ചികിത്സ കഴിഞ്ഞാൽ വീണ്ടും സബ്സ്ക്രിപ്ഷനുമായി മുന്നോട്ട് പോകും; കീമോതെറാപ്പിയുടെ വേദനക്കിടയിലും രേണു സുധി | Renu Sudhi Cancer Treatment
Current: മലയാളം
അർബുദ ചികിത്സയിൽ കഴിയുന്ന ബിഗ് ബോസ് താരം രേണു സുധി ചികിത്സ പൂർത്തിയാക്കിയ ശേഷം വീണ്ടും സോഷ്യൽ മീഡിയ സബ്സ്ക്രിപ്ഷൻ തുടരുമെന്ന് വ്യക്തമാക്കി (Renu Sudhi Cancer Treatment). നിലവിൽ കീമോതെറാപ്പിയിലൂടെ കടന്നുപോകുന്ന താരം, തന്റെ ചികിത്സയ്ക്കുള്ള സാമ്പത്തിക സഹായം ലഭ്യമാക്കുന്നതിൽ സബ്സ്ക്രിപ്ഷൻ നിർണായകമായിരുന്നുവെന്നും സോഷ്യൽ മീഡിയയിൽ പങ്കുവെച്ച വീഡിയോയിൽ പറഞ്ഞു.
തനിക്ക് കോടികളുടെ വരുമാനമില്ലെന്നും ബിഗ് ബോസിൽ നിന്ന് ലക്ഷങ്ങളോ കോടികളോ ലഭിച്ചിട്ടില്ലെന്നും രേണു സുധി വ്യക്തമാക്കി. ബിഗ് ബോസിൽ പങ്കെടുത്തതിലൂടെ വലിയ തുക ലഭിച്ചുവെന്നത് പലരുടെയും തെറ്റിദ്ധാരണയാണെന്നും താരം പറഞ്ഞു. ബിഗ് ബോസിൽ നിന്ന് തനിക്ക് ലഭിച്ചത് സീസണിലെ ഏറ്റവും കുറഞ്ഞ പ്രതിഫലമായിരുന്നുവെന്നും രേണു സുധി അവകാശപ്പെട്ടു.
യൂട്യൂബ് ചാനലും സബ്സ്ക്രിപ്ഷനുമായിരുന്നു തന്റെ പ്രധാന വരുമാന മാർഗങ്ങളെന്നും താരം പറഞ്ഞു. സബ്സ്ക്രിപ്ഷനിലൂടെ ലഭിച്ച വരുമാനം കൊണ്ടാണ് നാല് കീമോതെറാപ്പികൾക്കും ചികിത്സയ്ക്കുമുള്ള പണം കണ്ടെത്താൻ കഴിഞ്ഞതെന്നും അവർ വ്യക്തമാക്കി.
നാലാമത്തെ കീമോയ്ക്ക് ശേഷം ശാരീരികമായും മാനസികമായും ഏറെ ബുദ്ധിമുട്ട് അനുഭവപ്പെട്ടതായും രേണു സുധി പറഞ്ഞു. റീലുകൾ പങ്കുവെക്കാനുള്ള മാനസികാവസ്ഥയിലോ ശാരീരികാവസ്ഥയിലോ ആയിരുന്നില്ലെന്നും തന്നെ സ്നേഹിക്കുന്നവർ വിവരങ്ങൾ അറിയാൻ വിളിച്ചാൽ പോലും ഫോൺ എടുക്കാൻ കഴിയാത്ത അവസ്ഥയായിരുന്നുവെന്നും അവർ പറഞ്ഞു.
അഞ്ചാമത്തെ കീമോയ്ക്ക് ആവശ്യമായ തുകയിൽ കുറവുണ്ടായതായും രണ്ട് ലക്ഷത്തിലധികം രൂപ മരുന്നിനായി ചെലവായതായും രേണു സുധി പറഞ്ഞു. ആ സമയത്ത് താനും കുടുംബവും ഏറെ നിരാശയിലായിരുന്നുവെന്നും അവർ വ്യക്തമാക്കി.
തന്നോട് നേരിട്ട് ആവശ്യപ്പെടാതെയും കാര്യങ്ങൾ മനസിലാക്കി സഹായിച്ച നിരവധി പേരുണ്ടെന്നും താരം പറഞ്ഞു. ചികിത്സയ്ക്കിടെ അടിയന്തരമായി സഹായം ആവശ്യമായി വന്നാൽ അറിയിക്കണമെന്ന് സ്നേഹത്തോടെ പറഞ്ഞവരുമുണ്ടെന്നും അവർ കൂട്ടിച്ചേർത്തു.
ചികിത്സ പൂർത്തിയാക്കിയ ശേഷം താൻ വീണ്ടും സബ്സ്ക്രിപ്ഷനുമായി മുന്നോട്ട് പോകുമെന്നും ആരൊക്കെ എതിർത്താലും പരിഹസിച്ചാലും അതിൽ മാറ്റമുണ്ടാകില്ലെന്നും രേണു സുധി വ്യക്തമാക്കി. കീമോതെറാപ്പി അവസാന ഘട്ടത്തിലേക്ക് കടക്കുകയാണെന്നും മുടി ചെറുതായി വളർന്നുതുടങ്ങിയതിൽ സന്തോഷമുണ്ടെന്നും താരം പറഞ്ഞു.
Story Summary: Bigg Boss contestant Renu Sudhi, who is currently undergoing chemotherapy for cancer, said her subscription-based income helped fund her treatment. She stated that she plans to resume her subscription activities after completing treatment despite criticism or opposition.
