സഹപാഠി ഗർഭിണിയായതോടെ യൂട്യൂബ് വിഡിയോ കണ്ട് ഗർഭച്ഛിദ്രത്തിന് ശ്രമം; 18കാരൻ അറസ്റ്റിൽ | Nagpur minor pregnancy case

നാഗ്പുർ: പ്രായപൂർത്തിയാകാത്ത സഹപാഠി ഗർഭിണിയായതിനെത്തുടർന്ന് യൂട്യൂബ് വിഡിയോകൾ നോക്കി ഗർഭച്ഛിദ്രത്തിന് ശ്രമിച്ച 18കാരനെ മഹാരാഷ്ട്രയിലെ നാഗ്പുരിൽ പൊലീസ് അറസ്റ്റ് ചെയ്തു. പെൺകുട്ടി വീട്ടിൽ പ്രസവിക്കുകയും ആരോഗ്യനില വഷളാകുകയും ചെയ്തതോടെയാണ് സംഭവം പുറത്തറിഞ്ഞത്. പീഡനം, പോക്സോ നിയമം എന്നിവയുൾപ്പെടെയുള്ള വകുപ്പുകൾ പ്രകാരമാണ് കേസെടുത്തത് (Nagpur minor pregnancy case). ഒരേ സ്കൂളിൽ പഠിച്ചിരുന്ന ഇരുവരും സുഹൃത്തുക്കളായിരുന്നുവെന്ന് പൊലീസ് പറഞ്ഞു. കഴിഞ്ഞ വർഷം യുവാവിന്റെ വീട്ടിൽ മറ്റാരുമില്ലാതിരുന്ന സമയത്താണ് പെൺകുട്ടിയെ ആദ്യമായി പീഡിപ്പിച്ചതെന്നാണ് പൊലീസിന്റെ കണ്ടെത്തൽ. പിന്നീട് വിവാഹവാഗ്ദാനം നൽകി പീഡനം തുടർന്നതായും പരാതിയിലുണ്ട്.

പെൺകുട്ടി ഗർഭിണിയാണെന്ന് അറിഞ്ഞതോടെ വൈദ്യസഹായം തേടുന്നതിനു പകരം യുവാവ് യൂട്യൂബിൽ ഗർഭച്ഛിദ്ര മാർഗങ്ങൾ തിരഞ്ഞെന്നാണ് പൊലീസ് പറയുന്നത്. വിഡിയോകൾ നോക്കി തയ്യാറാക്കിയ പച്ചമരുന്ന് മിശ്രിതവും ഗർഭച്ഛിദ്ര ഗുളികകളും പെൺകുട്ടിയെക്കൊണ്ട് നിർബന്ധിച്ച് കഴിപ്പിച്ചതായും റിപ്പോർട്ടുണ്ട്. എന്നാൽ ഗർഭധാരണം അവസാന ഘട്ടത്തിലെത്തിയതിനാൽ ശ്രമം വിജയിച്ചില്ല. തുടർന്ന് പെൺകുട്ടി വീട്ടിൽ കുഞ്ഞിന് ജന്മം നൽകി. പ്രസവത്തിനു പിന്നാലെ പെൺകുട്ടിയെ സർക്കാർ ആശുപത്രിയിലും നവജാതശിശുവിനെ സ്വകാര്യ ആശുപത്രിയിലും പ്രവേശിപ്പിച്ചു. പെൺകുട്ടിയുടെ മൊഴി രേഖപ്പെടുത്തിയ ശേഷമാണ് പൊലീസ് യുവാവിനെ അറസ്റ്റ് ചെയ്തത്. സംഭവസമയത്ത് യുവാവിന് പ്രായപൂർത്തിയായിരുന്നോ എന്ന കാര്യവും പൊലീസ് പരിശോധിക്കുന്നുണ്ട്. പെൺകുട്ടിക്ക് കൗൺസിലിങ്ങും മാനസിക പിന്തുണയും നൽകുമെന്നും കേസ് ചൈൽഡ് വെൽഫെയർ കമ്മിറ്റിക്ക് കൈമാറുമെന്നും അധികൃതർ അറിയിച്ചു.

Summary: An 18-year-old man was arrested in Nagpur, Maharashtra, after allegedly attempting to terminate his 16-year-old schoolmate’s pregnancy using remedies and pills after watching YouTube videos. The girl later gave birth at home and was taken to hospital after her health deteriorated. Police have registered a case under relevant criminal and POCSO provisions.