അഭിഷേക് പി. നായർക്ക് സെഞ്ച്വറി; ജാർഖണ്ഡിനെതിരെ കേരളം 269/6 | Kerala vs Jharkhand
Current: മലയാളം
ജംഷഡ്പൂർ: രഞ്ജി ട്രോഫിയിൽ ജാർഖണ്ഡിനെതിരായ മത്സരത്തിന്റെ മൂന്നാം ദിനം കളി നിർത്തുമ്പോൾ കേരളം ആറ് വിക്കറ്റ് നഷ്ടത്തിൽ 269 റൺസെടുത്തു (Kerala vs Jharkhand). ഒരു ഘട്ടത്തിൽ രണ്ട് വിക്കറ്റ് നഷ്ടത്തിൽ 224 റൺസെന്ന ശക്തമായ നിലയിലായിരുന്ന കേരളത്തിന് അവസാന സെഷനിൽ നാല് വിക്കറ്റുകൾ നഷ്ടമായത് തിരിച്ചടിയായി. ഓപ്പണർ അഭിഷേക് പി. നായരുടെ സെഞ്ച്വറിയാണ് കേരളത്തിന്റെ ഇന്നിങ്സിന് കരുത്തായത്.
ഓപ്പണർമാരായ രോഹൻ കുന്നുമ്മലും അഭിഷേക് പി. നായരും ചേർന്ന് കേരളത്തിന് മികച്ച തുടക്കമാണ് നൽകിയത്. രോഹൻ ആക്രമണോത്സുകമായ ഷോട്ടുകളിലൂടെ സ്കോറുയർത്തിയപ്പോൾ അഭിഷേക് ശ്രദ്ധയോടെയാണ് ഇന്നിങ്സ് മുന്നോട്ടുകൊണ്ടുപോയത്. ടീം സ്കോർ 83-ൽ എത്തിയപ്പോൾ 44 റൺസെടുത്ത രോഹൻ പുറത്തായി. ഉത്കർഷ് സിങ്ങിന്റെ പന്തിൽ സുഷാന്ത് മിശ്ര ക്യാച്ചെടുത്താണ് രോഹനെ മടക്കിയത്.
തുടർന്നെത്തിയ സച്ചിൻ ബേബിയും അഭിഷേകും ചേർന്ന് മൂന്നാം വിക്കറ്റിൽ 121 റൺസ് കൂട്ടിച്ചേർത്തു. ഇതിനിടെ അഭിഷേക് രഞ്ജി ട്രോഫിയിലെ തന്റെ ആദ്യ സെഞ്ച്വറി പൂർത്തിയാക്കി. ആദിത്യ സിങ്ങിനെ സിക്സർ പറത്തിയാണ് താരം മൂന്നക്കത്തിലെത്തിയത്.
ടീം സ്കോർ 204-ൽ നിൽക്കെ 35 റൺസെടുത്ത സച്ചിൻ ബേബി പുറത്തായി. ഉത്കർഷ് സിങ്ങിന്റെ പന്തിൽ റോബിൻ മിൻസിന് ക്യാച്ച് നൽകിയാണ് സച്ചിൻ മടങ്ങിയത്.
അവസാന സെഷനിൽ കേരളത്തിന് തിരിച്ചടി
അഭിഷേക് പി. നായരുടെ വിക്കറ്റ് വീണതോടെ കേരളത്തിന്റെ ഇന്നിങ്സിന് തിരിച്ചടിയേറ്റു. 126 റൺസെടുത്ത അഭിഷേകിനെ മനീഷി റിട്ടേൺ ക്യാച്ചിലൂടെ പുറത്താക്കി. പത്ത് ഫോറും അഞ്ച് സിക്സും ഉൾപ്പെട്ടതായിരുന്നു അഭിഷേകിന്റെ മികച്ച ഇന്നിങ്സ്.
തൊട്ടുപിന്നാലെ ഒരേ ഓവറിലെ തുടർച്ചയായ പന്തുകളിൽ വിഷ്ണു വിനോദും മുഹമ്മദ് അസറുദ്ദീനും പുറത്തായി. 15 റൺസെടുത്ത വിഷ്ണു വിനോദ് മുഹമ്മദ് കുനൈൻ ഖുറേഷിയുടെ പന്തിൽ എൽബിഡബ്ല്യുവിൽ കുടുങ്ങി. അടുത്ത പന്തിൽ മുഹമ്മദ് അസറുദ്ദീനും ക്യാച്ച് നൽകി മടങ്ങി. പിന്നാലെ ജലജ് സക്സേനയും ഏഴ് റൺസെടുത്ത് പുറത്തായി.
കളി നിർത്തുമ്പോൾ സൽമാൻ നിസാർ 17 റൺസോടെയും ആദിത്യ സർവാടെ 13 റൺസോടെയും ക്രീസിലുണ്ട്. ജാർഖണ്ഡിനായി ഉത്കർഷ് സിങ് മൂന്ന് വിക്കറ്റും മുഹമ്മദ് കുനൈൻ ഖുറേഷി രണ്ട് വിക്കറ്റും വീഴ്ത്തി.
Story Summary: Kerala reached 269/6 at stumps on Day 3 against Jharkhand in the Ranji Trophy in Jamshedpur. Opener Abhishek P. Nair scored his maiden Ranji Trophy century, making 126 with 10 fours and five sixes. Kerala were well placed at 224/2 before losing four wickets in the final session. Salman Nizar and Aditya Sarwate were unbeaten at stumps.
