സുഡാനിൽ സ്വർണഖനി തകർന്നുവീണ് 60 പേർ മരിച്ചു; നിരവധി പേർ മണ്ണിനടിയിൽ കുടുങ്ങിയെന്ന് റിപ്പോർട്ട് | Sudan gold mine collapse
Current: മലയാളം
സുഡാൻ: പടിഞ്ഞാറൻ കോർഡോഫാനിലെ സ്വർണഖനി തകർന്നുവീണ് കുറഞ്ഞത് 60 ചെറുകിട ഖനിത്തൊഴിലാളികൾ മരിച്ചു. നിരവധി പേർ മണ്ണിനടിയിൽ കുടുങ്ങിക്കിടക്കുന്നതായാണ് റിപ്പോർട്ട്. എൽ-നഹൂദ് പട്ടണത്തിന് സമീപമുള്ള അൽ-സറാ ഖനിയിലെ വിവിധ ഭാഗങ്ങൾ ചൊവ്വാഴ്ച തകർന്നുതുടങ്ങിയതിനെ തുടർന്ന് ബുധനാഴ്ച രാവിലെയോടെ 60 മൃതദേഹങ്ങൾ പുറത്തെടുത്തതായി രക്ഷാപ്രവർത്തകർ അറിയിച്ചു (Sudan gold mine collapse). ഖനിയിലെ തൊഴിലാളികൾ തന്നെയാണ് രാത്രി മുഴുവൻ രക്ഷാപ്രവർത്തനം നടത്തിയത്. എന്നാൽ ആവശ്യമായ ഭാരമേറിയ യന്ത്രസാമഗ്രികളുടെ അഭാവം രക്ഷാപ്രവർത്തനത്തിന് വലിയ തടസമായിട്ടുണ്ട്. ഖനിയുടെ വിവിധ ഷാഫ്റ്റുകൾ പരസ്പരം അടുത്തായതിനാൽ ഒരെണ്ണം തകർന്നാൽ സമീപത്തുള്ളവയും തകരാൻ സാധ്യതയുണ്ടെന്ന് രക്ഷപ്പെട്ട തൊഴിലാളികൾ പറഞ്ഞു.
അപകടസമയത്ത് ഖനിയുടെ പ്രവേശന ഭാഗത്ത് ജോലി ചെയ്തിരുന്ന അൽ-അമീൻ സുലൈമാൻ ഉൾപ്പെടെയുള്ള തൊഴിലാളികളാണ് വിവരങ്ങൾ പുറത്തുവിട്ടത്. മണ്ണിനടിയിൽ ഇനിയും ആളുകൾ കുടുങ്ങിക്കിടക്കുന്നുണ്ടെന്നും അവരിൽ പലരും ജീവനോടെ ഉണ്ടാകാനുള്ള സാധ്യത കുറവാണെന്നും തൊഴിലാളികൾ ആശങ്ക പ്രകടിപ്പിച്ചു. എത്ര പേർ ഇനിയും കുടുങ്ങിക്കിടക്കുന്നുവെന്ന് കൃത്യമായി വ്യക്തമല്ല. സുഡാനിൽ ഔദ്യോഗിക നിയന്ത്രണത്തിന് പുറത്തുള്ളതോ നേരത്തെ പ്രവർത്തനം നിർത്തിയതോ ആയ ഖനികളിൽ നടക്കുന്ന ചെറുകിട, കൈത്തൊഴിൽ ഖനനമാണ് രാജ്യത്തെ സ്വർണ ഉൽപാദനത്തിന്റെ വലിയൊരു ഭാഗവും. 2023 ഏപ്രിലിൽ സൈന്യവും അർധസൈനിക വിഭാഗമായ റാപ്പിഡ് സപ്പോർട്ട് ഫോഴ്‌സും തമ്മിൽ യുദ്ധം ആരംഭിച്ചതിന് പിന്നാലെ രാജ്യത്തിന്റെ സമ്പദ്‌വ്യവസ്ഥ വലിയ പ്രതിസന്ധിയിലായി. തൊഴിലില്ലായ്മയും സാമ്പത്തിക ബുദ്ധിമുട്ടുകളും വർധിച്ചതോടെ നിരവധി പേർ അപകടകരമായ സ്വർണഖനനത്തിലേക്ക് തിരിഞ്ഞതായി റിപ്പോർട്ടുകൾ പറയുന്നു.
യുദ്ധത്തിന്റെ ഭാഗമായി ഇരുപക്ഷത്തിന്റെയും പ്രവർത്തനങ്ങൾക്ക് സ്വർണവ്യവസായത്തിൽ നിന്നുള്ള വരുമാനം പ്രധാന ധനസ്രോതസുകളിലൊന്നായി മാറിയിട്ടുണ്ട്. അതേസമയം, സംഘർഷം സുഡാനിൽ കടുത്ത ഭക്ഷ്യക്ഷാമത്തിനും കുടിയൊഴിപ്പിക്കലിനും കാരണമായിട്ടുണ്ട്. രാജ്യത്ത് ഏകദേശം രണ്ട് കോടി ആളുകൾ പ്രതിസന്ധി നിലയിലുള്ള ഭക്ഷ്യക്ഷാമം നേരിടുന്നതായാണ് റിപ്പോർട്ട്.
Summary: At least 60 small-scale miners were killed after the Al-Zaraa gold mine in Sudan’s West Kordofan collapsed. Several others are feared trapped underground, while rescue efforts have been hampered by the lack of heavy machinery.
