ഭരണഘടനയും ജനാധിപത്യവും സംരക്ഷിക്കാൻ ഒറ്റക്കെട്ടായി പോരാടും; ഐക്യസന്ദേശവുമായി ഇന്ത്യാ സഖ്യ നേതാക്കൾ | INDIA Bloc

ന്യൂഡൽഹി: ഭരണഘടനയും ജനാധിപത്യവും സംരക്ഷിക്കാൻ ഒറ്റക്കെട്ടായി പോരാടുമെന്ന് പ്രഖ്യാപിച്ച് ഇന്ത്യാ സഖ്യ നേതാക്കൾ (NDIA Bloc). രാഹുൽ ഗാന്ധിയുടെ നേതൃത്വത്തിൽ നടന്ന സംയുക്ത വാർത്താസമ്മേളനത്തിലാണ് പ്രതിപക്ഷ നേതാക്കൾ ഐക്യസന്ദേശം ഉയർത്തിയത്. രാഹുൽ ഗാന്ധിയുടെ വസതിയിൽ നടന്ന ചായസൽക്കാരത്തിന് ശേഷമാണ് നേതാക്കൾ മാധ്യമങ്ങളെ കണ്ടത്.

ജനാധിപത്യം പുനഃസ്ഥാപിക്കുക എന്ന ഒരേയൊരു ലക്ഷ്യത്തോടെയാണ് പ്രതിപക്ഷം ഒന്നിച്ചുനിൽക്കുന്നതെന്ന് രാഹുൽ ഗാന്ധി പറഞ്ഞു. രാജ്യത്തെ ജനാധിപത്യവും തിരഞ്ഞെടുപ്പ് സംവിധാനവും തകർക്കപ്പെട്ടുവെന്നും ഭരണഘടന സംരക്ഷിക്കാൻ എല്ലാവരും ഒരുമിച്ച് പോരാടണമെന്നും അദ്ദേഹം ആഹ്വാനം ചെയ്തു. പ്രതിപക്ഷത്തിനിടയിൽ സമാന്തര പോരാട്ടങ്ങളില്ലെന്നും ജനാധിപത്യ സംരക്ഷണത്തിനായുള്ള ഒരേയൊരു പോരാട്ടമാണ് നടക്കുന്നതെന്നും രാഹുൽ വ്യക്തമാക്കി.

കഴിഞ്ഞ നാല് ദിവസങ്ങളിലായി ഇന്ത്യാ സഖ്യം സംഘടിപ്പിച്ച വിവിധ പരിപാടികൾക്ക് ജനങ്ങളിൽനിന്ന് വലിയ പിന്തുണ ലഭിച്ചതായി കോൺഗ്രസ് അധ്യക്ഷൻ മല്ലികാർജുൻ ഖാർഗെ പറഞ്ഞു. യുവാക്കളും സാധാരണ പൗരന്മാരും സ്വന്തം മുൻകൈയിൽ പരിപാടികളിൽ പങ്കാളികളായി മുന്നോട്ടുവരുന്നത് ശ്രദ്ധേയമാണെന്നും അദ്ദേഹം കൂട്ടിച്ചേർത്തു.

തിരഞ്ഞെടുപ്പ് കമ്മീഷനെതിരെയും കേന്ദ്ര സർക്കാരിനെതിരെയും വിമർശനവുമായി ആർജെഡി നേതാവ് തേജസ്വി യാദവും രംഗത്തെത്തി. തിരഞ്ഞെടുപ്പ് കമ്മീഷനും പ്രത്യേകിച്ച് മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറും ജനാധിപത്യത്തെ ദുർബലപ്പെടുത്തുന്ന നടപടികളുമായി മുന്നോട്ടുപോയെന്നാണ് തേജസ്വിയുടെ ആരോപണം. ഇതിനെതിരെ ശക്തമായ പോരാട്ടം തുടരുമെന്നും അദ്ദേഹം വ്യക്തമാക്കി.

ചരിത്രപരമായി പ്രതിഷേധങ്ങൾ നടന്നിരുന്ന ജന്തർ മന്തറിൽനിന്ന് സമരവേദി ഡൽഹിയുടെ അതിർത്തികളിലേക്ക് മാറ്റിയ നടപടിയെയും തേജസ്വി വിമർശിച്ചു. പ്രതിഷേധങ്ങളെ നിയന്ത്രിക്കാനുള്ള ഭരണാധികാരികളുടെ ഭയമാണ് ഇതിലൂടെ വ്യക്തമാകുന്നതെന്നും അദ്ദേഹം ആരോപിച്ചു.

ജനാധിപത്യവും ഭരണഘടനയും സംരക്ഷിക്കാനുള്ള പോരാട്ടത്തിൽ ഒരുമിച്ചുനിൽക്കുമെന്നും ആവശ്യമായ ത്യാഗങ്ങൾ സഹിച്ചും ലക്ഷ്യം കൈവരിക്കുമെന്നും ഇന്ത്യാ സഖ്യ നേതാക്കൾ പ്രഖ്യാപിച്ചു. കോൺഗ്രസ് അധ്യക്ഷൻ മല്ലികാർജുൻ ഖാർഗെ, ആർജെഡി നേതാവ് തേജസ്വി യാദവ്, സിപിഎം ജനറൽ സെക്രട്ടറി എം.എ. ബേബി, സിപിഐ ജനറൽ സെക്രട്ടറി ഡി. രാജ തുടങ്ങിയവർ വാർത്താസമ്മേളനത്തിൽ പങ്കെടുത്തു.

Story Summary : INDIA bloc leaders, led by Rahul Gandhi, have pledged to fight together to protect the Constitution and democracy. Speaking at a joint press conference in New Delhi, Congress president Mallikarjun Kharge highlighted public participation in the alliance’s recent programmes, while RJD leader Tejashwi Yadav criticised the Election Commission and the central government. Leaders, including M.A. Baby and D. Raja, reaffirmed their commitment to a united campaign for democratic rights.