കോഴഞ്ചേരി റിസോർട്ട് ജീവനക്കാരിയുടെ കൊലപാതകം; പ്രണയബന്ധത്തിലെ തർക്കമെന്ന് പൊലീസ്, ജിത്തുവിന്റെ അറസ്റ്റ് രേഖപ്പെടുത്തി | Kozenchery Resort Murder Case

കോഴഞ്ചേരിയിലെ റിസോർട്ട് ജീവനക്കാരി ദിൻഷ കൊല്ലപ്പെട്ട സംഭവത്തിൽ പ്രതി ജിത്തുവിന്റെ അറസ്റ്റ് പൊലീസ് രേഖപ്പെടുത്തി. പ്രണയബന്ധത്തിൽ നിന്ന് ദിൻഷ പിന്മാറിയതിനെ തുടർന്നുണ്ടായ തർക്കമാണ് കൊലപാതകത്തിലേക്ക് നയിച്ചതെന്നാണ് പൊലീസ് പറയുന്നത് (Kozenchery Resort Murder Case). കോഴഞ്ചേരി കീഴുകര സ്വദേശിയാണ് അറസ്റ്റിലായ ജിത്തു. ഒരു വർഷത്തിലേറെയായി ദിൻഷയുമായി പ്രണയത്തിലായിരുന്നുവെന്ന് ജിത്തു പൊലീസിനോട് പറഞ്ഞതായാണ് വിവരം. ഇരുവരും തമ്മിൽ അടുത്ത ബന്ധമുണ്ടായിരുന്നെന്നും പിന്നീട് ദിൻഷ ബന്ധത്തിൽ നിന്ന് പിന്മാറിയതോടെ താൻ വഞ്ചിക്കപ്പെട്ടതായി തോന്നിയെന്നും പ്രതി മൊഴി നൽകിയതായി പൊലീസ് പറയുന്നു.

ദിൻഷയുമായുള്ള ബന്ധത്തിനിടെ തനിക്ക് സാമ്പത്തിക നഷ്ടമുണ്ടായെന്നും പ്രതി പൊലീസിനോട് പറഞ്ഞതായി റിപ്പോർട്ടുകളുണ്ട്. പിന്നീട് യുവതിയെക്കുറിച്ചുള്ള സംശയം വർധിച്ചതോടെയാണ് കൊലപ്പെടുത്താൻ തീരുമാനിച്ചതെന്നാണ് ജിത്തുവിന്റെ മൊഴിയെന്നാണ് പൊലീസ് വ്യക്തമാക്കുന്നത്. മൊഴിയുടെ അടിസ്ഥാനത്തിലുള്ള കാര്യങ്ങൾ ഉൾപ്പെടെ സംഭവത്തിൽ കൂടുതൽ അന്വേഷണം തുടരുകയാണ്. കുളത്തൂപ്പുഴ സ്വദേശിയായ 21കാരിയായ ദിൻഷ മാരാമണിലെ റിസോർട്ടിൽ റിസപ്ഷനിസ്റ്റ് ട്രെയിനിയായി ജോലി ചെയ്യുകയായിരുന്നു. ഇന്നലെ ഉച്ചയ്ക്കുശേഷമാണ് റിസോർട്ടിൽ വച്ച് കൊലപാതകം നടന്നത്.

ദിൻഷയുടെ മൃതദേഹം കോട്ടയം മെഡിക്കൽ കോളേജിൽ ഇന്ന് പോസ്റ്റ്മോർട്ടം നടത്തും. കൊലപാതകത്തിലേക്ക് നയിച്ച സാഹചര്യങ്ങളും സംഭവത്തിന്റെ വിശദാംശങ്ങളും പൊലീസ് പരിശോധിച്ചുവരികയാണ്.

Summary: A 21-year-old resort employee, identified as Dinsha, was allegedly murdered in Kozenchery. Police have arrested Jithu and said a dispute following the alleged breakdown of their relationship was the suspected motive.