തല മുറിഞ്ഞാൽ ശ്രദ്ധിക്കാം ഈ കാര്യങ്ങൾ

തലയിലുണ്ടാകുന്ന മുറിവുകളിൽ നിന്ന് ധാരാളമായി രക്തസ്രാവം ഉണ്ടാകാം. കാരണം തലയോട്ടിയിലെ ചർമ്മത്തിൽ രക്തക്കുഴലുകൾ വളരെ കൂടുതലാണ്. പെട്ടെന്ന് പരിഭ്രാന്തരാകാതെ താഴെ പറയുന്ന പ്രഥമശുശ്രൂഷകൾ ചെയ്യുക.

രക്തസ്രാവം നിർത്തുക: പരിക്കേറ്റ വ്യക്തിയെ ശാന്തമായി ഇരുത്തുകയോ കിടത്തുകയോ ചെയ്യുക. വൃത്തിയുള്ള ഒരു കോട്ടൺ തുണിയോ പഞ്ഞിയോ ഉപയോഗിച്ച് മുറിവുള്ള ഭാഗത്ത് 10 മുതൽ 15 മിനിറ്റ് വരെ തുടർച്ചയായി അമർത്തിപ്പിടിക്കുക. ഇടയ്ക്കിടെ കൈയെടുത്ത് രക്തം നിൽക്കുന്നുണ്ടോ എന്ന് നോക്കരുത്. അമർത്തിപ്പിടിച്ച തുണിയിൽ രക്തം പടർന്നാൽ അത് മാറ്റരുത്, അതിന് മുകളിലേക്ക് മറ്റൊരു തുണി കൂടി വച്ച് വീണ്ടും അമർത്തുക. രക്തപ്രവാഹം കുറയ്ക്കാൻ തല അല്പം ഉയർത്തി വെക്കാവുന്നതാണ്.

മുറിവ് വൃത്തിയാക്കൽ: രക്തം നിന്നതിനു ശേഷം മൃദുവായ സോപ്പും വെള്ളവും ഉപയോഗിച്ച് മുറിവും ചുറ്റുമുള്ള ഭാഗവും പതുക്കെ കഴുകുക. മുറിവിൽ ഒട്ടിപ്പിടിച്ചിരിക്കുന്ന വലിയ അഴുക്കുകളോ വസ്‌തുക്കളോ ഉണ്ടെങ്കിൽ അത് സ്വയം വലിച്ച് പുറത്തെടുക്കാൻ ശ്രമിക്കരുത് (ഇത് രക്തസ്രാവം കൂട്ടിയേക്കാം).

 വീക്കം കുറയ്ക്കാൻ: തലയിൽ വീക്കമോ മുഴയോ വരുന്നത് തടയാൻ ഒരു തുണിയിൽ പൊതിഞ്ഞ ഐസ് ക്യൂബുകളോ തണുത്ത പായ്ക്കോ 20 മിനിറ്റ് നേരം വയ്ക്കുക. ഐസ് നേരിട്ട് ചർമ്മത്തിൽ വയ്ക്കരുത്.