42 വർഷമായി ഒളിവിൽ; സുകുമാരക്കുറുപ്പ് ജീവനോടെയുണ്ടോ? ബ്രൂണെയിൽ മുഖസാമ്യമുള്ള വയോധികനെ കണ്ടെത്തിയതായി റിപ്പോർട്ട്, അന്വേഷണം വീണ്ടും സജീവം

ന്യൂഡൽഹി: കേരള പോലീസിന്റെ ഏറ്റവും ദുരൂഹമായ കേസുകളിലൊന്നായ സുകുമാരക്കുറുപ്പ് കേസിൽ പുതിയ വഴിത്തിരിവ്. സുകുമാരക്കുറുപ്പ് ജീവനോടെയുണ്ടാകാമെന്ന സംശയത്തിന് ബലം നൽകുന്ന ചില വിവരങ്ങൾ പുറത്തുവന്നതായാണ് റിപ്പോർട്ട് (Sukumara Kurup alive). ബ്രൂണെയിൽ സുകുമാരക്കുറുപ്പുമായി മുഖസാമ്യമുള്ള മലയാളിയായ വയോധികനെ കണ്ടെത്തിയതായും ഇയാൾ വ്യാജപേരിൽ അവിടെ കഴിയുന്നതായും റിപ്പോർട്ടുകളിൽ പറയുന്നു. എന്നാൽ ബ്രൂണെയിലുള്ള വ്യക്തി സുകുമാരക്കുറുപ്പ് തന്നെയാണെന്ന് ഇതുവരെ ഔദ്യോഗികമായി സ്ഥിരീകരിച്ചിട്ടില്ല.

ഒരു സൈബർ വിദഗ്ധൻ നടത്തിയ അന്വേഷണത്തിനിടെയാണ് ഇയാളെ കണ്ടെത്തിയതെന്നാണ് പുറത്തുവരുന്ന വിവരം. 2023ൽ പകർത്തിയതായി പറയുന്ന ചിത്രങ്ങളാണ് പ്രധാനമായും പുറത്തുവന്നിരിക്കുന്നത്. ബ്രൂണെയിലെ മലയാളി സമൂഹത്തിൽനിന്നുള്ള ചിലരുടെ സഹായത്തോടെ ഇയാൾ താമസിക്കുന്ന പ്രദേശവും ഭക്ഷണം കഴിക്കാനെത്തുന്ന ഹോട്ടലും കണ്ടെത്തിയതായാണ് റിപ്പോർട്ട്. തുടർന്ന് ഇയാളെ നിരീക്ഷിച്ചാണ് കൂടുതൽ വിവരങ്ങൾ ശേഖരിച്ചതെന്നും സൂചനയുണ്ട്.

സുകുമാരക്കുറുപ്പിന്റെ നാട്ടിലുള്ള ബന്ധുക്കളുമായി ഇയാൾക്ക് ബന്ധമുണ്ടെന്ന സംശയവും അന്വേഷണത്തിൽ ഉയർന്നിട്ടുണ്ട്. ഭാര്യയുടെ ആരോഗ്യസ്ഥിതിയെക്കുറിച്ച് അന്വേഷിച്ചതായി പറയുന്ന ചാറ്റ് വിവരങ്ങൾ ഉൾപ്പെടെയുള്ള കാര്യങ്ങൾ പരിശോധിക്കുന്നതായാണ് റിപ്പോർട്ടുകൾ. ബന്ധുക്കളുടെ ഫോൺ ഹാക്ക് ചെയ്തതിലൂടെയാണ് ഇത്തരം വിവരങ്ങൾ ലഭിച്ചതെന്ന ആരോപണവും ഉയർന്നിട്ടുണ്ട്. എന്നാൽ ഈ അവകാശവാദങ്ങൾക്കും ഔദ്യോഗിക സ്ഥിരീകരണം ലഭിച്ചിട്ടില്ല.

ബ്രൂണെയിൽ സുകുമാരക്കുറുപ്പെന്ന് സംശയിക്കുന്നയാൾ മലേഷ്യ-ബ്രൂണെ അതിർത്തിക്ക് സമീപമുള്ള സിംപാങ് മേഖലയിലാണ് താമസിക്കുന്നതെന്നാണ് റിപ്പോർട്ടുകൾ. നിർമാണ മേഖലയുമായി ബന്ധപ്പെട്ട ബിസിനസിൽ ഇയാൾ പ്രവർത്തിക്കുന്നതായും നിയമപരമായ രേഖകളുടെ കാലാവധി സംബന്ധിച്ച് സംശയങ്ങളുണ്ടെന്നും റിപ്പോർട്ടിലുണ്ട്. സുകുമാരക്കുറുപ്പിന്റെ പഴയ ചിത്രങ്ങൾ അടിസ്ഥാനമാക്കി എഐ സാങ്കേതികവിദ്യ ഉപയോഗിച്ച് തയ്യാറാക്കിയ നിരവധി സാധ്യതാ ചിത്രങ്ങൾ പരിശോധിച്ച ശേഷമാണ് സൈബർ വിദഗ്ധൻ ഇയാളിലേക്ക് എത്തിയതെന്നും പറയുന്നു.

