‘ഗ്യാങ് ആക്രമണത്തിന് ശ്രമം’; ലുധിയാനയിൽ പൊലീസും ഗുണ്ടകളും ഏറ്റുമുട്ടി, രണ്ട് പേർ കൊല്ലപ്പെട്ടു | Ludhiana Police Encounter
Current: മലയാളം
ചണ്ഡിഗഡ്: പഞ്ചാബിലെ ലുധിയാനയിൽ പൊലീസും ഗുണ്ടാസംഘത്തിലെ അംഗങ്ങളെന്ന് സംശയിക്കുന്നവരും തമ്മിലുണ്ടായ ഏറ്റുമുട്ടലിൽ രണ്ട് പേർ കൊല്ലപ്പെട്ടു. ലുധിയാനയിലെ ആതാം നഗറിലാണ് സംഭവം. രഹസ്യവിവരത്തിന്റെ അടിസ്ഥാനത്തിൽ പഞ്ചാബ് പൊലീസും ആന്റി ഗ്യാങ്സ്റ്റർ ടാസ്‌ക് ഫോഴ്സും നടത്തിയ പരിശോധനയ്ക്കിടെയാണ് വെടിവെപ്പുണ്ടായത്. കൊല്ലപ്പെട്ടവരിൽ നിന്ന് ഓട്ടോമാറ്റിക് പിസ്റ്റളുകളും വെടിയുണ്ടകളും പിടിച്ചെടുത്തതായി പൊലീസ് അറിയിച്ചു. (Ludhiana Police Encounter)
യുകെ കേന്ദ്രീകരിച്ച് പ്രവർത്തിക്കുന്നതായി പൊലീസ് പറയുന്ന ‘ഡോണി ബാൽ’ ഗ്യാങിലെ അംഗങ്ങളാണ് കൊല്ലപ്പെട്ടതെന്നാണ് വിവരം. രവി ഖവാജ്കെയുടെ ഓർമയ്ക്കായി സംഘടിപ്പിച്ചിരുന്ന രക്തദാന ക്യാമ്പിൽ ആക്രമണം നടത്താനാണ് ഇവർ എത്തിയതെന്നാണ് പൊലീസ് സംശയിക്കുന്നത്. പൊലീസിന്റെ പരിശോധനയ്ക്കിടെ പ്രതികളെത്തിയ വാഹനം തടഞ്ഞപ്പോൾ ഇവർ വെടിയുതിർത്തെന്നും തുടർന്ന് പൊലീസ് തിരിച്ചടിച്ചെന്നുമാണ് അധികൃതരുടെ വിശദീകരണം. ഏറ്റുമുട്ടലിൽ ഏകദേശം 25 റൗണ്ട് വെടിവെപ്പുണ്ടായെന്നും ഒരു പൊലീസ് വാഹനത്തിന് വെടിയേറ്റെന്നും റിപ്പോർട്ടുണ്ട്. 2016ൽ ലുധിയാനയിലെ ഗിൽ റിസോർട്ടിൽ വെടിയേറ്റ് കൊല്ലപ്പെട്ട കോൺഗ്രസ് നേതാവും ഖവാജ്കെ ഗ്രാമത്തിലെ മുൻ സർപഞ്ചുമായ രവി ഖവാജ്കെയുടെ ഓർമയ്ക്കായാണ് രക്തദാന ക്യാമ്പ് സംഘടിപ്പിച്ചിരുന്നത്. രവി ഖവാജ്കെയുടെ കൊലപാതകത്തിന് പിന്നിൽ ദവീന്ദർ ബംബിഹ ഗാങ് ആണെന്നാണ് പൊലീസ് നേരത്തെ പറഞ്ഞിരുന്നത്. അതേ വർഷം ബഥിന്ദയിൽ നടന്ന ഏറ്റുമുട്ടലിൽ ദവീന്ദർ ബംബിഹ കൊല്ലപ്പെട്ടതിന് പിന്നാലെ വിദേശത്തുള്ള ഡോണി ബാൽ ഗ്യാങിന്റെ പ്രവർത്തനങ്ങൾ നിയന്ത്രിക്കുന്നതായാണ് പൊലീസ് കരുതുന്നത്.
അമൃത്സർ സ്വദേശികളായ രണ്ട് പ്രതികൾ തലേദിവസം രാത്രിയാണ് ലുധിയാനയിലെത്തിയതെന്നാണ് പൊലീസ് പറയുന്നത്. രക്തദാന ക്യാമ്പിലെത്തുന്നവരെ ലക്ഷ്യമിട്ട് ആക്രമണം നടത്താൻ ഇവർക്ക് നിർദേശം നൽകിയതും അത്യാധുനിക 9 എംഎം ഓട്ടോമാറ്റിക് ആയുധങ്ങൾ ലഭ്യമാക്കിയതും ഡോണി ബാൽ ആണെന്നാണ് പൊലീസ് വിശദീകരണം. രഹസ്യവിവരം ലഭിച്ചതിനെ തുടർന്ന് പ്രദേശം വളഞ്ഞ പൊലീസ് സംഘം ഷൂട്ടർമാരെ തടയാൻ ശ്രമിക്കുന്നതിനിടെയാണ് ഏറ്റുമുട്ടൽ ഉണ്ടായത്.
പൊലീസിന്റെ സമയോചിതമായ ഇടപെടലിലൂടെ വലിയ ആക്രമണം ഒഴിവാക്കാനായെന്നാണ് അധികൃതരുടെ വിലയിരുത്തൽ. അതേസമയം, സംഭവത്തിൽ കൂടുതൽ അന്വേഷണം തുടരുകയാണ്. കൊല്ലപ്പെട്ടവർക്ക് ലുധിയാനയിലെത്താൻ സഹായം നൽകിയവർ ആരൊക്കെയാണെന്നും ആക്രമണത്തിന് പിന്നിൽ മറ്റാരെങ്കിലും ഉൾപ്പെട്ടിട്ടുണ്ടോയെന്നും പൊലീസ് പരിശോധിക്കുന്നുണ്ട്. ഇതിനിടെ, പഞ്ചാബ് ഗായകൻ ഗുലാബ് സിദുവിന്റെ വീടിന് നേരെയുണ്ടായ വെടിവെപ്പിലെ പ്രതികളെ പിടികൂടാൻ ഉന്നത പൊലീസ് ഉദ്യോഗസ്ഥരടങ്ങുന്ന പ്രത്യേക അന്വേഷണ സംഘത്തെയും രൂപീകരിച്ചിട്ടുണ്ട്. സംസ്ഥാനത്തെ ക്രമസമാധാന നിലയെച്ചൊല്ലി പ്രതിപക്ഷ പാർട്ടികൾ വിമർശനം ഉയർത്തിയിട്ടുണ്ട്.
Summary: Two suspected gang members were killed in a police encounter in Ludhiana, Punjab, after police allegedly intercepted them while they were planning an attack at a blood donation camp. Police suspect links to the UK-based Doni Bal gang and are investigating possible accomplices.
