പരിക്ക് മറന്ന് തിരിച്ചുവരവ്..! യമഗുച്ചിയെ തകർത്ത് രണ്ടാം ലോക കിരീടവുമായി ‘ബാഡ്മിന്റൺ ചക്രവർത്തിനി’

പരിക്ക് കാരണം ഒരു മാസത്തോളം കോർട്ടിൽനിന്ന് വിട്ടുനിന്നെങ്കിലും തിരിച്ചെത്തിയത് ലോക ചാമ്പ്യന്റെ അതേ മികവിൽ. ലോക ഒന്നാം നമ്പർ താരം ആൻ സെ യങ് 2026 ബി‌ഡബ്ല്യുഎഫ് ലോക ചാമ്പ്യൻഷിപ്പിൽ വനിതാ സിംഗിൾസ് കിരീടം സ്വന്തമാക്കി. ന്യൂഡൽഹിയിലെ ഇന്ദിരാഗാന്ധി ഇൻഡോർ സ്റ്റേഡിയത്തിൽ നടന്ന ഫൈനലിൽ ലോക രണ്ടാം നമ്പർ താരവും നിലവിലെ ചാമ്പ്യനുമായ ജപ്പാന്റെ യമഗുച്ചി അകാനെയെ 21-17, 21-14ന് നേരിട്ടുള്ള ഗെയിമുകൾക്കാണ് ആൻ സെ യങ് തോൽപ്പിച്ചത്. 49 മിനിറ്റിൽ മത്സരം പൂർത്തിയാക്കിയ താരം ഒരു ഗെയിം പോലും നഷ്ടപ്പെടുത്താതെയാണ് കിരീടത്തിലെത്തിയത്.

2023ൽ കോപ്പൻഹേഗനിൽ വനിതാ സിംഗിൾസ് ലോക കിരീടം നേടുന്ന ആദ്യ കൊറിയൻ താരമായ ആൻ സെ യങ് മൂന്ന് വർഷത്തിന് ശേഷമാണ് വീണ്ടും ലോക ചാമ്പ്യൻഷിപ്പ് സ്വർണം നേടുന്നത്. റൗണ്ട് ഓഫ് 64 മുതൽ ഫൈനൽ വരെ ഒരു ഗെയിം പോലും വിട്ടുകൊടുക്കാതെയായിരുന്നു കുതിപ്പ്. 2026ൽ മലേഷ്യ ഓപ്പൺ, ഇന്തോനേഷ്യ ഓപ്പൺ എന്നീ സൂപ്പർ 1000 കിരീടങ്ങൾക്കൊപ്പം ഇന്ത്യ ഓപ്പൺ, സിംഗപ്പൂർ ഓപ്പൺ സൂപ്പർ 750 കിരീടങ്ങളും താരം നേടിയിരുന്നു. ഏപ്രിലിൽ ഏഷ്യൻ ചാമ്പ്യൻഷിപ്പും സ്വന്തമാക്കിയതോടെ ഏഷ്യൻ ഗെയിംസ്, ലോക ചാമ്പ്യൻഷിപ്പ്, ഒളിമ്പിക്സ്, ഏഷ്യൻ ചാമ്പ്യൻഷിപ്പ് എന്നിവ ഉൾപ്പെടുന്ന കരിയർ ഗ്രാൻഡ് സ്ലാമും പൂർത്തിയാക്കി.

ALSO READ;‘നിരവധി പ്രശ്നങ്ങൾ, ഇറാൻ കടുത്ത പ്രതിസന്ധിയിൽ..! സംഘർഷങ്ങൾ രൂക്ഷമാകുമ്പോൾ ആഭ്യന്തര വെല്ലുവിളികൾ വർദ്ധിക്കുന്നതായി ഇറാൻ പ്രസിഡന്റ് 

