ആർ.എസ്.എസ് ശതാബ്ദി ആഘോഷങ്ങൾക്ക് നാഗ്പൂരിൽ സമാപനം: വിജയദശമി ദിനത്തിൽ ശസ്ത്രപൂജ നിർവഹിച്ച് മോഹൻ ഭാഗവത്; രാജ്യത്തിന്റെ ഐക്യവും സ്വത്വബോധവും ഉയർത്തിപ്പിടിക്കാൻ ആഹ്വാനം
Current: മലയാളം
നാഗ്പൂര്‍: നൂറാം വാര്‍ഷിക ആഘോഷങ്ങളുടെ സമാപനത്തോടനുബന്ധിച്ച് രാഷ്ട്രീയ സ്വയംസേവക സംഘത്തിന്റെ (ആര്‍.എസ്.എസ്) വാര്‍ഷിക വിജയദശമി ആഘോഷങ്ങള്‍ നാഗ്പൂരിലെ രേശിംബാഗ് മൈതാനത്ത് നടന്നു.
ചടങ്ങില്‍ ആര്‍.എസ്.എസ് സര്‍സംഘചാലക് മോഹന്‍ ഭാഗവത് ശസ്ത്രപൂജ നിര്‍വഹിക്കുകയും സംഘസ്ഥാപകന്‍ കേശവ ബലിറാം ഹെഡ്‌ഗേവാറുടെ സ്മൃതിമണ്ഡലത്തില്‍ പുഷ്പാര്‍ച്ചന നടത്തുകയും ചെയ്തു.
മുന്‍ ഉപരാഷ്ട്രപതി ജഗ്ദീപ് ധന്‍ഖര്‍, പശ്ചിമ ഇന്ത്യയിലെ ഇസ്രായേല്‍ കോണ്‍സുല്‍ ജനറല്‍ യാനിവ് റെവാച്ച്, ഡൈനിക് ജാഗരണ്‍ എഡിറ്റര്‍ ഇന്‍ ചീഫ് സഞ്ജയ് ഗുപ്ത എന്നിവര്‍ ചടങ്ങില്‍ മുഖ്യാതിഥികളായി പങ്കെടുത്തു.
മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ്, കേന്ദ്രമന്ത്രി നിതിന്‍ ഗഡ്കരി, സംസ്ഥാന റവന്യൂ മന്ത്രി ചന്ദ്രശേഖര്‍ ബവന്‍കുലെ തുടങ്ങിയ പ്രമുഖരും ആര്‍.എസ്.എസിന്റെ മുതിര്‍ന്ന ഭാരവാഹികളും ചടങ്ങില്‍ സന്നിഹിതരായിരുന്നു.
രാജ്യത്തിന്റെ ഐക്യവും സ്വത്വബോധവും ശക്തിപ്പെടുത്തുന്നതിനായി ആര്‍.എസ്.എസ് കഴിഞ്ഞ നൂറു വര്‍ഷമായി പ്രവര്‍ത്തിച്ചുവരികയാണെന്ന് ചടങ്ങിനെ അഭിസംബോധന ചെയ്തുകൊണ്ട് മോഹന്‍ ഭാഗവത് വ്യക്തമാക്കി.
വിദേശ ആക്രമണകാരികളുടെ കാലഘട്ടത്തില്‍ വിശ്വാസവും സാമൂഹിക സൗഹാര്‍ദ്ദവും പ്രചരിപ്പിച്ച വിശുദ്ധന്‍ സന്ത് രവിദാസ് ജി മഹാരാജിന്റെ 650-ാം ജന്മവാര്‍ഷികവും, സ്വാമി ശ്രദ്ധാനന്ദിന്റെ ബലിദാന ശതാബ്ദിയും, സ്വാമി ലക്ഷ്മണാനന്ദ സരസ്വതിയുടെ ജന്മശതാബ്ദിയും അദ്ദേഹം അനുസ്മരിച്ചു.
സ്വത്വബോധവും സ്വദേശി ആശയങ്ങളും ജീവിതത്തില്‍ പകര്‍ത്തേണ്ടതിന്റെ പ്രാധാന്യവും അദ്ദേഹം ഊന്നിപ്പറഞ്ഞു. 1925-ലെ വിജയദശമി ദിനത്തിലാണ് ഡോ. കേശവ ബലിറാം ഹെഡ്‌ഗേവാര്‍ നാഗ്പൂരില്‍ ആര്‍.എസ്.എസിന് രൂപം നല്‍കിയത്.
