സംസ്ഥാനത്ത് ഇന്ന് വൈദ്യുതി നിയന്ത്രണത്തിന് സാധ്യത; വൈകിട്ട് 6 മുതൽ രാത്രി 12.45 വരെ ജാഗ്രത | Kerala power cut today
Current: മലയാളം
തിരുവനന്തപുരം: സംസ്ഥാനത്ത് ഇന്നും വൈദ്യുതി നിയന്ത്രണത്തിന് സാധ്യതയെന്ന് കെഎസ്ഇബിയുടെ സന്ദേശം. വൈകിട്ട് 6 മുതൽ രാത്രി 12.45 വരെയുള്ള സമയത്തിനിടെ വിവിധ ഘട്ടങ്ങളിലായി വൈദ്യുതി മുടങ്ങാൻ സാധ്യതയുണ്ടെന്നാണ് അറിയിപ്പ് (Kerala power cut today). വൈകിട്ട് 7.30നും 8നും ഇടയിലും രാത്രി 10.55നും 11.20നും ഇടയിലും ഭാഗികമായി വൈദ്യുതി നിയന്ത്രണം ഉണ്ടായേക്കുമെന്നാണ് സന്ദേശത്തിൽ പറയുന്നത്. വൈദ്യുതി ലഭ്യത ഉറപ്പാക്കുന്നതിനായി നിയന്ത്രണം പരമാവധി ഒഴിവാക്കാൻ ശ്രമിക്കുന്നതായി സർക്കാർ അറിയിച്ചു. കഴിഞ്ഞ ദിവസം റിയൽ ടൈം മാർക്കറ്റിൽനിന്ന് അധിക വൈദ്യുതി ലഭിച്ചതിനാൽ സംസ്ഥാനത്ത് വൈദ്യുതി നിയന്ത്രണം ഏർപ്പെടുത്തേണ്ട സാഹചര്യമുണ്ടായിരുന്നില്ല.
അതേസമയം, സംസ്ഥാനത്തെ വൈദ്യുതി പ്രതിസന്ധി പരിഹരിക്കുന്നതിനായി ലഭ്യമായ എല്ലാ മാർഗങ്ങളിലൂടെയും വൈദ്യുതി വാങ്ങാനാണ് സർക്കാർ നീക്കം. വില കൂടുതലായാലും അടിയന്തര സാഹചര്യം നേരിടാൻ വൈദ്യുതി വാങ്ങുന്നതിന് മുൻഗണന നൽകുമെന്ന് വൈദ്യുതി മന്ത്രി സണ്ണി ജോസഫ് വ്യക്തമാക്കിയിരുന്നു. മുഖ്യമന്ത്രിയുടെ നേതൃത്വത്തിൽ ചേർന്ന യോഗത്തിലും വിഷയം വിശദമായി ചർച്ച ചെയ്തിരുന്നു. എൻടിപിസിയിൽനിന്ന് വൈദ്യുതി വാങ്ങാനുള്ള ശ്രമങ്ങളും പുരോഗമിക്കുകയാണ്. എൻടിപിസിയിൽനിന്ന് യൂണിറ്റിന് 30 രൂപ വരെ നിരക്കിൽ വൈദ്യുതി വാങ്ങേണ്ടിവരുന്നത് സർക്കാരിന് വലിയ സാമ്പത്തിക ബാധ്യതയാകുമെന്നും മന്ത്രി ചൂണ്ടിക്കാട്ടി. ഈ അധിക ബാധ്യത ഭാവിയിൽ വൈദ്യുതി നിരക്ക് വർധനയ്ക്ക് കാരണമാകാനുള്ള സാധ്യത തള്ളിക്കളയാനാകില്ലെന്നും അദ്ദേഹം വ്യക്തമാക്കി.
അടിയന്തര സാഹചര്യത്തിൽ ആവശ്യമായ വൈദ്യുതി ഉറപ്പാക്കുന്നതിനാണ് ഇപ്പോഴത്തെ പ്രധാന ലക്ഷ്യമെന്നും മന്ത്രി പറഞ്ഞു. ഉയർന്ന നിരക്കിൽ വൈദ്യുതി വാങ്ങേണ്ടിവരുന്ന സാഹചര്യം സംബന്ധിച്ച് വൈദ്യുതി റെഗുലേറ്ററി കമ്മിഷനെ ബോധ്യപ്പെടുത്തുമെന്നും സർക്കാർ വ്യക്തമാക്കിയിട്ടുണ്ട്.
Summary: Kerala may face power restrictions today between 6 PM and 12:45 AM, with partial outages possible during specific evening and late-night periods. The government is exploring additional power purchases, including from NTPC, to manage the ongoing electricity shortage.
