മലയോര മേഖലകളിലെ കർഷകർക്ക് ആശ്വാസം. പശ്ചിമഘട്ട പരിസ്ഥിതിലോല പട്ടികയിൽ നിന്ന് 131 വില്ലേജുകളിലെ ജനവാസ-കാർഷിക മേഖലകളെ ഒഴിവാക്കാൻ നടപടി തുടങ്ങി. കേന്ദ്രത്തിന് ഉടൻ മറുപടി നൽകുമെന്ന് കൃഷിമന്ത്രി ടി. സിദ്ദീഖ്. 9,993 ചതുരശ്ര കിലോമീറ്റർ ഒഴിവാക്കാൻ നീക്കം. കാലാവസ്ഥാ വ്യതിയാനത്തെ നേരിടാൻ പ്രത്യേക കാർഷിക റോഡ് മാപ്പ് തയ്യാറാക്കുന്നു. കൃഷിഭൂമിയെയും പാർപ്പിടങ്ങളെയും ഇ.എസ്.എ പരിധിയിൽ ഉൾപ്പെടുത്തി ഉപജീവനത്തിന് തടസ്സമുണ്ടാക്കാൻ അനുവദിക്കില്ലെന്ന ഉറച്ച നിലപാടിൽ സർക്കാർ
Current: മലയാളം
തിരുവനന്തപുരം: സംസ്ഥാനത്തെ മലയോര മേഖലകളിലെ കർഷകർക്ക് വലിയ ആശ്വാസം പകർന്നു കൊണ്ട്, 131 വില്ലേജുകളിലെ ജനവാസ മേഖലകളെയും കാർഷിക ഭൂമികളെയും പശ്ചിമഘട്ട പരിസ്ഥിതിലോല പ്രദേശ (ഇ.എസ്.എ) പട്ടികയിൽ നിന്ന് പൂർണ്ണമായും ഒഴിവാക്കുന്നതിനുള്ള ഔദ്യോഗിക നടപടികൾ സർക്കാർ ആരംഭിച്ചതായി കൃഷിമന്ത്രി ടി. സിദ്ദീഖ് വ്യക്തമാക്കി.
കേന്ദ്ര പരിസ്ഥിതി മന്ത്രാലയം പുറപ്പെടുവിച്ച ഏഴാമത് ഇ.എസ്.എ കരട് വിജ്ഞാപനത്തിന്റെ പശ്ചാത്തലത്തിലാണ് സർക്കാരിന്റെ ഈ നിർണ്ണായക നീക്കം. ആകെ 9,993.7 ചതുരശ്ര കിലോമീറ്റർ വിസ്തൃതിയുള്ള ജനവാസ കേന്ദ്രങ്ങളും കൃഷിയിടങ്ങളുമാണ് പരിസ്ഥിതിലോല പരിധിയിൽ നിന്നും ഒഴിവാക്കിക്കിട്ടാൻ സംസ്ഥാനം ആവശ്യപ്പെടുന്നത്.
ജൂലൈയിൽ കേന്ദ്രം പുറത്തിറക്കിയ കരട് വിജ്ഞാപനത്തിന്മേൽ സംസ്ഥാനത്തിന്റെ അന്തിമ നിർദ്ദേശങ്ങളും ആക്ഷേപങ്ങളും സമർപ്പിക്കാനുള്ള സമയപരിധി ഈ മാസം അവസാനിക്കാനിരിക്കെയാണ് കേരളം സമഗ്രമായ റിപ്പോർട്ട് കേന്ദ്രത്തിന് സമർപ്പിക്കുന്നത്.
വിഷയത്തിൽ പരിസ്ഥിതി, കൃഷി, റവന്യൂ മന്ത്രിമാർ ഉൾപ്പെടെയുള്ളവരുടെ നേതൃത്വത്തിൽ ഉന്നതതല ചർച്ചകൾ പുരോഗമിക്കുകയാണെന്ന് മന്ത്രി അറിയിച്ചു.
പശ്ചിമഘട്ട പരിസ്ഥിതി വിദഗ്ദ്ധ സമിതിയുമായി നടത്തിയ യോഗത്തിൽ മലയോര കർഷകരുടെ ആശങ്കകളും ജീവിതസാഹചര്യങ്ങളും സർക്കാരിന്റെ ഭാഗത്തുനിന്ന് കൃത്യമായി ബോധ്യപ്പെടുത്തിയിട്ടുണ്ട്.
ഒരു കാരണവശാലും കർഷകരുടെ കൃഷിഭൂമിയെയും സാധാരണക്കാരുടെ പാർപ്പിടങ്ങളെയും ഇ.എസ്.എ പരിധിയിൽ ഉൾപ്പെടുത്തി ഉപജീവനത്തിന് തടസ്സമുണ്ടാക്കാൻ അനുവദിക്കില്ലെന്നാണ് സർക്കാരിന്റെ ഉറച്ച നിലപാട്.
ഇതോടൊപ്പം, സംസ്ഥാനത്ത് കാലാവസ്ഥാ വ്യതിയാനം മൂലം കാർഷിക മേഖല നേരിടുന്ന കടുത്ത പ്രതിസന്ധികൾ ദക്ഷിണേന്ത്യൻ കൃഷിമന്ത്രിമാരുടെ സംയുക്ത യോഗത്തിൽ ശക്തമായി ഉന്നയിച്ചിട്ടുണ്ടെന്നും മന്ത്രി വ്യക്തമാക്കി.
ആവർത്തിച്ചുണ്ടാകുന്ന പ്രകൃതിക്ഷോഭങ്ങളെയും അപ്രതീക്ഷിത കാലാവസ്ഥാ വ്യതിയാനങ്ങളെയും അതിജീവിക്കാൻ ശേഷിയുള്ള ‘കാലാവസ്ഥാ പ്രതിരോധ’ കൃഷിരീതികളും പുതിയ വിളയിനങ്ങളും വികസിപ്പിച്ചെടുക്കാനുള്ള വിപുലമായ പദ്ധതികൾക്കാണ് കൃഷിവകുപ്പ് രൂപം നൽകുന്നത്.
ഇതിനായി കേരള കാർഷിക സർവ്വകലാശാല, അമൃത സർവ്വകലാശാല എന്നിവയുടെ അക്കാദമിക്-ഗവേഷണ സഹകരണത്തോടെയുള്ള പ്രവർത്തനങ്ങൾ വേഗത്തിൽ നടക്കുകയാണ്.
ജലസേചന വകുപ്പ്, സംസ്ഥാന ദുരന്തനിവാരണ അതോറിറ്റി എന്നിവയുമായി കൈകോർത്ത് ദീർഘകാല കാലാവസ്ഥാ പ്രതിരോധ റോഡ് മാപ്പും തയ്യാറാക്കുന്നുണ്ട്.
കാലാവസ്ഥാ വ്യതിയാനം മൂലമുണ്ടാകുന്ന അടിയന്തര സാഹചര്യങ്ങൾ, അപ്രതീക്ഷിത വിളനാശം എന്നിവ ശാസ്ത്രീയമായി മറികടക്കുന്നതിനുള്ള മുൻകരുതൽ പ്രവർത്തനങ്ങൾക്കായി കേന്ദ്രസർക്കാരിൽ നിന്ന് പ്രത്യേക സാമ്പത്തിക പാക്കേജ് ലഭ്യമാക്കാൻ ആവശ്യപ്പെട്ടിട്ടുണ്ടെന്നും മന്ത്രി ടി. സിദ്ദീഖ് കൂട്ടിച്ചേർത്തു.