ഇടത് കാലിനേറ്റ പരിക്കിനെ തുടർന്ന് ജപ്പാൻ ഓപ്പണിൽനിന്ന് പിന്മാറിയ ആൻ സെ യങ് ചൈന ഓപ്പണിലും കളിച്ചിരുന്നില്ല. ഏകദേശം ഒരു മാസത്തെ ഇടവേളയ്ക്ക് ശേഷമുള്ള തിരിച്ചുവരവായിരുന്നു ലോക ചാമ്പ്യൻഷിപ്പിലേത്. ചൈനയുടെ ഹാൻ യുവെയും വാങ് സി യിയെയും തുടർച്ചയായ റൗണ്ടുകളിൽ തോൽപ്പിച്ചാണ് യമഗുച്ചിക്കെതിരെ ഫൈനലിലെത്തിയത്. ആദ്യ ഗെയിമിൽ 11-8ന് മുന്നിലായിരുന്ന ആൻ സെ യങിനെ യമഗുച്ചി ശക്തമായി നേരിട്ടു. പിന്നീട് 16-15ന് യമഗുച്ചി മുന്നിലെത്തിയെങ്കിലും 16-17ന് പിന്നിലായിരുന്ന ആൻ സെ യങ് തുടർച്ചയായി അഞ്ച് പോയിന്റുകൾ നേടി 21-17ന് ഗെയിം സ്വന്തമാക്കി. രണ്ടാം ഗെയിമിൽ യമഗുച്ചി ആദ്യ മൂന്ന് പോയിന്റും നേടിയെങ്കിലും കൃത്യമായ നെറ്റ് പ്ലേയിലൂടെയും മികച്ച പ്രതിരോധത്തിലൂടെയും ആൻ സെ യങ് തിരിച്ചെത്തി. 11-7ന് ഇടവേളയിൽ മുന്നിലെത്തിയ താരം പിന്നീട് 18-13 വരെ ലീഡ് ഉയർത്തി. യമഗുച്ചിയുടെ തിരിച്ചുവരവ് ശ്രമങ്ങൾ ചെറുത്ത് 21-14ന് രണ്ടാം ഗെയിമും സ്വന്തമാക്കി കിരീടം ഉറപ്പിച്ചു. വിജയത്തിന് പിന്നാലെ റാക്കറ്റ് ഉയർത്തിയെറിഞ്ഞായിരുന്നു താരത്തിന്റെ ആഘോഷം.

ഈ ജയത്തോടെ യമഗുച്ചിക്കെതിരായ ആൻ സെ യങിന്റെ നേർക്കുനേർ റെക്കോർഡ് 20 വിജയവും 15 തോൽവിയുമായി. ഇരുവരും തമ്മിലുള്ള അവസാന ആറ് മത്സരങ്ങളിലും ജയം ആൻ സെ യങിനൊപ്പമാണ്. സെപ്റ്റംബറിൽ നടക്കുന്ന സൂപ്പർ 750 ചൈന മാസ്റ്റേഴ്സിന് ശേഷം സെപ്റ്റംബർ 19ന് ആരംഭിക്കുന്ന 2026 ഐച്ചി-നഗോയ ഏഷ്യൻ ഗെയിംസിലേക്കാണ് താരത്തിന്റെ ശ്രദ്ധ. വനിതാ സിംഗിൾസ്, ടീം കിരീടങ്ങൾ നിലനിർത്തുകയെന്ന ലക്ഷ്യത്തോടെയാണ് ആൻ സെ യങ് ഇനി ഇറങ്ങുക. പരിക്കിനെ മറികടന്ന തിരിച്ചുവരവിന് പിന്നാലെ ലോക കിരീടം കൂടി സ്വന്തമാക്കിയതോടെ വനിതാ ബാഡ്മിന്റണിലെ ഏറ്റവും ആധിപത്യമുള്ള സീസണുകളിലൊന്നായി 2026 മാറുകയാണ്.

The post പരിക്ക് മറന്ന് തിരിച്ചുവരവ്..! യമഗുച്ചിയെ തകർത്ത് രണ്ടാം ലോക കിരീടവുമായി ‘ബാഡ്മിന്റൺ ചക്രവർത്തിനി’ appeared first on Express Kerala.