ആപ്പിൾ ഉൽപ്പന്നങ്ങളിൽ യു.എസ്.ബി-സി ചാർജിംഗ് പോർട്ട് നിർബന്ധമാക്കിയ യൂറോപ്യൻ യൂണിയൻ നടപടിയെ പ്രശംസിച്ച് ഇലോൺ മസ്‌ക്
Current: മലയാളം
ബ്രസല്‍സ്: പൊതുവേ സര്‍ക്കാര്‍ നിയന്ത്രണങ്ങളോടും നിയമങ്ങളോടും കടുത്ത വിയോജിപ്പ് പ്രകടിപ്പിക്കാറുള്ള ടെസ്ല, സ്പേസ് എക്സ് മേധാവി ഇലോണ്‍ മസ്‌ക് യൂറോപ്യന്‍ യൂണിയന്റെ (ഇ.യു) സാങ്കേതിക നയത്തെ പരസ്യമായി പ്രശംസിച്ച് രംഗത്തെത്തി.
ആപ്പിള്‍ ഉല്‍പ്പന്നങ്ങളില്‍ ലൈറ്റ്നിംഗ് പോര്‍ട്ടിന് പകരം സാര്‍വത്രിക യു.എസ്.ബി-സി ചാര്‍ജിംഗ് രീതി നിര്‍ബന്ധമാക്കിയതിനാണ് മസ്‌ക് ഇ.യു റെഗുലേറ്റര്‍മാരെ അഭിനന്ദിച്ചത്.
‘അര്‍ഹിക്കുന്ന കാര്യം അംഗീകരിക്കാതിരിക്കാന്‍ കഴിയില്ല, എല്ലാ ആപ്പിള്‍ ഉല്‍പ്പന്നങ്ങളിലും യു.എസ്.ബി-സി ഉപയോഗിക്കാന്‍ നിര്‍ബന്ധിതരാക്കിയതില്‍ ഇ.യു റെഗുലേറ്റര്‍മാര്‍ അഭിനന്ദനം അര്‍ഹിക്കുന്നു,’ എന്ന് മസ്‌ക് എക്സില്‍ കുറിച്ചു.
സാങ്കേതിക ലോകത്ത് വലിയ മാറ്റമുണ്ടാക്കിയ ഇ.യു നിയമത്തിന്റെ സ്വാധീനമാണ് മസ്‌കിന്റെ ഈ അപൂര്‍വ്വ പ്രതികരണത്തിലൂടെ വ്യക്തമാകുന്നത്.
ഇ.യുവിന്റെ കടുത്ത സമ്മര്‍ദ്ദത്തെ തുടര്‍ന്ന് 2023-ല്‍ പുറത്തിറക്കിയ ഐഫോണ്‍ 15 സീരീസ് മുതല്‍ ലൈറ്റ്നിംഗ് കേബിളുകള്‍ ഒഴിവാക്കി യു.എസ്.ബി-സി പോര്‍ട്ടിലേക്ക് മാറാന്‍ ആപ്പിള്‍ നിര്‍ബന്ധിതരായിരുന്നു.
തുടര്‍ന്ന് 2024 ഡിസംബര്‍ 28 മുതല്‍ യൂറോപ്പില്‍ വില്‍ക്കുന്ന എല്ലാ സ്മാര്‍ട്ട്ഫോണുകള്‍, ടാബ്ലെറ്റുകള്‍, ക്യാമറകള്‍, ഹെഡ്ഫോണുകള്‍ എന്നിവയ്ക്കെല്ലാം യു.എസ്.ബി-സി ചാര്‍ജിംഗ് പോര്‍ട്ട് നിര്‍ബന്ധമാക്കി ഇ.യു നിയമം പൂര്‍ണ്ണമായും നിലവില്‍ വരികയും ചെയ്തു. ഇലക്ട്രോണിക് മാലിന്യങ്ങള്‍ കുറയ്ക്കുന്നതിനും ഉപഭോക്താക്കള്‍ക്ക് കൂടുതല്‍ സൗകര്യം നല്‍കുന്നതിനുമായാണ് യൂറോപ്യന്‍ യൂണിയന്‍ ഈ നയം നടപ്പിലാക്കിയത്.
