“ഇളയമ്മ പെൺകുട്ടിയെ വിറ്റത് കമ്മീഷൻ വ്യവസ്ഥയിൽ, ഗൂഗിൾ പേ വഴിയുള്ള പണമിടപാടുകൾ തെളിവായി’: കോവളം കേസിലെ അന്തർസംസ്ഥാന മനുഷ്യക്കടത്ത് സംഘത്തെക്കുറിച്ചും അന്വേഷണം | Kovalam Spa Case
Current: മലയാളം
തിരുവനന്തപുരം: കോവളത്തെ സ്പായിൽ പതിനാറുകാരി ലൈംഗികാതിക്രമത്തിന് ഇരയായ കേസിൽ തിരുവനന്തപുരം കോർപ്പറേഷനിലെ ഹെൽത്ത് ഇൻസ്പെക്ടർ അറസ്റ്റിൽ (Kovalam Spa Case). ഉള്ളൂർ സോണൽ ഓഫീസിലെ ഹെൽത്ത് ഇൻസ്പെക്ടറായ അനുരൂപിനെയാണ് പൊലീസ് അറസ്റ്റ് ചെയ്തത്. കേസുമായി ബന്ധപ്പെട്ട ഡ്രീംസ് സ്പാ അനുരൂപിന്റെ ബിനാമി സ്ഥാപനമാണെന്നതിന് നിർണായക തെളിവുകൾ ലഭിച്ചതിനെ തുടർന്നാണ് അറസ്റ്റ്.
അറസ്റ്റിന് പിന്നാലെ അനുരൂപിനെ സർവീസിൽനിന്ന് സസ്പെൻഡ് ചെയ്തു. മേയർ വി.വി. രാജേഷിന്റെ നിർദേശപ്രകാരമാണ് നടപടിയെന്നാണ് വിവരം. സ്പായുടെ നടത്തിപ്പിലും സാമ്പത്തിക ഇടപാടുകളിലും അനുരൂപിന് നേരിട്ട് പങ്കുണ്ടെന്ന് വ്യക്തമാക്കുന്ന തെളിവുകൾ അന്വേഷണസംഘത്തിന് ലഭിച്ചതായാണ് റിപ്പോർട്ട്.
ഡ്രീംസ് സ്പായിലെ സാമ്പത്തിക ഇടപാടുകൾ അനുരൂപിന്റെ പേരിലാണ് നടന്നിരുന്നതെന്നാണ് പൊലീസ് കണ്ടെത്തൽ. സ്ഥാപനത്തിന്റെ ബിനാമി നടത്തിപ്പുകാരനെന്ന് സംശയിക്കുന്ന നിശാന്ത് ദിവസേനയുള്ള കളക്ഷൻ തുക അനുരൂപിന് കൈമാറിയിരുന്നതായും അന്വേഷണത്തിൽ വ്യക്തമായിട്ടുണ്ട്. അനുരൂപിന്റെ ഗൂഗിൾ പേ അക്കൗണ്ട് വഴിയാണ് പണമിടപാടുകൾ നടത്തിയിരുന്നതെന്നും സ്പായിലേക്ക് ആവശ്യമായ സാധനങ്ങൾ വാങ്ങിയിരുന്നതും ഇയാളാണെന്നും പൊലീസ് കണ്ടെത്തിയതായി റിപ്പോർട്ടുണ്ട്.
കേസിലെ ഒന്നാം പ്രതിയായ പെൺകുട്ടിയുടെ ഇളയമ്മയുമായി അനുരൂപിന് നേരിട്ട് സാമ്പത്തിക ഇടപാടുകൾ ഉണ്ടായിരുന്നതായും അന്വേഷണസംഘത്തിന് വിവരം ലഭിച്ചു. ഈ ഇടപാടുകൾ സംബന്ധിച്ച രേഖകളും മറ്റ് തെളിവുകളും പൊലീസ് പരിശോധിച്ചുവരികയാണ്.
നേരത്തെ കൈക്കൂലി വാങ്ങിയതുമായി ബന്ധപ്പെട്ട കേസുകളിലും അനുരൂപ് നടപടി നേരിട്ടിരുന്നതായാണ് വിവരം.
