കേരളത്തിലെ ജയിലുകളിൽ 12 ശതമാനത്തിലേറെ തടവുകാർക്ക് മാനസികാരോഗ്യ പരിചരണം. 1,201 പേർ ചികിത്സയിലെന്ന് റിപ്പോർട്ട്. ഭൂരിഭാഗവും പുരുഷന്മാർ. പ്രധാന വില്ലൻ ലഹരി ഉപയോഗം തന്നെ. ഗുരുതര പ്രശ്നങ്ങളുള്ളവരില്ലെന്ന് ജയിൽ വകുപ്പ്. കൃത്യമായ നിരീക്ഷണവും മികച്ച ചികിത്സയും ഉറപ്പാക്കുന്നുവെന്ന് ഡിജിപി എസ്. ശ്രീജിത്ത്
Current: മലയാളം
തിരുവനന്തപുരം: സംസ്ഥാനത്തെ വിവിധ ജയിലുകളിൽ കഴിയുന്ന തടവുകാരിൽ 12 ശതമാനത്തിലധികം പേർ മാനസികാരോഗ്യ പിന്തുണ തേടുന്നതായി ജയിൽ വകുപ്പിന്റെ ഔദ്യോഗിക കണക്കുകൾ.
നിലവിൽ കേരളത്തിലെ ജയിലുകളിലുള്ള 9,805 തടവുകാരിൽ 1,201 പേർ (12.24%) മാനസികാരോഗ്യ സംബന്ധമായ വൈദ്യസഹായം ലഭ്യമാക്കിയവരാണ്. ഇതിൽ 1,160 പേരും പുരുഷന്മാരാണ്.
മുൻകാല രോഗങ്ങളുടെ തുടർച്ചയായുള്ള ചികിത്സക്കോ ദൈനംദിന ജീവിതത്തിലെ ചെറിയ മാനസിക സമ്മർദ്ദങ്ങൾക്കോ മരുന്ന് കഴിക്കുന്നവരാണ് ഈ വിഭാഗത്തിൽ ഭൂരിഭാഗവും. എന്നാൽ തങ്ങൾക്കോ സഹതടവുകാർക്കോ ഭീഷണിയാകുന്ന വിധത്തിലുള്ള ഗുരുതര മാനസിക പ്രശ്നങ്ങളുള്ള ആരും തന്നെ ഇക്കൂട്ടത്തിലില്ലെന്ന് ജയിൽ അധികൃതർ വ്യക്തമാക്കി.
പൊതുസമൂഹത്തിൽ കഴിയുമ്പോൾ ലജ്ജയോ ഭയമോ കാരണം കൗൺസിലിംഗിനോ ചികിത്സക്കോ മടിക്കുന്നവർക്ക് ജയിലിൽ കൃത്യമായ പരിചരണവും പിന്തുണയും ലഭിക്കുന്നത് ആരോഗ്യകരമായ മാറ്റമാണെന്നാണ് മനഃശാസ്ത്രജ്ഞരുടെ വിലയിരുത്തൽ.
തടവുകാരുടെ മാനസിക നിലയെ തകിടം മറിക്കുന്നതിലും വിഷാദം, ഉത്കണ്ഠ തുടങ്ങിയ പ്രശ്നങ്ങൾ കൂടുതൽ സങ്കീർണ്ണമാക്കുന്നതിലും ലഹരിവസ്തുക്കളുടെ അമിത ഉപയോഗം വലിയ പങ്ക് വഹിക്കുന്നുണ്ട്.
ജയിലുകളിൽ കഴിയുന്ന മുഴുവൻ ആളുകളുടെയും ശാരീരിക-മാനസിക ആരോഗ്യം നിരന്തരം നിരീക്ഷിച്ചു വരികയാണെന്നും, അടിയന്തര വിദഗ്ദ്ധ ചികിത്സ ആവശ്യമുള്ളവരെ ഉടൻ തന്നെ ജനറൽ ആശുപത്രികളിലേക്കോ മെഡിക്കൽ കോളേജുകളിലേക്കോ മാറ്റാറുണ്ടെന്നും ജയിൽ ഡിജിപി എസ്. ശ്രീജിത്ത് വ്യക്തമാക്കി.
ജയിലിലെത്തുന്ന ഓരോ പുതിയ തടവുകാരനെയും തുടക്കത്തിൽത്തന്നെ വിശദമായ മെഡിക്കൽ പരിശോധനയ്ക്ക് വിധേയമാക്കുന്നുണ്ട്. അവർ നേരത്തെ കഴിച്ചിരുന്ന മരുന്നുകളുടെയും ആരോഗ്യ ചരിത്രത്തിന്റെയും വിവരങ്ങൾ ശേഖരിച്ച് തുടർചികിത്സ ഉറപ്പാക്കുന്നുണ്ട്.
കൃത്യമായ വൈദ്യസഹായവും കൗൺസിലിംഗും തടവുകാരുടെ ജീവിതത്തിലും മാനസിക നിലയിലും വലിയ തോതിലുള്ള ഗുണപരമായ മാറ്റങ്ങൾ സൃഷ്ടിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
