ഒമാൻ ഇൻവിറ്റേഷൻ ടൂർണ്ണമെന്റിൽ കേരളത്തിന് ആദ്യ തോൽവി: ഒമാൻ്റെ വിജയം 15 റൺസിന്

ഒമാൻ ഇൻവിറ്റേഷൻ ടൂർണ്ണമെന്റിൽ ആതിഥേയരായ ഒമാനോട് 15 റൺസിൻ്റെ തോൽവി വഴങ്ങി കേരളം. ടൂർണ്ണമെന്റിൽ കേരളത്തിന്റെ ആദ്യ തോൽവിയാണിത്. ആദ്യം ബാറ്റ് ചെയ്ത ഒമാൻ 48.4 ഓവറിൽ 240 റൺസിന് ഓൾ ഔട്ടായി. മറുപടി ബാറ്റിങ്ങിന് ഇറങ്ങിയ കേരളത്തിന്റെ ഇന്നിങ്സ് 48.3 ഓവറിൽ 225 റൺസിന് അവസാനിച്ചു.

ഒമാൻ 48.4 ഓവറിൽ 240/10, കേരളം 48.3 ഓവറിൽ 225/10

ടോസ് നേടി ബാറ്റിങ് തെരഞ്ഞെടുത്ത ഒമാൻ തുടക്കത്തിലെ തകർച്ചയിൽ നിന്നും ശക്തമായി തിരിച്ചു വന്നാണ് ഭേദപ്പെട്ട സ്കോർ പടുത്തുയർത്തിയത്. മുൻനിര ബാറ്റർമാ‍ർ പരാജയപ്പെട്ടതോടെ ഒരു ഘട്ടത്തിൽ അഞ്ച് വിക്കറ്റിന് 78 റൺസെന്ന നിലയിലായിരുന്നു ഒമാൻ.

കേരളത്തിന് വേണ്ടി ശരത്ചന്ദ്രൻ മൂന്നും അഖിൽ സ്കറിയ, അബ്ദുൾ ബാസിദ്, വിഘ്നേഷ് പുത്തൂർ എന്നിവർ രണ്ട് വിക്കറ്റ് വീതവും വീഴ്ത്തി.

മറുപടി ബാറ്റിങ്ങിന് ഇറങ്ങിയ കേരളത്തിന് വേണ്ടി രോഹൻ നായരും അബ്ദുൾ ബാസിദും മാത്രമാണ് മികച്ച പ്രകടനം കാഴ്ച വച്ചത്. ഓപ്പണർമാരായ ഗോവിന്ദ് ദേവ് പൈ 25ഉം കൃഷ്ണപ്രസാദ് 16ഉം റൺസ് നേടി മടങ്ങി. അഖിൽ സ്കറിയ 24 റൺസെടുത്തപ്പോൾ സിജോമോൻ ജോസഫ് ഒൻപത് റൺസിനും നിഖിൽ തോട്ടത്ത് പൂജ്യത്തിനും പുറത്തായി.

രോഹൻ നായരും അബ്ദുൾ ബാസിദും ചേർന്നുള്ള ആറാം വിക്കറ്റ് കൂട്ടുകെട്ട് കേരളത്തിന് പ്രതീക്ഷ നൽകി. ഇരുവരും ചേർന്ന് 64 റൺസ് കൂട്ടിച്ചേർത്തു. എന്നാൽ 41 റൺസെടുത്ത അബ്ദുൾ ബാസിദ് പുറത്തായത് കേരളത്തിന് തിരിച്ചടിയായി. ഒടുവിൽ 93 റൺസെടുത്ത രോഹൻ നായരും മടങ്ങിയതോടെ കേരളത്തിന്റെ പ്രതീക്ഷകൾ അവസാനിച്ചു. 48.3 ഓവറിൽ 225 റൺസിന് കേരളം ഓൾ ഔട്ടായി.  ഒമാന് വേണ്ടി ഷക്കീൽ അഹ്മദ്, നദീം ഖാൻ, മുജിബുർ അലി എന്നിവർ രണ്ട് വിക്കറ്റ് വീതം വീഴ്ത്തി.