ബ്രിട്ടനിലെ വ്യോമസേനാ താവളത്തിൽ നിന്ന് ബോംബർ വിമാനങ്ങൾ തിരിച്ചുവിളിച്ച് അമേരിക്ക: ഇറാൻ ലക്ഷ്യമിടുന്നുവെന്ന മുന്നറിയിപ്പിന് പിന്നാലെ നടപടി; നീക്കം ട്രംപിന്റെ യുദ്ധതന്ത്രങ്ങളെ ബാധിക്കുമോ? | US pulls bombers from UK RAF Fairford base
ലണ്ടൻ/വാഷിംഗ്ടൺ: യുകെയിലെ റോയൽ എയർഫോഴ്സ് (RAF) ഫെയർഫോർഡ് എയർബേസിൽ നിന്ന് B-1 ബോംബർ വിമാനങ്ങൾ (B-1 Bombers) പെട്ടെന്ന് തിരിച്ചുവിളിച്ച് അമേരിക്കൻ വ്യോമസേന (US pulls bombers from UK RAF Fairford base). ബ്രിട്ടനിലെ വ്യോമസേനാ താവളത്തിന് നേരെ ഇറാൻ പിന്തുണയുള്ള ഭീകരാക്രമണ പദ്ധതികൾ നടക്കാൻ സാധ്യതയുണ്ടെന്ന രഹസ്യാന്വേഷണ വിവരങ്ങളെ തുടർന്നാണ് ട്രംപ് ഭരണകൂടത്തിന്റെ ഈ അടിയന്തര നടപടി.
എയർബേസിന് സമീപം സംശയാസ്പദമായി കണ്ട ആറുപേരെ ബ്രിട്ടീഷ് പൊലീസും ഭീകരവിരുദ്ധ സേനയും ചേർന്ന് അറസ്റ്റ് ചെയ്തിരുന്നു. ഇതിനുപിന്നാലെയാണ് അമേരിക്ക തങ്ങളുടെ വിമാനങ്ങൾ പൂർണ്ണമായും തിരികെ മാതൃരാജ്യത്തേക്ക് എത്തിക്കാൻ തീരുമാനിച്ചത്. ബേസിന് നേരെയുണ്ടാകുന്ന സുരക്ഷാ ഭീഷണികൾ കണക്കിലെടുത്താണ് നീക്കമെന്ന് പെന്റഗൺ വൃത്തങ്ങൾ സൂചന നൽകി.
അതേസമയം, അമേരിക്കൻ സൈന്യത്തിന് സൗകര്യപ്രദമായ ഒരു താവളം താൽക്കാലികമായി നഷ്ടപ്പെട്ടുവെങ്കിലും ഇത് യു.എസിന്റെ ആഗോള ആക്രമണ ശേഷിയെ സാരമായി ബാധിക്കില്ലെന്നാണ് പ്രതിരോധ വിദഗ്ദ്ധരുടെ വിലയിരുത്തൽ. ഇറാന്റെ തന്ത്രപരമായ നീക്കങ്ങൾ അമേരിക്കൻ പ്രസിഡന്റ് ഡൊണാൾഡ് ട്രംപിന്റെ മധ്യപൂർവേഷ്യൻ യുദ്ധ പദ്ധതികളെയും സൈനിക തന്ത്രങ്ങളെയും ഏതുരീതിയിൽ സ്വാധീനിക്കുമെന്നാണ് അന്താരാഷ്ട്ര നിരീക്ഷകർ ഉറ്റുനോക്കുന്നത്.




