നന്ദിഗ്രാം ഉപതെരഞ്ഞെടുപ്പിൽ മമത മത്സരിക്കില്ല; സഞ്ചിത പ്രധാൻ ഡേ തൃണമൂൽ സ്ഥാനാർഥി | Nandigram By Election
Current: മലയാളം
കൊൽക്കത്ത: നന്ദിഗ്രാം ഉപതെരഞ്ഞെടുപ്പിൽ (Nandigram By Election) മത്സരിച്ച് ബംഗാൾ നിയമസഭയിലേക്ക് മമത ബാനർജി തിരിച്ചെത്തുമെന്ന അഭ്യൂഹങ്ങൾക്ക് വിരാമം. നന്ദിഗ്രാമിൽ സഞ്ചിത പ്രധാൻ ഡേയെ തൃണമൂൽ കോൺഗ്രസ് സ്ഥാനാർഥിയായി പ്രഖ്യാപിച്ചു. ഇതോടെ മമത ഉപതെരഞ്ഞെടുപ്പിൽ മത്സരിച്ചേക്കുമെന്ന അഭ്യൂഹങ്ങൾക്കും അന്ത്യമായി.
മുഖ്യമന്ത്രി സുവേന്ദു അധികാരി നന്ദിഗ്രാമിലും ഭവാനിപൂരിലും വിജയിച്ചതിനെ തുടർന്ന് നിയമപ്രകാരം ഒരു മണ്ഡലം ഒഴിയേണ്ടി വന്നതോടെയാണ് നന്ദിഗ്രാമിൽ ഉപതെരഞ്ഞെടുപ്പിന് സാഹചര്യമൊരുങ്ങിയത്. നന്ദിഗ്രാമിനൊപ്പം രജിനഗറിലും ഒക്ടോബറിൽ ഉപതെരഞ്ഞെടുപ്പ് നടക്കും.
നിയമസഭാ തെരഞ്ഞെടുപ്പിലെ കനത്ത തിരിച്ചടിക്ക് പിന്നാലെ തൃണമൂൽ കോൺഗ്രസിൽ വിമത നീക്കം ശക്തമായ സാഹചര്യത്തിൽ, നിയമസഭയിലേക്ക് തിരിച്ചെത്തുന്നതിനായി മമത നന്ദിഗ്രാമിൽ മത്സരിച്ചേക്കുമെന്നായിരുന്നു നേരത്തെ റിപ്പോർട്ടുകൾ. എന്നാൽ പാർട്ടി സഞ്ചിത പ്രധാൻ ഡേയെ സ്ഥാനാർഥിയാക്കുകയായിരുന്നു.
2008 മുതൽ തൃണമൂൽ കോൺഗ്രസിനൊപ്പം പ്രവർത്തിക്കുന്ന സഞ്ചിത നന്ദിഗ്രാമിലെ ബോയാൽ പ്രൈമറി സ്കൂളിലെ അധ്യാപികയാണ്. അധ്യാപക നിയമന അഴിമതി കേസുമായി ബന്ധപ്പെട്ട് 26,000 നിയമനങ്ങൾ റദ്ദാക്കിയപ്പോൾ സഞ്ചിതയ്ക്കും ജോലി നഷ്ടപ്പെട്ടിരുന്നു. പിന്നീട് സുപ്രീം കോടതി ഉത്തരവിനെ തുടർന്ന് ജോലി തിരികെ ലഭിച്ചു. 2018 മുതൽ 2023 വരെ പഞ്ചായത്ത് സമിതി അംഗമായും പ്രവർത്തിച്ചിട്ടുണ്ട്.
മമത ബാനർജിക്ക് രാഷ്ട്രീയമായും വൈകാരികമായും ഏറെ പ്രാധാന്യമുള്ള മണ്ഡലമാണ് നന്ദിഗ്രാം. 2007ലെ നന്ദിഗ്രാം പ്രക്ഷോഭത്തിന്റെ പശ്ചാത്തലത്തിലാണ് 2011ൽ തൃണമൂൽ കോൺഗ്രസ് ബംഗാളിൽ അധികാരത്തിലെത്തിയത്. ഇത്തരമൊരു മണ്ഡലത്തിൽ ജനങ്ങൾക്ക് പരിചിതനായ നേതാവിന് പകരം പുതുമുഖത്തെ സ്ഥാനാർഥിയാക്കിയതും രാഷ്ട്രീയ ശ്രദ്ധ നേടിയിട്ടുണ്ട്.
രജിനഗർ ഉപതെരഞ്ഞെടുപ്പിൽ റെബിയുൾ ആലം ചൗധരിയെയാണ് തൃണമൂൽ കോൺഗ്രസ് സ്ഥാനാർഥിയാക്കിയിരിക്കുന്നത്.
Story Summary:
Trinamool Congress has ended speculation that West Bengal Chief Minister Mamata Banerjee would contest the Nandigram by-election. The party has nominated Sanchita Pradhan Dey, a teacher and long-time TMC worker, as its candidate from Nandigram.
