“വയറ്റിൽ ഭക്ഷണത്തിന്റെ ഒരംശം പോലുമില്ലായിരുന്നു”: കാർത്തികപ്പള്ളിയിൽ രണ്ടു വയസ്സുകാരന്റെ മരണത്തിൽ വൻ ഞെട്ടൽ, മാതാപിതാക്കൾക്കെതിരെ കേസ് | Alappuzha Child Death
Current: മലയാളം
ആലപ്പുഴ: കാർത്തികപ്പള്ളിയിൽ പോഷകാഹാരക്കുറവിനെ തുടർന്ന് രണ്ടുവയസുകാരൻ മരിച്ച സംഭവത്തിൽ കുട്ടികളുടെ സംരക്ഷണവുമായി ബന്ധപ്പെട്ട് ഗുരുതര ആരോപണങ്ങൾ (Alappuzha Child Death). കുട്ടിയുടെ പോസ്റ്റുമോർട്ടം പരിശോധനയിൽ വയറ്റിൽ ഭക്ഷണമൊന്നും ഉണ്ടായിരുന്നില്ലെന്ന് മന്ത്രി ബിന്ദു കൃഷ്ണ പറഞ്ഞു. സംഭവത്തിൽ വിശദമായ അന്വേഷണം നടത്തി ഉത്തരവാദികൾക്കെതിരെ കർശന നടപടി സ്വീകരിക്കുമെന്നും കുട്ടികളുടെ സുരക്ഷ ഉറപ്പാക്കാൻ വനിതാ ശിശുവികസന വകുപ്പ് ഇടപെടുമെന്നും മന്ത്രി വ്യക്തമാക്കി.
മരിച്ച കുട്ടിയുടെ മാതാപിതാക്കളായ രാജേഷിനും താരയ്ക്കുമെതിരെയാണ് നാട്ടുകാരും പൊതുപ്രവർത്തകരും ഗുരുതര ആരോപണങ്ങൾ ഉന്നയിച്ചിരിക്കുന്നത്. ദമ്പതികളുടെ ഏഴ് മക്കളിൽ രണ്ടുപേർ പട്ടിണിയും മതിയായ പരിചരണത്തിന്റെ അഭാവവും മൂലമാണ് മരിച്ചതെന്നാണ് നാട്ടുകാരുടെ ആരോപണം. കുട്ടികൾക്ക് ആവശ്യത്തിന് ഭക്ഷണം ലഭിച്ചിരുന്നില്ലെന്നും വിശന്നിരിക്കുന്ന കുട്ടികൾക്ക് അയൽവാസികൾ പലപ്പോഴും ഭക്ഷണം നൽകിയിരുന്നതായും പൊതുപ്രവർത്തകർ മന്ത്രിയെ അറിയിച്ചു.
അങ്കണവാടികൾ വഴി ഗർഭിണികൾക്കും മുലയൂട്ടുന്ന അമ്മമാർക്കും കുട്ടികൾക്കുമായി വിതരണം ചെയ്യുന്ന പോഷകാഹാരം കുട്ടികൾക്ക് നൽകാതെ മാതാപിതാക്കൾ ഉപയോഗിച്ചിരുന്നതായും ആരോപണമുണ്ട്. കുട്ടികളുടെ ഭക്ഷണവും ആരോഗ്യവും ശുചിത്വവും ഉറപ്പാക്കുന്നതിൽ കുടുംബം ഗുരുതര വീഴ്ച വരുത്തിയെന്നാണ് നാട്ടുകാർ പറയുന്നത്.
കുടുംബം താമസിച്ചിരുന്ന വീട്ടിലെ സാഹചര്യങ്ങളും ഏറെ പരിതാപകരമായിരുന്നുവെന്ന് പ്രദേശവാസികൾ ആരോപിക്കുന്നു. പൊടിയും അഴുക്കും നിറഞ്ഞ വീട്ടിൽ കൈക്കുഞ്ഞ് ഉൾപ്പെടെയുള്ള കുട്ടികൾക്ക് ആവശ്യമായ അടിസ്ഥാന സൗകര്യങ്ങൾ ഉണ്ടായിരുന്നില്ല. ലൈഫ് ഭവനപദ്ധതിയിലൂടെ കുടുംബത്തിന് വീട് നിർമിച്ചുനൽകാൻ ശ്രമിച്ചിരുന്നെങ്കിലും ഭൂമിയുമായി ബന്ധപ്പെട്ട കുടുംബത്തർക്കങ്ങളും കേസുകളും തടസ്സമായതായി പഞ്ചായത്ത് അധികൃതർ അറിയിച്ചു.
കുട്ടികളുടെ സുരക്ഷ ഉറപ്പാക്കുന്നതിനായി നേരത്തെയും ഇടപെടലുകൾ നടത്തിയിരുന്നതായി പൊതുപ്രവർത്തകർ വ്യക്തമാക്കി. കുട്ടികളെ ഗാന്ധിഭവനിൽ പ്രവേശിപ്പിച്ചിരുന്നെങ്കിലും അമ്മ ആത്മഹത്യാ ഭീഷണി മുഴക്കി ഇവരെ തിരികെ കൊണ്ടുപോയെന്നാണ് ആരോപണം.
