മാസപ്പടി കേസ്: അന്വേഷണത്തിന് നിയമോപദേശം; മുഖ്യമന്ത്രിയുമായി ആലോചിച്ച് തീരുമാനമെന്ന് രമേശ് ചെന്നിത്തല | Masappadi case legal opinion
Current: മലയാളം
തിരുവനന്തപുരം: മാസപ്പടി കേസിൽ എൻഫോഴ്സ്മെന്റ് ഡയറക്ടറേറ്റിന്റെ (ഇഡി) ശുപാർശയുടെ അടിസ്ഥാനത്തിൽ അന്വേഷണം നടത്താമെന്ന് അഡ്വക്കറ്റ് ജനറലിന്റെ നിയമോപദേശം ലഭിച്ചതായി ആഭ്യന്തരമന്ത്രി രമേശ് ചെന്നിത്തല. നിയമോപദേശം പരിശോധിച്ച ശേഷം മുഖ്യമന്ത്രി വി.ഡി. സതീശനുമായി ആലോചിച്ച് തുടർനടപടിയിൽ തീരുമാനമെടുക്കുമെന്ന് അദ്ദേഹം പറഞ്ഞു. (Masappadi case legal opinion)
മുൻ മുഖ്യമന്ത്രി പിണറായി വിജയൻ, മകൾ ടി. വീണ, മുൻ മന്ത്രി മുഹമ്മദ് റിയാസ് എന്നിവർക്കെതിരെ കേസെടുത്ത് അന്വേഷണം നടത്തണമെന്ന ഇഡിയുടെ ശുപാർശയുമായി ബന്ധപ്പെട്ടാണ് നിയമോപദേശം തേടിയത്. ഇഡി നൽകിയ കത്തിൽ മതിയായ തെളിവുണ്ടെങ്കിൽ എഫ്ഐആർ രജിസ്റ്റർ ചെയ്ത് അന്വേഷണം നടത്താമെന്നാണ് നിയമോപദേശത്തിന്റെ ഉള്ളടക്കമെന്നാണ് റിപ്പോർട്ടുകൾ. ഏത് തരത്തിലുള്ള അന്വേഷണമാണ് നടത്തേണ്ടതെന്ന് സർക്കാരിന് തീരുമാനിക്കാമെന്നും നിയമോപദേശത്തിൽ വ്യക്തമാക്കിയതായി റിപ്പോർട്ടുകളുണ്ട്.
സംസ്ഥാന പൊലീസ് മേധാവിയുടെ അഭിപ്രായം കൂടി പരിഗണിച്ചാണ് അഡ്വക്കറ്റ് ജനറൽ നിയമോപദേശം നൽകിയതെന്നാണ് വിവരം. സുപ്രീം കോടതി വിധികൾ ഉൾപ്പെടെയുള്ള നിയമപരമായ കാര്യങ്ങൾ പരിശോധിച്ച ശേഷമാണ് ഉപദേശം നൽകിയതെന്നും റിപ്പോർട്ടുകൾ പറയുന്നു. അന്വേഷണത്തിന്റെ സ്വഭാവം സംബന്ധിച്ച് സർക്കാരിൽ ഉന്നതതല ചർച്ചകൾ ആരംഭിച്ചിട്ടുണ്ട്. ഇഡിയുടെ കത്തിന്റെ അടിസ്ഥാനത്തിലാണ് നിയമോപദേശം തേടിയതെന്ന് രമേശ് ചെന്നിത്തല പറഞ്ഞു. എസ്ഐടി സ്വതന്ത്രമായി പ്രവർത്തിക്കുമെന്നും അദ്ദേഹം വ്യക്തമാക്കി. അതേസമയം, അന്വേഷണത്തിന് വിജിലൻസിനെ നിയോഗിക്കണമോ മറ്റേതെങ്കിലും അന്വേഷണ സംവിധാനം വേണമോയെന്ന കാര്യത്തിൽ സർക്കാർ അന്തിമ തീരുമാനം എടുത്തിട്ടില്ല.
മാസപ്പടി കേസിൽ ഇഡി സംസ്ഥാന പൊലീസ് മേധാവിക്ക് നൽകിയ ശുപാർശയിലാണ് അഴിമതി നിരോധന നിയമപ്രകാരം കേസെടുത്ത് അന്വേഷണം നടത്തണമെന്ന് ആവശ്യപ്പെട്ടിരുന്നത്. നിയമോപദേശം ലഭിച്ചതോടെ സർക്കാർ ഇനി സ്വീകരിക്കുന്ന നടപടിയാണ് കേസിൽ നിർണായകമാകുക.
Summary: Kerala’s Advocate General has reportedly advised that an investigation can be conducted based on the ED’s recommendation in the CMRL-Exalogic monthly payment case. Home Minister Ramesh Chennithala said the government will examine the legal opinion and take a decision after consulting Chief Minister V.D. Satheesan.