അതേസമയം, കേസിൽ കൂടുതൽ തെളിവുകൾ ശേഖരിക്കുന്നതിന്റെ ഭാഗമായി കോവളം, വിഴിഞ്ഞം മേഖലകളിലെ സ്പാകളിൽ പൊലീസ് പരിശോധന നടത്തി. അതിജീവിതയെ ഒപ്പം കൂട്ടി മഹസർ തയ്യാറാക്കുന്നതിന്റെ ഭാഗമായായിരുന്നു പരിശോധന. ഫോറൻസിക് സംഘവും അന്വേഷണത്തിൽ പങ്കെടുത്തു.
പെൺകുട്ടി ഗുരുതരമായ ലൈംഗികാതിക്രമത്തിന് ഇരയായിട്ടുണ്ടെന്നാണ് പൊലീസിന്റെ പ്രാഥമിക കണ്ടെത്തൽ. സംഭവവുമായി ബന്ധപ്പെട്ട് സ്പായിൽ എത്തിയിരുന്ന സന്ദർശകരെ തിരിച്ചറിയാനുള്ള ശ്രമങ്ങളും അന്വേഷണസംഘം ഊർജിതമാക്കിയിട്ടുണ്ട്.
സ്ഥാപനത്തിലെ സിസിടിവി ദൃശ്യങ്ങളും സന്ദർശക രജിസ്റ്ററും കേന്ദ്രീകരിച്ചാണ് അന്വേഷണം പുരോഗമിക്കുന്നത്. ലൈംഗികാതിക്രമത്തിൽ പങ്കുണ്ടെന്ന് കണ്ടെത്തുന്നവർക്കെതിരെ പോക്സോ നിയമം ഉൾപ്പെടെയുള്ള വകുപ്പുകൾ ചുമത്തി കേസെടുക്കാനാണ് പൊലീസ് നീക്കം. കേസിൽ കൂടുതൽ പേർ പ്രതികളാകാനുള്ള സാധ്യതയും അന്വേഷണസംഘം പരിശോധിക്കുന്നുണ്ട്.
പെൺകുട്ടിയെ ലൈംഗിക ചൂഷണത്തിന് വിധേയയാക്കിയ സംഭവത്തിന് പിന്നിൽ മനുഷ്യക്കടത്ത് സംഘത്തിന്റെ ഇടപെടലുണ്ടെന്ന സംശയവും ശക്തമാണ്. കമ്മീഷൻ അടിസ്ഥാനത്തിൽ പെൺകുട്ടിയെ ചൂഷണത്തിന് വിട്ടുനൽകിയെന്നാണ് ഇളയമ്മയ്ക്കെതിരായ ആരോപണം.
കേസിൽ പ്രതികളായ പെൺകുട്ടിയുടെ ഇളയമ്മയ്ക്കും ഭർത്താവിനും അന്തർസംസ്ഥാന മനുഷ്യക്കടത്ത് സംഘവുമായി ബന്ധമുണ്ടെന്നാണ് പൊലീസിന്റെ കണ്ടെത്തൽ. ഈ ബന്ധങ്ങളെക്കുറിച്ചും മറ്റ് സംസ്ഥാനങ്ങളിലേക്ക് അന്വേഷണം വ്യാപിപ്പിക്കേണ്ടതുണ്ടോയെന്നതിനെക്കുറിച്ചും പൊലീസ് പരിശോധിച്ചുവരികയാണ്.
അതിജീവിതയുടെ മൊഴി, സാമ്പത്തിക ഇടപാടുകളുടെ രേഖകൾ, സിസിടിവി ദൃശ്യങ്ങൾ, ഫോറൻസിക് പരിശോധനാഫലങ്ങൾ എന്നിവ കേന്ദ്രീകരിച്ചാണ് അന്വേഷണം തുടരുന്നത്.
Story Summary: A Thiruvananthapuram Corporation health inspector, Anuroop, has been arrested and suspended in connection with the alleged sexual exploitation of a 16-year-old girl at a spa in Kovalam. Police reportedly uncovered financial links between the official and the establishment. Investigators are also examining suspected human trafficking connections and identifying other individuals who may have been involved.
