കായംകുളത്ത് ബൈക്കിൽ സഞ്ചരിച്ച പത്തുവയസുകാരി ബസിനടിയിൽപെട്ട് മരിച്ചു | Kayamkulam Accident

കായംകുളം: പിതാവിനൊപ്പം ബൈക്കിൽ യാത്ര ചെയ്യുന്നതിനിടെ ബസിനടിയിൽപ്പെട്ട് പത്തുവയസ്സുകാരിക്ക് ദാരുണാന്ത്യം (Kayamkulam Accident). ചെട്ടികുളങ്ങര കണ്ണംമംഗലം ശ്രീലകം വീട്ടിൽ ശ്രീകാന്തിന്റെയും വിദ്യയുടെയും മകൾ ശ്രീഭദ്രയാണ് മരിച്ചത്. ചെട്ടികുളങ്ങര ഈരേഴ വടക്ക് എൽപിഎസ് സ്കൂളിലെ നാലാം ക്ലാസ് വിദ്യാർഥിനിയായിരുന്നു.

കെ.പി റോഡിൽ കായംകുളം പൊലീസ് സ്റ്റേഷന് സമീപം കഴിഞ്ഞദിവസം വൈകിട്ട് 6.15ഓടെയായിരുന്നു അപകടം. പിതാവ് ശ്രീകാന്തിനൊപ്പം ബൈക്കിൽ യാത്ര ചെയ്യുകയായിരുന്ന ശ്രീഭദ്രയുടെ ബൈക്കിൽ മുന്നിലൂടെ എത്തിയ ബസ് ഇടിക്കുകയായിരുന്നു. ഇടിയുടെ ആഘാതത്തിൽ ബൈക്ക് മറിഞ്ഞതോടെ ശ്രീഭദ്ര ബസിനടിയിലേക്ക് വീണു.

ഗുരുതരമായി പരിക്കേറ്റ കുട്ടിയെ ഉടൻ കായംകുളം താലൂക്ക് ആശുപത്രിയിൽ എത്തിച്ചു. തുടർന്ന് കരീലകുളങ്ങരയിലെ സ്വകാര്യ ആശുപത്രിയിലേക്ക് മാറ്റിയെങ്കിലും രാത്രി എട്ടുമണിയോടെ മരണം സംഭവിക്കുകയായിരുന്നു.

അപകടത്തിൽ ശ്രീകാന്തിനും നിസ്സാര പരിക്കേറ്റു. പത്തിയൂർ കൃഷിഭവനിലെ കൃഷി അസിസ്റ്റന്റാണ് ശ്രീകാന്ത്. ശ്രീഭദ്രയുടെ സഹോദരൻ ശ്രീ ഗണേഷ്.

Story Summary:
A 10-year-old girl died after the motorcycle she was travelling on with her father was hit by a bus near Kayamkulam Police Station. The child sustained serious injuries and died while undergoing treatment at a private hospital.