ദാമ്പത്യപ്രശ്നം പരിഹരിക്കാനെത്തിയ യുവതിയെ പീഡിപ്പിച്ച വ്യാജസിദ്ധൻ അറസ്റ്റിൽ. പിടിയിലായത് പുതുപ്പാടി സ്വദേശി അൻവർ സാദത്ത്. ഭർത്താവിന് തേങ്ങ നൽകി പുറത്തുനിർത്തി മുറിക്കുള്ളിൽ ക്രൂരപീഡനം. പോക്സോ അടക്കം മുൻപും നിരവധി ക്രിമിനൽ കേസുകളിൽ പ്രതിയെന്ന് പോലീസ്. പ്രതി റിമാൻഡിൽ

കോഴിക്കോട്: കുടുംബത്തിലെ ദാമ്പത്യപ്രശ്നങ്ങൾ പരിഹരിക്കാമെന്ന് വിശ്വസിപ്പിച്ച് ചികിത്സയ്ക്കെത്തിയ യുവതിയെ ക്രൂരമായി പീഡിപ്പിച്ച വ്യാജസിദ്ധൻ പോലീസിന്റെ പിടിയിലായി. പുതുപ്പാടി സ്വദേശിയായ അൻവർ സാദത്താണ് താമരശ്ശേരി പോലീസിന്റെ പിടിയിലായത്.

രണ്ടാഴ്ച മുൻപാണ് കേസിനാസ്പദമായ സംഭവം നടന്നത്. കുടുംബപരമായ പ്രശ്നങ്ങൾ പരിഹരിക്കാൻ ഈങ്ങാപ്പുഴയിൽ അത്ഭുത സിദ്ധിയുള്ള ചികിത്സകനുണ്ടെന്ന് കേട്ടറിഞ്ഞ് യുവതിയുടെ ഭർത്താവ് തന്നെയാണ് ഇവരെ അൻവർ സാദത്തിന്റെ ഈങ്ങാപ്പുഴയിലെ വ്യാജ ചികിത്സാ കേന്ദ്രത്തിൽ എത്തിച്ചത്.

ചികിത്സയ്ക്കായി കേന്ദ്രത്തിലെത്തിയ ഭർത്താവിന്റെ കയ്യിൽ ഒരു തേങ്ങ നൽകിയ അൻവർ സാദത്ത്, ചികിത്സ തീരുന്നതുവരെ മുറിക്ക് പുറത്തേക്ക് നോക്കി നിന്ന് ചില പ്രത്യേക മന്ത്രങ്ങൾ ജപിക്കണമെന്ന് കർശനമായി ആവശ്യപ്പെടുകയായിരുന്നു.

ഭർത്താവ് മന്ത്രം ജപിച്ച് പുറത്തുനിന്ന തക്കത്തിന്, യുവതിയെ മുറിയുടെ മറ്റൊരു ഭാഗത്തേക്ക് കൂട്ടിക്കൊണ്ടുപോയി വ്യാജസിദ്ധൻ ക്രൂരമായി പീഡിപ്പിക്കുകയായിരുന്നു. കേന്ദ്രത്തിൽ നിന്ന് മടങ്ങി വീട്ടിലെത്തിയ ശേഷമാണ് യുവതി തനിക്കുണ്ടായ കൊടുംക്രൂരതയെക്കുറിച്ച് ഭർത്താവിനോട് വെളിപ്പെടുത്തിയത്.

ഇതോടെ കുടുംബം താമരശ്ശേരി പോലീസിൽ നേരിട്ടെത്തി രേഖാമൂലം പരാതി നൽകുകയായിരുന്നു. പരാതി ലഭിച്ചയുടൻ അന്വേഷണം ആരംഭിച്ച പോലീസ് സംഘം ഒളിവിൽ പോകാൻ ശ്രമിച്ച പ്രതിയെ അതിവേഗം പിടികൂടി.

ഇയാൾ മുൻപും സമാനമായ രീതിയിൽ സ്ത്രീകളെ പീഡിപ്പിച്ച കേസുകളിലും പോക്സോ കേസുകളിലും പ്രതിയാണെന്ന് താമരശ്ശേരി ഡി.വൈ.എസ്.പി വ്യക്തമാക്കി. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.