അതേസമയം, പുതിയ വിവരങ്ങളുടെ അടിസ്ഥാനത്തിൽ കേന്ദ്ര രഹസ്യാന്വേഷണ ഏജൻസികളും അന്വേഷണം ആരംഭിച്ചതായാണ് റിപ്പോർട്ട്. എന്നാൽ വ്യക്തിയുടെ തിരിച്ചറിയൽ ഉറപ്പാക്കാൻ ഡിഎൻഎ പരിശോധന ഉൾപ്പെടെയുള്ള ശാസ്ത്രീയ തെളിവുകൾ ആവശ്യമാണ്. അതിനാൽ ഇപ്പോഴത്തെ വിവരങ്ങളുടെ അടിസ്ഥാനത്തിൽ ബ്രൂണെയിലുള്ളയാൾ സുകുമാരക്കുറുപ്പ് തന്നെയാണെന്ന് സ്ഥിരീകരിക്കാനാകില്ല.
1984 ജനുവരി 21ന് ആലപ്പുഴയിലെ കരുവാറ്റ സ്വദേശിയായ ചാക്കോയെ കൊലപ്പെടുത്തി, ചാക്കോയുടെ പേരിലുള്ള ഇൻഷുറൻസ് തുക തട്ടിയെടുക്കാൻ ശ്രമിച്ച കേസിലാണ് ഗോപാലകൃഷ്ണക്കുറുപ്പ് എന്ന സുകുമാരക്കുറുപ്പ് പ്രതിയായത്. കൊലപാതകത്തിന് ശേഷം മൃതദേഹം കാറിലിട്ട് കത്തിച്ച നിലയിൽ കണ്ടെത്തിയതോടെയാണ് കേരളത്തെ ഞെട്ടിച്ച കേസ് പുറത്തറിയുന്നത്. സംഭവത്തിന് പിന്നാലെ രാജ്യംവിട്ട സുകുമാരക്കുറുപ്പിനെ പിന്നീട് കണ്ടെത്താൻ പോലീസിന് കഴിഞ്ഞിട്ടില്ല.

പതിറ്റാണ്ടുകളായി ഇന്ത്യയിലും വിദേശത്തുമായി സുകുമാരക്കുറുപ്പിനായി അന്വേഷണം നടത്തിയിരുന്നു. മുംബൈ, ഡൽഹി, ബിഹാർ, മധ്യപ്രദേശ് തുടങ്ങിയ വിവിധ സ്ഥലങ്ങളിൽ വ്യാജപേരുകളിലും വേഷമാറ്റങ്ങളിലുമായി ഇയാൾ കഴിഞ്ഞിരുന്നതായി അന്വേഷണ സംഘത്തിന് പല ഘട്ടങ്ങളിലും വിവരങ്ങൾ ലഭിച്ചിരുന്നു. 1990ൽ മുംബൈയിലെ സാന്താക്രൂസ് വിമാനത്താവളത്തിന് സമീപം ‘ജോഷി’ എന്ന പേരിൽ താമസിച്ചിരുന്നതായും പോലീസ് രേഖകളിൽ പരാമർശമുണ്ട്.

ഒളിവിൽ കഴിയുന്നതിനിടെ ഗുരുതരമായ ഹൃദ്രോഗം ബാധിച്ചിരുന്നതായി ചില മെഡിക്കൽ റിപ്പോർട്ടുകളും നേരത്തെ അന്വേഷണത്തിന്റെ ഭാഗമായിരുന്നു. കൊൽക്കത്തയിലെ ആശുപത്രിയിൽ സുകുമാരക്കുറുപ്പിനെ കണ്ടതായി ആലപ്പുഴ സ്വദേശിനിയായ മുൻ നഴ്‌സ് പോലീസിന് മൊഴി നൽകിയ സംഭവവും കേസന്വേഷണത്തിൽ ശ്രദ്ധ നേടിയിരുന്നു. എന്നാൽ ഓരോ തവണയും പോലീസിന് ഇയാളിലേക്ക് എത്തുന്നതിന് മുമ്പ് രക്ഷപ്പെടാൻ സാധിച്ചതായാണ് അന്വേഷണ ചരിത്രം.

സുകുമാരക്കുറുപ്പ് മരിച്ചിരിക്കാമെന്ന നിഗമനത്തിലേക്ക് അന്വേഷണം നീങ്ങുന്നതിനിടെയാണ് ഇപ്പോൾ ബ്രൂണെയിൽനിന്നുള്ള പുതിയ വിവരങ്ങൾ പുറത്തുവരുന്നത്. എന്നാൽ പുറത്തുവന്ന ചിത്രങ്ങളും മറ്റ് വിവരങ്ങളും ഔദ്യോഗികമായി പരിശോധിച്ച് തിരിച്ചറിയൽ സ്ഥിരീകരിക്കുന്നതുവരെ ഇത് ഒരു സംശയം മാത്രമായി കാണേണ്ടതുണ്ട്. കേന്ദ്ര ഏജൻസികളുടെ പരിശോധനകൾക്ക് ശേഷമേ പുതിയ അവകാശവാദങ്ങളുടെ യാഥാർഥ്യം വ്യക്തമാകൂ.

Summary: Fresh reports have raised questions over whether Sukumara Kurup, who has been absconding since the 1984 Chacko murder case, could still be alive. A cyber expert reportedly traced an elderly Malayalam-speaking man in Brunei who allegedly bears a resemblance to Kurup, but his identity has not been officially confirmed.