കുട്ടികൾക്ക് സുരക്ഷിതവും സുരക്ഷിതമല്ലാത്തതുമായ സ്പർശനങ്ങളെക്കുറിച്ച് ബോധവൽക്കരണം നൽകണം: സുപ്രീം കോടതിയുടെ നിർണ്ണായക നിർദ്ദേശങ്ങൾ | Supreme Court
Current: മലയാളം
ന്യൂഡൽഹി: കുട്ടികൾക്കെതിരായ ലൈംഗികാതിക്രമങ്ങളും ഓൺലൈൻ വഴിയുള്ള ലൈംഗിക ചൂഷണ ദൃശ്യങ്ങളും തടയുന്നതിനായി വിപ്ലവകരമായ നിർദ്ദേശങ്ങളുമായി സുപ്രീം കോടതി. സ്കൂളുകളിൽ കുട്ടികൾക്ക് സുരക്ഷിതവും അസുരക്ഷിതവുമായ സ്പർശനങ്ങളെക്കുറിച്ച് പഠിപ്പിക്കാനും, സോഷ്യൽ മീഡിയ പ്ലാറ്റ്‌ഫോമുകൾക്ക് കശന നിയന്ത്രണമേർപ്പെടുത്താനും കേന്ദ്ര സർക്കാരിനോടും വിദ്യാഭ്യാസ സ്ഥാപനങ്ങളോടും സുപ്രീം കോടതി ഉത്തരവിട്ടു.(Supreme Court Directs Schools To Teach Safe Touch And Orders Strict CSEAM Rules)
ജസ്റ്റിസ് ജെ.ബി. പർദിവാല, ജസ്റ്റിസ് കെ. വിനോദ് ചന്ദ്രൻ എന്നിവരടങ്ങിയ ബെഞ്ചാണ് 137 പേജുള്ള നിർണ്ണായക വിധി പ്രസ്താവിച്ചത്. ‘ജസ്റ്റ് റൈറ്റ്‌സ് ഫോർ ചിൽഡ്രൻ അലയൻസ്’ നൽകിയ ഹർജിയിലാണ് ഉത്തരവ്.
പ്രധാന നിർദ്ദേശങ്ങൾ ഒറ്റനോട്ടത്തിൽ:
1. സ്കൂളുകളിലും പാഠ്യപദ്ധതിയിലും വരുത്തേണ്ട മാറ്റങ്ങൾ
ശരീര ബോധവൽക്കരണവും അനുമതിയും: പ്രൈമറി തലത്തിൽ തന്നെ കുട്ടികളുടെ പ്രായത്തിനനുസരിച്ച് സുരക്ഷിതവും അസുരക്ഷിതവുമായ സ്പർശനം, വ്യക്തിഗത സുരക്ഷ, സമ്മതം എന്നിവയെക്കുറിച്ച് പഠിപ്പിക്കണം.
ഡിജിറ്റൽ അപകടങ്ങൾ: ഓൺലൈൻ വഴിയുള്ള കെണികൾ, ലൈംഗിക ബ്ലാക്ക്‌മെയിലിംഗ്, സമ്മതമില്ലാതെ സ്വകാര്യ ചിത്രങ്ങൾ പങ്കുവെക്കുന്നതിന്റെ പ്രത്യാഘാതങ്ങൾ എന്നിവയെക്കുറിച്ച് വ്യക്തമായ അറിവ് നൽകണം. NCERT, SCERT എന്നിവർ വിദഗ്ധരുമായി ആലോചിച്ച് ഇതിനായുള്ള പാഠ്യപദ്ധതി തയ്യാറാക്കണം.
ഹെൽപ്പ്‌ലൈൻ നമ്പറുകൾ പ്രദർശിപ്പിക്കണം: എല്ലാ സ്കൂളുകളിലും ഹോസ്റ്റലുകളിലും ചൈൽഡ് ഹെൽപ്പ്‌ലൈൻ (1098), സൈബർ ക്രൈം ഹെൽപ്പ്‌ലൈൻ (1930) നമ്പറുകൾ വ്യക്തമായി പ്രദർശിപ്പിക്കണം.
