“എസ്എഫ്ഐ പ്രവർത്തകർക്ക് നേരെ ആസൂത്രിത ആക്രമണം”: തിരുവനന്തപുരം ഹോസ്റ്റൽ സന്ദർശിച്ച് പോലീസിനും യൂത്ത് കോൺഗ്രസിനുമെതിരെ ആഞ്ഞടിച്ച് പിണറായി വിജയൻ | University Hostel Clash Thiruvananthapuram
Current: മലയാളം
തിരുവനന്തപുരം: യൂത്ത് കോൺഗ്രസ്-എസ്എഫ്ഐ സംഘർഷത്തെ തുടർന്ന് തിരുവനന്തപുരം യൂണിവേഴ്സിറ്റി ഹോസ്റ്റൽ പരിസരത്ത് സ്ഥിതിഗതികൾ രൂക്ഷമായി (University Hostel Clash Thiruvananthapuram). സംഘർഷത്തിനിടെ പൊലീസ് ഹോസ്റ്റൽ വളപ്പിൽ പ്രവേശിച്ച് ലാത്തിച്ചാർജ് നടത്തിയതായും പാളയം ഭാഗത്ത് ഗ്രനേഡ് പ്രയോഗിച്ചതായും റിപ്പോർട്ടുണ്ട്. സംഭവത്തിൽ നിരവധി പേർക്ക് പരിക്കേറ്റതായും റിപ്പോർട്ടുകൾ പറയുന്നു.
അതേസമയം , എസ്എഫ്ഐ പ്രവർത്തകർക്ക് നേരെ പൊലീസ് ആസൂത്രിതമായി മർദനം നടത്തിയെന്നാണ് പ്രതിപക്ഷ നേതാവ് പിണറായി വിജയന്റെ ആരോപണം. യുഡിഎഫ് ഭരണകാലത്ത് യൂണിവേഴ്സിറ്റി ഹോസ്റ്റലും യൂണിവേഴ്സിറ്റി കോളേജും ലക്ഷ്യമിടുന്ന സാഹചര്യമുണ്ടാകാറുണ്ടെന്നും യൂത്ത് കോൺഗ്രസും പൊലീസും ചേർന്ന് എസ്എഫ്ഐ പ്രവർത്തകർക്ക് നേരെ അക്രമം നടത്തിയെന്നും അദ്ദേഹം ആരോപിച്ചു. യൂത്ത് കോൺഗ്രസിന്റെ ഭാഗത്തുനിന്നുണ്ടായ നടപടി അംഗീകരിക്കാനാകാത്തതാണെന്നും പിണറായി വിജയൻ പ്രതികരിച്ചു.
പരിക്കേറ്റ പ്രവർത്തകരെ ആംബുലൻസുകളിൽ ആശുപത്രികളിലേക്ക് മാറ്റി. പരിക്കേറ്റ വിദ്യാർഥികളെ ആശുപത്രിയിലേക്ക് കൊണ്ടുപോകുകയായിരുന്ന ആംബുലൻസ് യൂത്ത് കോൺഗ്രസ് പ്രവർത്തകർ തടഞ്ഞെന്ന ആരോപണവും ഉയർന്നിട്ടുണ്ട്. സംഭവത്തിൽ കൂടുതൽ വ്യക്തതയ്ക്കായി പൊലീസ് അന്വേഷണം തുടരുകയാണ്.
സംഘർഷം നിയന്ത്രിക്കുന്നതിനായി പ്രദേശത്ത് ജലപീരങ്കി ഉൾപ്പെടെയുള്ള പൊലീസ് സംവിധാനങ്ങളും വിന്യസിച്ചിട്ടുണ്ട്. ഹോസ്റ്റലിന് അകത്തേക്ക് ഒരുവിഭാഗം പ്രവർത്തകർ പ്രവേശിക്കാൻ ശ്രമിച്ചതിനെ തുടർന്ന് വീണ്ടും ഗ്രനേഡ് പ്രയോഗിച്ചതായും റിപ്പോർട്ടുണ്ട്.
അതേസമയം, സംഘർഷത്തിൽ പ്രതിഷേധിച്ച് ഡിവൈഎഫ്ഐ പ്രവർത്തകരും രംഗത്തെത്തി. എഡിജിപി പി. വിജയൻ ഉൾപ്പെടെയുള്ള ഉന്നത പൊലീസ് ഉദ്യോഗസ്ഥരും സ്ഥലത്തെത്തി സ്ഥിതിഗതികൾ വിലയിരുത്തി.
സംഭവം തലസ്ഥാനത്തെ രാഷ്ട്രീയ സംഘർഷം കൂടുതൽ രൂക്ഷമാക്കിയിരിക്കുകയാണ്. കഴിഞ്ഞ ദിവസങ്ങളിലുണ്ടായ യൂത്ത് കോൺഗ്രസ്-ബിജെപി പ്രതിഷേധങ്ങളുടെയും ഏറ്റുമുട്ടലുകളുടെയും പശ്ചാത്തലത്തിലാണ് പുതിയ സംഘർഷം.
Story Summary:
Violence escalated near the University of Kerala hostel in Thiruvananthapuram amid a Youth Congress-SFI confrontation. Police reportedly used lathicharge and grenades to disperse protesters, while Opposition Leader Pinarayi Vijayan visited the spot and alleged that SFI activists were subjected to a planned assault.
