Skip to content
November 19, 2026
⌕

സംസ്ഥാനത്തെ സഹകരണ ബാങ്കുകളിൽ വ്യാപക ഇഡി റെയ്ഡ്. മൂന്ന് ജില്ലകളിൽ ഒരേസമയം പരിശോധന. അങ്കമാലി അർബൻ ബാങ്കിൽ 121 കോടിയുടെ ക്രമക്കേട്. കുട്ടനെല്ലൂർ ബാങ്ക് ശാഖകളിലും വസതികളിലും ഇഡി സംഘം. കള്ളപ്പണം വെളുപ്പിക്കൽ തടയൽ നിയമപ്രകാരം നടപടി

October 7, 2026
Share this post to

കൊച്ചി: സംസ്ഥാനത്തെ വിവിധ സഹകരണ ബാങ്കുകൾ കേന്ദ്രീകരിച്ച് എൻഫോഴ്സ്മെന്റ് ഡയറക്ടറേറ്റിന്റെ (ഇഡി) വ്യാപക പരിശോധന. 

കള്ളപ്പണം വെളുപ്പിക്കൽ തടയൽ നിയമപ്രകാരം (പി.എം.എൽ.എ) രജിസ്റ്റർ ചെയ്ത കേസുകളുടെ അടിസ്ഥാനത്തിലാണ് ബുധനാഴ്ച രാവിലെ ആറരയോടെ തൃശൂർ, എറണാകുളം, കോഴിക്കോട് എന്നീ മൂന്ന് ജില്ലകളിലായി ഒരേസമയം റെയ്ഡ് ആരംഭിച്ചത്. 

ബാങ്ക് ശാഖാ ഓഫീസുകളിലും ഭരണസമിതി അംഗങ്ങൾ, മുൻ ജീവനക്കാർ എന്നിവരുടെ വസതികളിലുമാണ് പരിശോധനകൾ നടക്കുന്നത്.

എറണാകുളം ജില്ലയിലെ അങ്കമാലി അർബൻ സഹകരണ ബാങ്കുമായി ബന്ധപ്പെട്ട് നാലിടങ്ങളിലാണ് റെയ്ഡ് പുരോഗമിക്കുന്നത്. വ്യാജ വായ്പകൾ തട്ടിയെടുത്തതുവഴി ബാങ്കിൽ 121 കോടി രൂപയുടെ വൻ സാമ്പത്തിക ക്രമക്കേട് നടന്നതായി ഇഡി നേരത്തെ കണ്ടെത്തിയിരുന്നു. ഇതിന്റെ അടിസ്ഥാനത്തിൽ ഭരണസമിതി അംഗങ്ങളുടെയും മുൻ ജീവനക്കാരുടെയും വീടുകളിലേക്ക് അന്വേഷണം വ്യാപിപ്പിച്ചു. 

തട്ടിപ്പിന് കൂട്ടുനിന്നതായി സംശയിക്കുന്ന ബാങ്കിലെ മുൻ അക്കൗണ്ടന്റായ ഷിജുവിന്റെ വസതിയിലും ഉദ്യോഗസ്ഥർ പരിശോധന നടത്തുന്നുണ്ട്. തൃശൂരിൽ അഞ്ചിടങ്ങളിലായി നടക്കുന്ന റെയ്ഡിൽ, കുട്ടനെല്ലൂർ സർവ്വീസ് സഹകരണ ബാങ്കിന്റെ അഞ്ചേരിച്ചിറ, വെസ്റ്റ് അഞ്ചേരി, പടവരാട് എന്നീ ശാഖകളും മുൻ ബാങ്ക് പ്രസിഡന്റ്, ഭരണസമിതി അംഗങ്ങൾ എന്നിവരുടെ വസതികളും ഇഡി നിരീക്ഷണത്തിലാണ്. 

ബാങ്കുകൾ കേന്ദ്രീകരിച്ച് ബിനാമി പേരുകളിലും വ്യാജരേഖകൾ ചമച്ചും വൻതോതിൽ വായ്പാ തട്ടിപ്പ് നടത്തിയെന്ന പരാതികളിലാണ് കേന്ദ്ര ഏജൻസിയുടെ കർശന നടപടി.

 

Get more updates from Pudukad News on Google