അധ്യാപകർക്ക് പരിശീലനം: കുട്ടികൾ നേരിടുന്ന അതിക്രമങ്ങൾ തിരിച്ചറിയാനും POCSO നിയമപ്രകാരം റിപ്പോർട്ട് ചെയ്യാനും അധ്യാപകർക്കും ജീവനക്കാർക്കും പരിശീലനം നൽകണം.
2. സോഷ്യൽ മീഡിയ പ്ലാറ്റ്‌ഫോമുകൾക്കുള്ള കർശന നിയമങ്ങൾ
ദേശീയ ഡാറ്റാബേസ്: കുട്ടികളുടെ അശ്ലീല/ചൂഷണ ദൃശ്യങ്ങൾ തിരിച്ചറിഞ്ഞ് നീക്കം ചെയ്യാൻ കേന്ദ്ര സർക്കാർ ഒരു ദേശീയ ഡാറ്റാബേസ് രൂപീകരിക്കണം. ഒരു പ്ലാറ്റ്‌ഫോമിൽ നിന്ന് നീക്കം ചെയ്യുന്ന ദൃശ്യങ്ങൾ മറ്റൊന്നിലും പ്രചരിക്കുന്നില്ലെന്ന് ഇത് ഉറപ്പാക്കും.
രണ്ട് മണിക്കൂറിനകം നീക്കം ചെയ്യണം: കുട്ടികൾക്കെതിരായ ലൈംഗികച്ചോഷണ ദൃശ്യങ്ങളെക്കുറിച്ചുള്ള പരാതി ലഭിച്ചാലോ അല്ലെങ്കിൽ കണ്ടെത്തിയാലോ 2 മണിക്കൂറിനകം പ്ലാറ്റ്‌ഫോമുകളിൽ നിന്ന് അവ നീക്കം ചെയ്ത് അധികൃതർക്ക് റിപ്പോർട്ട് ചെയ്യണം.
പരാതിപരിഹാര ഉദ്യോഗസ്ഥർ: വെബ്‌സൈറ്റുകളിലും ആപ്പുകളിലും പരാതി നൽകാനുള്ള സംവിധാനം ലളിതമായി ലഭ്യമാക്കണം. പരാതി ലഭിച്ച് 24 മണിക്കൂറിനകം രസീത് നൽകണം.
കനത്ത പിഴ: നിയമങ്ങൾ ലംഘിക്കുന്ന സോഷ്യൽ മീഡിയ കമ്പനികൾക്കെതിരെ ഭാരിച്ച സാമ്പത്തിക പിഴയും, ഇത്തരം ദൃശ്യങ്ങൾ വഴി ഉണ്ടാക്കുന്ന വരുമാനം കണ്ടുകെട്ടുകയും വേണം.
3. ഇന്റർനെറ്റ് ഉപയോഗത്തിലെ ജാഗ്രത
കുട്ടികളുടെ ഇന്റർനെറ്റ് ഉപയോഗം പൂർണ്ണമായി നിരോധിക്കുന്നതിന് പകരം, സ്വകാര്യത ഉറപ്പാക്കുന്ന ‘Private-by-default’ അക്കൗണ്ടുകൾ, അജ്ഞാതരായ മുതിർന്നവരിൽ നിന്ന് സന്ദേശങ്ങൾ വരുന്നത് തടയുന്ന സുരക്ഷാ മാനദണ്ഡങ്ങൾ എന്നിവ നടപ്പിലാക്കണമെന്ന് കോടതി നിർദ്ദേശിച്ചു.
Story Summary
The Supreme Court has directed the Union Government and educational institutions to implement age-appropriate sex education, bodily safety, and digital risk awareness in schools. The bench also ordered the creation of a national database to immediately remove Child Sexual Exploitation and Abuse Material (CSEAM) and imposed stricter compliance deadlines for social media platforms.
