Skip to content
November 19, 2026
⌕

സിപിഎം വയനാട് വിപുലീകൃത ജില്ലാ കമ്മിറ്റിയിൽ നേതൃത്വത്തിനെതിരെ വിമർശനം. ജില്ലാ സെക്രട്ടറി കെ റഫീഖിന്റെ ഇടപെടലും പ്രതികരണങ്ങളും അപക്വമെന്ന് വിലയിരുത്തൽ. പാർട്ടിയുമായി അകന്നവരെയും അതൃപ്തിയുള്ളവരേയും ചേർത്തുനിർത്തണമെന്ന് നിർദേശം. സംഘടനാ സംവിധാനം ശക്തിപ്പെടുത്താൻ ജില്ലാ കമ്മിറ്റിയിലേക്ക് കൂടുതൽ ക്ഷണിതാക്കളെ ഉൾപ്പെടുത്താനും ധാരണ. തുരങ്കപാത നിർമാണം, മുണ്ടക്കൈ – ചൂരൽമല പുനരധിവാസം, ദേശീയപാതയിലെ രാത്രിയാത്രാ നിരോധനം അടക്കം മൂന്ന് പ്രമേയവും പാസാക്കി

September 29, 2026
Share this post to

കൽപ്പറ്റ: നിയമസഭാ തെരഞ്ഞെടുപ്പിലുണ്ടായ കനത്ത പരാജയത്തിന്റെ പശ്ചാത്തലത്തിൽ ചേർന്ന സി.പി.എം വയനാട് വിപുലീകൃത ജില്ലാ കമ്മിറ്റി യോഗത്തിൽ ജില്ലാ നേതൃത്വത്തിനെതിരെ കടുത്ത വിമർശനവും അസംതൃപ്തിയും ഇരമ്പി. 

താഴെത്തട്ടിൽ പാർട്ടിയുടെ സ്വാധീനം ദുർബലമായതിലും ജനകീയ അടിത്തറയിലുണ്ടായ ചോർച്ചയിലും നേതൃത്വത്തിന്റെ വീഴ്ചകൾ അക്കമിട്ട് നിരത്തിയായിരുന്നു അംഗങ്ങളുടെ പ്രതികരണം. 

തെരഞ്ഞെടുപ്പ് ഘട്ടത്തിൽ പാർട്ടിയുമായി അകൽച്ചയിലായവരെയും നേതൃത്വത്തിന്റെ സമീപനങ്ങളിൽ അതൃപ്തിയുള്ള സാധാരണ പ്രവർത്തകരെയും അനുഭാവികളെയും ഒരുമിച്ചു ചേർത്തുനിർത്തി മുന്നോട്ടുപോകണമെന്ന് യോഗത്തിൽ നേതാക്കൾ ശക്തമായി ആവശ്യപ്പെട്ടു. 

വയനാട് സിപിഎം ജില്ലാ സെക്രട്ടറിയായി കെ റഫീഖ്; പി ഗഗാറിനെ മാറ്റി | k  Rafeeque elected as Wayanad CPM district secretary

സംഘടനാ സംവിധാനം ശക്തിപ്പെടുത്തുന്നതിന്റെ ഭാഗമായി ജില്ലാ കമ്മിറ്റിയിലേക്ക് കൂടുതൽ പ്രത്യേക ക്ഷണിതാക്കളെ ഉൾപ്പെടുത്താനും ധാരണയായിട്ടുണ്ട്. ഇതിനൊപ്പം വയനാടിന്റെ വികസന, ഗതാഗത, പുനരധിവാസ വിഷയങ്ങൾ ഉയർത്തിക്കാട്ടി മൂന്ന് സുപ്രധാന പ്രമേയങ്ങളും യോഗം പാസാക്കി.


വയനാടിന്റെ സ്വപ്ന പദ്ധതിയായ കള്ളാടി – ആനക്കാംപൊയിൽ തുരങ്കപാതയുടെ നിർമ്മാണം അടിയന്തരമായി പുനരാരംഭിക്കണമെന്ന് ആവശ്യപ്പെടുന്നതാണ് പാസാക്കിയതിൽ പ്രധാന പ്രമേയം. നേരത്തെയുണ്ടായ മണ്ണിടിച്ചിലിനെ തുടർന്ന് താത്കാലികമായി നിർത്തിവെച്ച തുരങ്കപാതയുടെ തുടർപ്രവർത്തനങ്ങൾ ഇപ്പോൾ മാസങ്ങളായി അനിശ്ചിതത്വത്തിലാണെന്ന് പ്രമേയത്തിൽ ചൂണ്ടിക്കാട്ടുന്നു. 


നിർമ്മാണ തടസ്സങ്ങൾ പരിഹരിക്കുന്നതിനുള്ള ഔദ്യോഗിക അന്വേഷണ റിപ്പോർട്ട് സമർപ്പിക്കാൻ മൂന്ന് മാസം പിന്നിട്ടിട്ടും സാധിക്കാത്തത് പദ്ധതി അട്ടിമറിക്കാനുള്ള ആസൂത്രിത ശ്രമത്തിന്റെ ഭാഗമാണോ എന്ന് സംശയിക്കേണ്ടിയിരിക്കുന്നു.

മുണ്ടക്കൈ – ചൂരൽമല ഉരുൾപൊട്ടൽ ദുരന്തത്തിൽ സർവ്വതും നഷ്ടപ്പെട്ട മനുഷ്യർക്കായി പ്രഖ്യാപിച്ച ടൗൺഷിപ്പ് നിർമ്മാണം ഇഴഞ്ഞുനീങ്ങാതെ യുദ്ധകാലാടിസ്ഥാനത്തിൽ അതിവേഗം പൂർത്തിയാക്കണമെന്ന് രണ്ടാമത്തെ പ്രമേയത്തിലൂടെ ജില്ലാ കമ്മിറ്റി സർക്കാരിനോട് കർശനമായി ആവശ്യപ്പെട്ടു. 

ഇതിനുപുറമേ, വയനാടിന്റെ സമഗ്ര വ്യാപാര-ഗതാഗത മേഖലയ്ക്ക് വലിയ ശാപമായി തുടരുന്ന കോഴിക്കോട് – കൊല്ലഗൽ ദേശീയപാതയിലെയും (NH 766), മാനന്തവാടി – മൈസൂരു സംസ്ഥാന പാതയിലെയും രാത്രിയാത്രാ നിരോധനം പൂർണ്ണമായും പിൻവലിക്കാൻ സർക്കാർ തലത്തിൽ അടിയന്തര ഇടപെടലുകൾ ഉണ്ടാകണമെന്നും ആവശ്യപ്പെട്ടുകൊണ്ടാണ് സി.പി.എം വിപുലീകൃത ജില്ലാ കമ്മിറ്റി പ്രമേയം പാസാക്കിയത്.

Get more updates from Pudukad News on Google