‘ഗ്യാനേഷ് കുമാർ മോദി സർക്കാരിൻ്റെ കളിപ്പാവ, രാജിവെക്കണം’: മല്ലികാർജുൻ ഖാർഗെ | Mallikarjun Kharge

ന്യൂഡൽഹി: ചീഫ് ഇലക്ഷൻ കമ്മീഷണർ ഗ്യാനേഷ് കുമാർ നരേന്ദ്ര മോദി സർക്കാരിന്റെ കളിപ്പാവയാണെന്നും അദ്ദേഹത്തിന് ആ സ്ഥാനത്ത് തുടരാൻ യാതൊരു അവകാശവുമില്ലെന്നും കോൺഗ്രസ് അധ്യക്ഷൻ മല്ലികാർജുൻ ഖാർഗെ. ഡൽഹിയിൽ ചേർന്ന കോൺഗ്രസ് പ്രവർത്തക സമിതി (സി.ഡബ്ല്യു.സി) യോഗത്തിൽ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. വോട്ടർ പട്ടികയിലെ ക്രമക്കേടുകളുമായി ബന്ധപ്പെട്ട വാദപ്രതിവാദങ്ങൾക്കിടയിലാണ് ഖാർഗെയുടെ രൂക്ഷവിമർശനം.(Mallikarjun Kharge Calls CEC Gyanesh Kumar Puppet Of Modi Government)

വോട്ടർ പട്ടികയിലെ പ്രധാന തിരുത്തലുകളുടെ വിവരങ്ങൾ പരസ്യപ്പെടുത്തുക, പട്ടികയിൽ നിന്ന് ഒഴിവാക്കപ്പെട്ട വോട്ടർമാർക്ക് അപീൽ നൽകാൻ അവസരം നൽകുക, രാഷ്ട്രീയ പാർട്ടികൾക്ക് കൃത്യസമയത്ത് ലളിതമായ ഫോർമാറ്റിൽ വോട്ടർ വിവരങ്ങൾ ലഭ്യമാക്കുക തുടങ്ങി 5 പ്രധാന ആവശ്യങ്ങൾ ഖാർഗെ യോഗത്തിൽ മുന്നോട്ടുവെച്ചു. ഗൂഢാലോചനയിലൂടെ പാവപ്പെട്ടവരുടെയും ദളിതരുടെയും അവകാശങ്ങൾ കവർന്നെടുക്കാനാണ് സർക്കാർ ശ്രമിക്കുന്നതെന്നും, 10 വർഷം മുൻപ് നോട്ടുനിരോധനത്തിലൂടെ സാമ്പത്തിക രംഗം തകർത്ത പ്രധാനമന്ത്രി ഇപ്പോൾ ‘വോട്ടുനിരോധന’ത്തിലൂടെ ജനാധിപത്യം തകർക്കുകയാണെന്നും അദ്ദേഹം കുറ്റപ്പെടുത്തി.

പ്രധാനമന്ത്രിയുടെ സമ്മർദ്ദത്തിന് വഴങ്ങിയാണ് ഇലക്ഷൻ കമ്മീഷൻ പ്രവർത്തിക്കുന്നത്. അതിനാൽ ധാർമ്മിക ഉത്തരവാദിത്തം ഏറ്റെടുത്ത് പ്രധാനമന്ത്രി രാജിവെക്കണമെന്നും അദ്ദേഹം ആവശ്യപ്പെട്ടു. കേന്ദ്ര തെരഞ്ഞെടുപ്പ് കമ്മീഷനുള്ളിലെ ഭിന്നതകളെക്കുറിച്ചുള്ള മാധ്യമ റിപ്പോർട്ടുകളും ഖാർഗെ ചൂണ്ടിക്കാട്ടി. സ്പെഷ്യൽ ഇന്റൻസീവ് റിവിഷനുമായി ബന്ധപ്പെട്ട പല തീരുമാനങ്ങളിലും ഇലക്ഷൻ കമ്മീഷണർമാരായ സുഖ്ബീർ സിംഗ് സന്ധുവും വിവേക് ജോഷിയും വിയോജിപ്പ് പ്രകടിപ്പിച്ചിട്ടുണ്ടെന്നും, കമ്മീഷൻ പരമാധികാരത്തോടെയും സുതാര്യമായും പ്രവർത്തിക്കണമെന്നാണ് കോൺഗ്രസിന്റെ ആവശ്യധ്യമെന്നും ഖാർഗെ വ്യക്തമാക്കി.

Story Summary 

Congress President Mallikarjun Kharge labeled Chief Election Commissioner Gyanesh Kumar a puppet of the Modi government and demanded his resignation along with Prime Minister Narendra Modi’s. Addressing the CWC meeting, Kharge raised concerns over voter list deletions and demanded transparency in the electoral process.