റിയാദിൽ എയർ റെയ്ഡ് മുന്നറിയിപ്പ്; പിന്നാലെ സ്ഫോടന ശബ്ദങ്ങൾ, അരമണിക്കൂറിന് ശേഷം ജാഗ്രതാ നിർദേശം പിൻവലിച്ചു | Riyadh air raid alert

റിയാദ്: സൗദി അറേബ്യയുടെ തലസ്ഥാനമായ റിയാദിൽ ശനിയാഴ്ച പുലർച്ചെ വ്യോമാക്രമണ ഭീഷണി മുന്നറിയിപ്പ്. പ്രാദേശിക സമയം പുലർച്ചെ മൂന്ന് മണിയോടെയാണ് റിയാദ് നിവാസികളുടെ മൊബൈൽ ഫോണുകളിൽ മുന്നറിയിപ്പ് സന്ദേശമെത്തിയത്. ജനങ്ങൾ വീടുകൾക്കുള്ളിൽ തന്നെ കഴിയണമെന്നും ജാഗ്രത പാലിക്കണമെന്നും അധികൃതർ നിർദേശിച്ചു. (Riyadh air raid alert)

മുന്നറിയിപ്പ് ലഭിച്ചതിന് പിന്നാലെ റിയാദിൽ സ്ഫോടന ശബ്ദങ്ങൾ കേട്ടതായി എഎഫ്പിയും റിയാദിലെ റോയിട്ടേഴ്സ് ലേഖകനും റിപ്പോർട്ട് ചെയ്തു. രണ്ട് ശക്തമായ ശബ്ദങ്ങൾ കേട്ടതായാണ് റിപ്പോർട്ടുകൾ. എന്നാൽ സ്ഫോടനങ്ങളുടെ കാരണം എന്താണെന്നോ ഏതെങ്കിലും മിസൈലോ ഡ്രോണോ നഗരത്തെ ലക്ഷ്യമിട്ടിരുന്നോയെന്നോ സൗദി അധികൃതർ സ്ഥിരീകരിച്ചിട്ടില്ല. റിയാദിലും സമീപ നഗരമായ അൽ ഖർജിലും പിന്നീട് സിവിൽ ഡിഫൻസ് ജാഗ്രതാ നിർദേശം പിൻവലിച്ച് അപകടനില കഴിഞ്ഞതായി അറിയിച്ചു. യെമനിലെ ഹൂതി സേനയും സൗദി അറേബ്യയും തമ്മിലുള്ള സംഘർഷം രൂക്ഷമായ സാഹചര്യത്തിലാണ് റിയാദിൽ മുന്നറിയിപ്പ് വന്നത്. ജൂലൈയിൽ യെമനിലെ പോരാട്ടം വീണ്ടും ശക്തമായതിന് ശേഷം തലസ്ഥാനത്ത് ഇത്തരമൊരു മുന്നറിയിപ്പ് ഉണ്ടാകുന്നത് ആദ്യമായാണ്. കഴിഞ്ഞ ദിവസങ്ങളിൽ ജിദ്ദ, തായിഫ്, ഖമീസ് മുഷൈത്ത്, അൽ ഉല തുടങ്ങിയ പ്രദേശങ്ങളിലും സൗദി അധികൃതർ സുരക്ഷാ മുന്നറിയിപ്പുകൾ നൽകിയിരുന്നു. ഇതിനിടെ, സൗദി അറേബ്യ ലക്ഷ്യമിട്ട് ഡ്രോണുകളും മിസൈലുകളും പ്രയോഗിച്ചതായി ഹൂതികൾ അവകാശപ്പെട്ടിട്ടുണ്ട്. എന്നാൽ റിയാദിലെ പുലർച്ചെയുണ്ടായ സ്ഫോടനങ്ങളുമായി ഈ ആക്രമണങ്ങൾക്ക് നേരിട്ടുള്ള ബന്ധമുണ്ടെന്ന് ഇതുവരെ സൗദി അധികൃതർ സ്ഥിരീകരിച്ചിട്ടില്ല. വ്യാഴാഴ്ച തായിഫിൽ ഹൂതി ഡ്രോൺ തടഞ്ഞതിന് പിന്നാലെ വീണ അവശിഷ്ടങ്ങളിൽ ഒരാൾ കൊല്ലപ്പെടുകയും രണ്ട് പേർക്ക് പരിക്കേൽക്കുകയും ചെയ്തിരുന്നു.

യെമനിലെ ഹൂതികളുടെ മുന്നേറ്റവും ചെങ്കടൽ മേഖലയിലെ സംഘർഷവും ഇതിനകം പ്രാദേശിക സുരക്ഷയെയും കപ്പൽ ഗതാഗതത്തെയും ബാധിച്ചിട്ടുണ്ട്. മൊഖ ഉൾപ്പെടെയുള്ള യെമന്റെ പടിഞ്ഞാറൻ തീരമേഖലയിൽ ഹൂതികളുടെ നിയന്ത്രണം ശക്തമായതോടെ ബാബ് അൽ മന്ദബ് കടലിടുക്കിന്റെ സുരക്ഷയെക്കുറിച്ചും ആശങ്ക ഉയർന്നിട്ടുണ്ട്. സംഘർഷം തുടരുന്നതിനിടെ സൗദി നഗരങ്ങളിലേക്കുള്ള ആക്രമണ ഭീഷണി വ്യാപിക്കുന്നത് മേഖലയിലെ സ്ഥിതിഗതികൾ കൂടുതൽ സങ്കീർണമാക്കുകയാണ്.

Summary: Saudi Arabia issued an aerial threat alert in Riyadh early Saturday, advising residents to remain indoors. Explosions were heard shortly after the warning, but Saudi authorities have not confirmed their cause and later declared that the danger had passed.