യുറേനിയമടക്കം ആണവ സാമഗ്രികൾ നീക്കില്ല: അമേരിക്കയുമായി ചർച്ചയ്ക്കില്ലെന്ന് വ്യക്തമാക്കി ഇറാൻ | Iran Nuclear Program

ടെഹ്‌റാൻ : എൻറിച്ച് ചെയ്ത ആണവ സാമഗ്രികളൊന്നും രാജ്യത്തിന് പുറത്തേക്ക് കൊണ്ടുപോകാൻ അനുവദിക്കില്ലെന്ന് ഇറാൻ സെക്യൂരിറ്റി ചീഫ് മൊഹ്സെൻ റെസായി വ്യക്തമാക്കി. ഇറാൻ സന്ദർശിക്കുന്ന പാകിസ്താൻ സൈനിക മേധാവി ഫീൽഡ് മാർഷൽ അസിം മുനീറുമായുള്ള കൂടിക്കാഴ്ചയിലാണ് റെസായി ഇക്കാര്യം അറിയിച്ചത്. ആണവ സാമഗ്രികൾ ഇറാന്റെ ദേശീയ സമ്പത്താണെന്നും അത് രാജ്യത്തിനുള്ളിലെ ആവശ്യങ്ങൾക്കായി മാത്രമാണ് ഉപയോഗിക്കുകയെന്നും അദ്ദേഹം പറഞ്ഞു.(Iran Nuclear Program, Iran Rejects Nuclear Material Transfer In Talks With Pakistan Army Chief)

അമേരിക്കയുമായി തങ്ങൾ മുന്നോട്ടുവെച്ച നിബന്ധനകൾ അംഗീകരിക്കുകയും വിശ്വാസ്യത കെട്ടിപ്പടുക്കാനുള്ള നടപടികൾ സ്വീകരിക്കുകയും ചെയ്യുന്നത് വരെ തുടർചർച്ചകൾ ഉണ്ടാകില്ലെന്നും റെസായി കൂട്ടിച്ചേർത്തു. അമേരിക്കയും ഇറാനും തമ്മിലുള്ള സമാധാന ചർച്ചകൾ പുനരാരംഭിക്കാൻ ലക്ഷ്യമിട്ടാണ് പാക് സൈനിക മേധാവി അസിം മുനീർ ടെഹ്റാനിലെത്തിയത്. എന്നാൽ ഇറാന്റെ കർശന നിലപാട് ചർച്ചകളെ വീണ്ടും അനിശ്ചിതത്വത്തിലാക്കി.

ഇറാൻ പ്രസിഡന്റ് മസൂദ് പെസെഷ്കിയാനും പാർലമെന്റ് സ്പീക്കർ മുഹമ്മദ് ബാഗർ ഖാലിബാഫും ഭീഷണികൾക്ക് വഴങ്ങി ചർച്ചകൾക്കില്ലെന്ന് വ്യക്തമാക്കി. ഉപരോധങ്ങൾ പിൻവലിക്കുകയും അമേരിക്ക തങ്ങളുടെ മുൻഗണനാ വ്യവസ്ഥകൾ അംഗീകരിക്കുകയും വേണമെന്നാണ് ഇറാന്റെ ആവശ്യം. പശ്ചിമേഷ്യയിൽ ഉടനീളം വെടിനിർത്തൽ പ്രഖ്യാപിക്കുക, വിദേശത്ത് മരവിപ്പിച്ച ഇറാന്റെ ആസ്തികൾ വിട്ടുനൽകുക, എണ്ണ മേഖലയിലെ ഉപരോധങ്ങൾ നീക്കുക എന്നിവയാണ് ഇറാൻ പ്രധാനമായും മുന്നോട്ടുവെക്കുന്ന ഉപാധികൾ. നേരത്തെ ആണവ വസ്തുക്കൾ മൂന്നാമതൊരു രാജ്യത്തിന് കൈമാറില്ലെങ്കിലും രാജ്യത്തിനുള്ളിൽ വെച്ച് തന്നെ അവയുടെ സാന്ദ്രത കുറയ്ക്കാമെന്ന സൂചന ഇറാൻ നൽകിയിരുന്നെങ്കിലും, ഇപ്പോൾ നിലപാട് കടുപ്പിച്ചിരിക്കുകയാണ്.

Story Summary

Iran’s Supreme National Security Council Secretary Mohsen Rezaei firmly rejected moving any enriched nuclear material out of the country during talks with visiting Pakistani Army Chief Asim Munir. Iranian leaders reiterated that negotiations with the United States will not resume until Washington fulfills Tehran’s preconditions, including lifting sanctions and stopping military threats.