യുഎഇയുമായുള്ള ബന്ധത്തിൽ പുതിയ അധ്യായത്തിന് തയ്യാറെന്ന് ഇറാൻ; ബ്രിക്സ് ഉച്ചകോടിക്കിടെ നിർണായക കൂടിക്കാഴ്ച | Iran UAE Relations BRICS Summit

ന്യൂഡൽഹി: യുഎഇയുമായുള്ള ബന്ധത്തിൽ പുതിയ അധ്യായം തുറക്കാൻ ആഗ്രഹിക്കുന്നതായി ഇറാൻ പ്രസിഡന്റ് മസൂദ് പെസെഷ്‌കിയാൻ (Iran UAE Relations BRICS Summit). ന്യൂഡൽഹിയിൽ നടന്ന ബ്രിക്സ് ഉച്ചകോടിക്കിടെ യുഎഇ കിരീടാവകാശി ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാനുമായി കൂടിക്കാഴ്ച നടത്തിയതിന് പിന്നാലെയാണ് ഇറാൻ പ്രസിഡന്റിന്റെ പ്രതികരണം.

പേർഷ്യൻ ഗൾഫ് മേഖലയിലെ സംഘർഷങ്ങൾക്ക് പിന്നാലെ ടെഹ്റാനും അബുദാബിയും തമ്മിലുള്ള ബന്ധം വഷളായ സാഹചര്യത്തിൽ പെസെഷ്‌കിയാന്റെ പ്രസ്താവനയ്ക്ക് വലിയ പ്രാധാന്യമുണ്ട്. കിരീടാവകാശിയുമായുള്ള കൂടിക്കാഴ്ച ക്രിയാത്മകമായിരുന്നെന്നും പഴയ കാര്യങ്ങൾ മറന്ന് ഭാവിയിലേക്ക് നോക്കാനും ഒരുമിച്ച് മുന്നോട്ട് പോകാനും ഇരുപക്ഷവും ധാരണയിലെത്തിയെന്നും അദ്ദേഹം പറഞ്ഞു.

യുഎഇയുമായോ മേഖലയിലെ മറ്റ് രാജ്യങ്ങളുമായോ ഇറാന് പ്രശ്നങ്ങളില്ലെന്നും, മറിച്ച് ഈ രാജ്യങ്ങളിലുള്ള അമേരിക്കൻ സൈനിക താവളങ്ങളോടാണ് എതിർപ്പെന്നും പെസെഷ്‌കിയാൻ വ്യക്തമാക്കി. യുഎഇ ഉൾപ്പെടെയുള്ള ഗൾഫ് രാജ്യങ്ങളെ ഇറാൻ സഹോദരങ്ങളായാണ് കാണുന്നതെന്നും അദ്ദേഹം പറഞ്ഞു.

അയൽരാജ്യങ്ങളുടെ ഭൂമി അമേരിക്കൻ സൈനിക ആവശ്യങ്ങൾക്കായി ഉപയോഗിക്കുന്നതിനെയാണ് ടെഹ്റാൻ എതിർക്കുന്നതെന്നും ഇറാൻ പ്രസിഡന്റ് ആരോപിച്ചു. അമേരിക്കൻ സൈനിക താവളങ്ങൾ ഉപയോഗിച്ച് ഇറാനെതിരെ ആക്രമണം നടത്തുകയും നേതാക്കളെയും കമാൻഡർമാരെയും സാധാരണക്കാരെയും ലക്ഷ്യമിടുകയും അടിസ്ഥാന സൗകര്യങ്ങൾ തകർക്കുകയും ചെയ്യുന്നുവെന്നാണ് അദ്ദേഹത്തിന്റെ ആരോപണം.

മേഖലയിലെ ഊർജസ്രോതസ്സുകൾ ചൂഷണം ചെയ്യുന്നതിനൊപ്പം ആയുധ വിൽപ്പനയിലൂടെ ഗൾഫ് രാജ്യങ്ങൾക്കിടയിൽ ഭിന്നത സൃഷ്ടിക്കാനും അമേരിക്ക ശ്രമിക്കുന്നുവെന്നും പെസെഷ്‌കിയാൻ ആരോപിച്ചു. ആയുധങ്ങളും മിസൈലുകളും വിൽക്കുന്നതിലൂടെ രാജ്യങ്ങൾക്കിടയിൽ ഭയവും സംഘർഷവും വർധിപ്പിക്കുകയാണ് വാഷിംഗ്ടണിന്റെ ലക്ഷ്യമെന്നും അദ്ദേഹം പറഞ്ഞു.

അമേരിക്കയുമായുള്ള സംഘർഷത്തെ തുടർന്ന് യുഎഇ ഉൾപ്പെടെയുള്ള അയൽരാജ്യങ്ങളിലെ അമേരിക്കൻ സൈനിക താവളങ്ങളെയും ആസ്തികളെയും ഇറാൻ ലക്ഷ്യമിട്ടിരുന്നതായി റിപ്പോർട്ടുകളുണ്ട്. ഇതിന് പിന്നാലെ യുഎഇ ഇറാനുമായുള്ള വ്യാപാര, സാമ്പത്തിക ഇടപാടുകൾ നിർത്തിവെച്ചതും ഇരുരാജ്യങ്ങളുടെയും ബന്ധത്തെ ബാധിച്ചു.

ഇതിനിടെ, പെസെഷ്‌കിയാനും അൽ നഹ്യാനും തമ്മിലുള്ള കൂടിക്കാഴ്ച ബന്ധം പുനഃസ്ഥാപിക്കുന്നതിനുള്ള അവസരമായി മാറിയേക്കുമെന്നാണ് വിലയിരുത്തൽ. ശനിയാഴ്ച നടന്ന ചർച്ചയിൽ മേഖലയിലെ സംഘർഷം കുറയ്ക്കുന്നതിനും സ്ഥിരത ഉറപ്പാക്കുന്നതിനുമാണ് ഇരുപക്ഷവും ഊന്നൽ നൽകിയത്.

സംഘർഷങ്ങളും ഉപരോധങ്ങളും കാരണം ഇറാനിലെ ജനങ്ങൾ വലിയ വില നൽകേണ്ടിവന്നുവെന്നും പെസെഷ്‌കിയാൻ പറഞ്ഞു. സാധാരണക്കാരെ സംരക്ഷിക്കുന്നതിനും അവർക്കെതിരായ ആക്രമണങ്ങൾ തടയുന്നതിനും അന്താരാഷ്ട്ര സമൂഹം ഇടപെടണമെന്നും അദ്ദേഹം ആവശ്യപ്പെട്ടു.

Story Summary:
Iranian President Masoud Pezeshkian has expressed his desire to open a new chapter in relations with the UAE following a meeting with Abu Dhabi Crown Prince Sheikh Khaled bin Mohammed bin Zayed Al Nahyan during the BRICS Summit in New Delhi. Both sides reportedly emphasized reducing regional tensions and promoting stability.