ഈ സോപ്പുപയോഗിച്ച് കൈകഴുകിയാൽ വരും ഗുരുതര രോഗങ്ങൾ; അമേരിക്കയിൽ വിവിധ ബ്രാൻഡഡ് ഉൽപന്നങ്ങൾ തിരിച്ചുവിളിച്ചു, മുന്നറിയിപ്പ്
Current: മലയാളം
വാഷിങ്ടൻ: ഗുരുതരമായ ആരോഗ്യപ്രശ്‌നങ്ങൾക്കു കാരണമായേക്കാവുന്ന ബാക്ടീരിയകളുടെ സാന്നിധ്യം കണ്ടെത്തിയതിനെ തുടർന്ന് അമേരിക്കയിൽ വിവിധ ബ്രാൻഡുകളുടെ ഹാൻഡ് സോപ്പുകൾ തിരിച്ചുവിളിച്ചു.യുഎസ് ഫുഡ് ആൻഡ് ഡ്രഗ് അഡ്മിനിസ്ട്രേഷനാണ് ഇത് സംബന്ധിച്ച മുന്നറിയിപ്പ് നൽകിയത്.
സൂക്ഷ്മാണുക്കളായ സ്യൂഡോമോണാസ്, സെറോഷ്യ എന്നീ ബാക്ടീരിയകളുടെ സാന്നിധ്യമാണ് കണ്ടെത്തിയത്. ഇന്റർകോൺ കെമിക്കൽ കമ്പനി നിർമിച്ച് വിതരണം ചെയ്‌ത വിവിധ ഹാൻഡ് സോപ്പ് ഉൽപന്നങ്ങളാണ് തിരിച്ചുവിളിച്ചത്. അമേരിക്കയിലെ 15 സംസ്ഥാനങ്ങളിലായി 20 കമ്പനികളിലേക്ക് ഈ ഉൽപന്നങ്ങൾ വിതരണം ചെയ്തിട്ടുണ്ട്.
ന്യൂമോണിയ, രക്തത്തിലും മൂത്രനാളിയിലും ഉണ്ടാകുന്ന അണുബാധകൾ തുടങ്ങിയ ആരോഗ്യപ്രശ്‌ങ്ങൾക്ക് ഈ ബാക്ടീരിയകൾ കാരണമായേക്കാം. കൂടുതൽ വിവരങ്ങൾക്കായി ഉപഭോക്താക്കൾ ഉപയോഗിക്കുന്ന ഹാൻഡ് സോപ്പുകളുടെ ലോട്ട് നമ്പറുകളും ബ്രാൻഡുകളും പരിശോധിച്ച് സുരക്ഷിതത്വം ഉറപ്പാക്കാൻ അധികൃതർ നിർദേശിച്ചിട്ടുണ്ട്.