ഒക്ടോബർ ആറിന് ശിശുക്ഷേമസമിതി, പഞ്ചായത്ത്, ആരോഗ്യവകുപ്പ്, പൊലീസ് എന്നിവിടങ്ങളിലെ ഉദ്യോഗസ്ഥർ ഉൾപ്പെട്ട സംഘം വീട്ടിലെത്തി കുട്ടികളെ ഏറ്റെടുക്കാൻ ശ്രമിച്ചിരുന്നു. എന്നാൽ, കുഞ്ഞിനെ അപായപ്പെടുത്തുമെന്നും സ്വയം ജീവനൊടുക്കുമെന്നും അമ്മ ഭീഷണിപ്പെടുത്തിയതിനാൽ നടപടികളുമായി മുന്നോട്ടുപോകാൻ കഴിഞ്ഞില്ലെന്നാണ് വാർഡ് അംഗത്തിന്റെ വിശദീകരണം.
കുട്ടികളുടെ പരിചരണത്തിൽ മാതാപിതാക്കൾ വീഴ്ച വരുത്തിയിരുന്നതായും സ്കൂൾ വിദ്യാഭ്യാസം, ഭക്ഷണം, ശുചിത്വം തുടങ്ങിയ അടിസ്ഥാന ആവശ്യങ്ങൾ പോലും കൃത്യമായി ഉറപ്പാക്കിയിരുന്നില്ലെന്നും പൊതുപ്രവർത്തകർ ആരോപിച്ചു. ഒമ്പതുവയസുകാരനായ മൂത്ത കുട്ടിക്കായിരുന്നു ഇളയ സഹോദരങ്ങളുടെ പരിചരണച്ചുമതല നൽകിയിരുന്നതെന്നും ഇവർ പറയുന്നു.
കുടുംബത്തിന്റെ സാഹചര്യം കണക്കിലെടുത്ത് കൂടുതൽ ഗർഭധാരണം ഒഴിവാക്കുന്നതിനുള്ള നടപടികൾ സ്വീകരിക്കണമെന്ന് താരയോട് ആവശ്യപ്പെട്ടിരുന്നതായും പൊതുപ്രവർത്തകർ അറിയിച്ചു. എന്നാൽ, യുവതിയുടെ സമ്മതമില്ലാതെ സ്ഥിരമായ ഗർഭനിരോധന നടപടി സ്വീകരിക്കാനാവില്ലെന്ന് ഡോക്ടർ വ്യക്തമാക്കിയതായും അവർ പറഞ്ഞു.
ശനിയാഴ്ച രാവിലെയാണ് ദമ്പതികളുടെ രണ്ടുവയസുകാരനായ മകൻ മരിച്ചത്. ആലപ്പുഴ മെഡിക്കൽ കോളജ് ആശുപത്രിയിൽ നടത്തിയ പോസ്റ്റുമോർട്ടത്തിൽ പോഷകാഹാരക്കുറവാണ് മരണകാരണമെന്ന് കണ്ടെത്തിയതായാണ് വിവരം. കുടുംബത്തിലെ മറ്റൊരു ആൺകുട്ടിയും നേരത്തേ സമാന സാഹചര്യത്തിൽ മരിച്ചിരുന്നുവെന്ന ആരോപണവും ഉയർന്നിട്ടുണ്ട്.
സംഭവത്തിന് പിന്നാലെ കുടുംബത്തിലെ നാല് പെൺകുട്ടികളെ ശിശുക്ഷേമസമിതി ഏറ്റെടുത്തു. അമ്മ താരയെയും ഏഴാമത്തെ കുട്ടിയായ ആൺകുഞ്ഞിനെയും വണ്ടാനം മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരിക്കുകയാണ്.
കുട്ടികളുടെ സുരക്ഷയും ആരോഗ്യപരിചരണവും ഉറപ്പാക്കുന്നതിനൊപ്പം അമ്മയ്ക്ക് ആവശ്യമായ കൗൺസിലിങ്ങും മറ്റ് സഹായങ്ങളും ലഭ്യമാക്കുമെന്ന് മന്ത്രി അറിയിച്ചു. സംഭവത്തിൽ ബന്ധപ്പെട്ട വകുപ്പുകളുടെ ഇടപെടലുകളും മുൻകാല നടപടികളും ഉൾപ്പെടെ പരിശോധിച്ച് തുടർനടപടികൾ സ്വീകരിക്കുമെന്നാണ് അറിയിച്ചിരിക്കുന്നത്.
Story Summary: A two-year-old boy reportedly died due to malnutrition in Karthikappally, Alappuzha, raising serious concerns about child neglect and welfare failures. Local residents alleged that the children lacked adequate food, hygiene, and parental care despite previous interventions by authorities. Four girls have been taken into child welfare custody, while the mother and an infant are receiving hospital care.
