പൂജാമുറിയിലെ സ്വർണ്ണവും പണവും കാണിച്ച് സമൂഹമാധ്യമങ്ങളിൽ വീഡിയോ. തൊട്ടുപിന്നാലെ യൂട്യൂബർ ദമ്പതികളുടെ ആഡംബര വീട്ടിൽ വൻ കവർച്ച. പിൻവാതിൽ തകർത്ത് അകത്തുകടന്ന മോഷ്ടാക്കൾ 118 പവൻ സ്വർണ്ണവും പണവും കവർന്നു. സംഭവം നാഗർകോവിലിന് സമീപം വി.ഐ.പി കോളനിയിൽ. സി.സി.ടി.വി ദൃശ്യങ്ങൾ കേന്ദ്രീകരിച്ച് പോലീസ് അന്വേഷണം
Current: മലയാളം
തിരുവനന്തപുരം: വീട്ടിൽ സൂക്ഷിച്ചിരുന്ന വൻതോതിലുള്ള പണവും സ്വർണ്ണാഭരണങ്ങളും പ്രദർശിപ്പിച്ച് സമൂഹമാധ്യമങ്ങളിൽ വീഡിയോ പങ്കുവെച്ചതിന് തൊട്ടുപിന്നാലെ പ്രശസ്ത യൂട്യൂബർ ദമ്പതികളുടെ ആഡംബര വസതിയിൽ വൻ കവർച്ച.
നാഗർകോവിലിന് സമീപം തമ്മട്ടുകോണം വി.ഐ.പി ഗാർഡനിൽ താമസിക്കുന്ന പ്രമുഖ യൂട്യൂബർമാരായ വിനോദ് കുമാർ–മധുമിത ദമ്പതികളുടെ വീട് കുത്തിത്തുറന്നാണ് 118 പവൻ സ്വർണ്ണാഭരണങ്ങളും പണവും മോഷ്ടാക്കൾ അപഹരിച്ചത്.
മധുമിത കഴിഞ്ഞദിവസം സ്വന്തം വീടിന്റെ പൂജാമുറിയിൽ വെച്ചിരുന്ന സ്വർണ്ണശേഖരവും പണവും കാണിച്ച് ചിത്രീകരിച്ച വീഡിയോ യൂട്യൂബിലും ഇൻസ്റ്റഗ്രാമിലും അടക്കം സമൂഹമാധ്യമങ്ങളിൽ വലിയ തോതിൽ പങ്കുവെച്ചിരുന്നു.
വീഡിയോ കണ്ട് ആസൂത്രിതമായി എത്തിയ സംഘമാണ് അതീവ സുരക്ഷാ മേഖലയിലുള്ള വീട്ടിൽ അതിവിദഗ്ദ്ധമായി മോഷണം നടത്തിയതെന്നാണ് പ്രാഥമിക നിഗമനം.
സി.സി.ടി.വി ക്യാമറകൾ ഉൾപ്പെടെയുള്ള അത്യാധുനിക സുരക്ഷാ സംവിധാനങ്ങൾ ഉണ്ടായിരുന്നിട്ടും, വീടിന്റെ പിൻവാതിൽ ആയുധങ്ങൾ ഉപയോഗിച്ച് തകർത്താണ് കവർച്ചാസംഘം അകത്തേക്ക് കടന്നത്.
അലമാരകളിലും പൂജാമുറിയിലുമായി സൂക്ഷിച്ചിരുന്ന 118 പവൻ സ്വർണ്ണാഭരണങ്ങളും വൻതുകയുമാണ് കവർന്നതെന്ന് കുടുംബം പോലീസിൽ നൽകിയ പരാതിയിൽ വ്യക്തമാക്കുന്നു.
യൂട്യൂബർമാരുടെ പരാതിയിൽ രാജാക്കമംഗലം പോലീസ് കേസെടുത്ത് സമഗ്രമായ അന്വേഷണം ആരംഭിച്ചു. പരിസരത്തെ സി.സി.ടി.വി ക്യാമറകളിൽ പതിഞ്ഞ ദൃശ്യങ്ങളും സമീപപ്രദേശങ്ങളിൽ പ്രവർത്തിച്ച സംശയകരമായ മൊബൈൽ ഫോൺ ടവർ ലൊക്കേഷനുകളും കോളുകളും കേന്ദ്രീകരിച്ചാണ് അന്വേഷണ സംഘം നീങ്ങുന്നത്.
സമൂഹമാധ്യമങ്ങളിലൂടെ സ്വന്തം സമ്പത്തും വിലപിടിപ്പുള്ള വസ്തുക്കളും പരസ്യപ്പെടുത്തുന്നത് ക്രിമിനൽ സംഘങ്ങൾക്ക് കൃത്യമായ അവസരമൊരുക്കുമെന്നതിന് തെളിവാണ് ഈ സംഭവമെന്ന് പോലീസ് ചൂണ്ടിക്കാട്ടുന്നു. മോഷ്ടാക്കളെ കണ്ടെത്താൻ പ്രത്യേക അന്വേഷണ സംഘത്തെ നിയോഗിച്ച് ഊർജ്ജിതമായ തെരച്ചിൽ തുടരുകയാണ്.
