4 വർഷ ബിരുദക്കാർക്ക് നേരിട്ട് പിഎച്ച്.ഡി! പ്രവേശനപ്പരീക്ഷ നടത്താൻ ഡൽഹി സർവകലാശാല; അപേക്ഷാ പോർട്ടൽ ഉടൻ

ദേശീയ വിദ്യാഭ്യാസ നയത്തിന്റെ (എൻ.ഇ.പി.) ഭാഗമായി നാല് വർഷ ബിരുദം പൂർത്തിയാക്കുന്ന വിദ്യാർഥികൾക്ക് നേരിട്ട് പിഎച്ച്.ഡി. പ്രവേശനം നൽകുന്നതിനായി സ്വന്തമായി പ്രവേശനപ്പരീക്ഷ നടത്താൻ ഡൽഹി സർവകലാശാല തീരുമാനിച്ചു. ബിരുദാനന്തര ബിരുദം ഇല്ലാതെ തന്നെ ഗവേഷണത്തിലേക്ക് കടക്കാൻ വിദ്യാർഥികൾക്ക് അവസരമൊരുക്കുന്നതിനാണ് ഈ നീക്കം.

സർവകലാശാലയിൽ നിന്ന് പഠിച്ചിറങ്ങുന്ന വിദ്യാർഥികൾക്കായി ‘ഇൻ-ഹൗസ്’ രീതിയിലാകും പ്രവേശനപ്പരീക്ഷ സംഘടിപ്പിക്കുകയെന്ന് ഡൽഹി സർവകലാശാല രജിസ്ട്രാർ വികാസ് ഗുപ്ത വ്യക്തമാക്കി. യു.ജി.സി. ചട്ടങ്ങൾ പൂർണ്ണമായും പാലിച്ചാണ് പരീക്ഷ നടത്തുന്നത്. പ്രവേശനത്തിനായി അപേക്ഷിക്കാനുള്ള പ്രത്യേക പോർട്ടൽ ഈ മാസം തന്നെ തുറക്കുമെന്നും അദ്ദേഹം അറിയിച്ചു.

Also Read: കോടതി വിധി; ഹിജാബ് ഇസ്ലാമിലെ അനിവാര്യ ആചാരമല്ലെന്ന് അലഹബാദ് ഹൈക്കോടതി

പ്രവേശനത്തിന് കൃത്യമായ അക്കാദമിക് മാനദണ്ഡങ്ങളും സർവകലാശാല നിശ്ചയിച്ചിട്ടുണ്ട്. നാലാം വർഷത്തിൽ കുറഞ്ഞത് 7.5 സി.ജി.പി.എ. നേടുന്ന ജനറൽ വിഭാഗത്തിൽപ്പെട്ട വിദ്യാർഥികൾക്ക് അപേക്ഷിക്കാം. പട്ടികജാതി, പട്ടികവർഗ വിഭാഗങ്ങളിൽപ്പെട്ട വിദ്യാർഥികൾക്ക് 7.0 സി.ജി.പി.എ. മതിയാകും. നിശ്ചിത സി.ജി.പി.എ. ഉള്ളവർ സർവകലാശാല നടത്തുന്ന പ്രവേശനപ്പരീക്ഷ കൂടി പാസാകുന്നതോടെ നേരിട്ട് പിഎച്ച്.ഡി. പ്രവേശനം നേടാൻ യോഗ്യരാകും.

2026-’27 അക്കാദമിക് വർഷത്തിൽ പഠിച്ചിറങ്ങുന്ന പ്രഥമ നാലുവർഷ ബിരുദ കോഴ്‌സിലെ വിദ്യാർഥികൾക്കാണ് ഈ അവസരം ലഭിക്കുന്നത്. പി.ജി. പഠനത്തിനായി ചെലവഴിക്കുന്ന സമയം ലാഭിച്ച് മിടുക്കരായ വിദ്യാർഥികൾക്ക് നേരെ ഗവേഷണ രംഗത്തേക്ക് കടന്നുവരാൻ ഇതിലൂടെ സാധിക്കും.

The post 4 വർഷ ബിരുദക്കാർക്ക് നേരിട്ട് പിഎച്ച്.ഡി! പ്രവേശനപ്പരീക്ഷ നടത്താൻ ഡൽഹി സർവകലാശാല; അപേക്ഷാ പോർട്ടൽ ഉടൻ appeared first on Express Kerala.