക്കുകയാണ് വേണ്ടതെന്നും പിണറായി ആവശ്യപ്പെട്ടു.

Summary: Opposition leader Pinarayi Vijayan criticized the Kerala government over the Governor’s actions and the Congress stand on the Vande Mataram issue. He questioned whether there was a functioning government in Kerala and called upon the youth to unite against what he described as attempts to advance an RSS agenda.