വസ്ത്രം റിട്ടേൺ ചെയ്യാൻ കസ്റ്റമർ കെയറിൽ വിളിച്ചു; 54കാരന് നഷ്ടമായത് 5.5 ലക്ഷം രൂപ | Online scam Kerala

കണ്ണൂർ: ഓൺലൈനായി വാങ്ങിയ 300 രൂപ വിലയുള്ള വസ്ത്രം റിട്ടേൺ ചെയ്യുന്നതിനായി കസ്റ്റമർ കെയർ നമ്പറിൽ ബന്ധപ്പെട്ട 54കാരന് നഷ്ടമായത് അഞ്ചര ലക്ഷം രൂപ (Online scam Kerala). കണ്ണൂർ തളിപ്പറമ്പ് സ്വദേശിയാണ് ഓൺലൈൻ തട്ടിപ്പിനിരയായത്.

വസ്ത്രം തിരികെ നൽകുന്നതിനായി ഇന്റർനെറ്റിൽ തിരഞ്ഞാണ് ഇയാൾ കസ്റ്റമർ കെയർ നമ്പർ കണ്ടെത്തിയത്. എന്നാൽ ഓൺലൈനിൽ കസ്റ്റമർ കെയർ എന്ന പേരിൽ നൽകിയിരുന്നത് തട്ടിപ്പ് സംഘത്തിന്റെ നമ്പറായിരുന്നുവെന്നാണ് പൊലീസ് പറയുന്നത്.

ഫോണിൽ ബന്ധപ്പെട്ടതോടെ ബാങ്ക് അക്കൗണ്ട് വിവരങ്ങൾ ഉൾപ്പെടെയുള്ള രഹസ്യ വിവരങ്ങൾ തട്ടിപ്പ് സംഘം കൈക്കലാക്കിയെന്നാണ് വിവരം. തുടർന്ന് പലതവണകളായി ഇയാളുടെ ബാങ്ക് അക്കൗണ്ടിൽനിന്ന് ആകെ അഞ്ചര ലക്ഷം രൂപ പിൻവലിക്കുകയായിരുന്നു.

സംഭവത്തിൽ തളിപ്പറമ്പ് പൊലീസ് കേസെടുത്ത് അന്വേഷണം ആരംഭിച്ചു. ഓൺലൈൻ സേവനങ്ങളുടെ കസ്റ്റമർ കെയർ നമ്പറുകൾ ഔദ്യോഗിക വെബ്സൈറ്റുകളിൽനിന്ന് മാത്രം പരിശോധിച്ച് ഉപയോഗിക്കണമെന്ന് പൊലീസ് മുന്നറിയിപ്പ് നൽകി. ബാങ്ക് അക്കൗണ്ട് വിവരങ്ങൾ, ഒടിപി, പാസ്‌വേഡ് തുടങ്ങിയ രഹസ്യ വിവരങ്ങൾ മറ്റാരുമായും പങ്കിടരുതെന്നും പൊലീസ് നിർദേശിച്ചു.

Story Summary:
A 54-year-old man from Taliparamba lost ₹5.5 lakh after contacting a fraudulent customer care number to return a ₹300 garment purchased online. Police have registered a case and warned people to use customer care numbers only from official websites.