‘ഭക്ഷണം ഓരോത്തരുടേയും സ്വാതന്ത്ര്യമാണ്, അത് മറ്റുള്ളവരല്ല തീരുമാനിക്കേണ്ടത്’: ആഭ്യന്തര മന്ത്രി രമേശ് ചെന്നിത്തല | Ramesh Chennithala

തിരുവനന്തപുരം: സംസ്ഥാന രാഷ്ട്രീയത്തിൽ ചർച്ചയായ വിവിധ പ്രധാന വിഷയങ്ങളിൽ നിലപാട് വ്യക്തമാക്കി ആഭ്യന്തര മന്ത്രി രമേശ് ചെന്നിത്തല. രാജ്ഭവനിൽ മത്സ്യവും മാംസവും വേണ്ടെന്ന പുതിയ ഗവർണർ ഓം പ്രകാശ് മാഥൂറിന്റെ നിർദേശത്തെക്കുറിച്ച് പ്രതികരിച്ച അദ്ദേഹം, ഭക്ഷണം കഴിക്കുന്നത് ഓരോ വ്യക്തിയുടെയും സ്വാതന്ത്ര്യമാണെന്നും അത് മറ്റുള്ളവരല്ല തീരുമാനിക്കേണ്ടതെന്നും വ്യക്തമാക്കി.(Ramesh Chennithala Statement Raj Bhavan Food Controversy)

മുൻ കണ്ണൂർ ജില്ലാ പഞ്ചായത്ത് പ്രസിഡന്റ് പി.പി. ദിവ്യക്കെതിരായ വിജിലൻസ് കേസിനെക്കുറിച്ചും ആഭ്യന്തര മന്ത്രി സംസാരിച്ചു. കേസിലെ ഫയലുകൾ മുഴുവൻ പരിശോധിച്ചതായും ആരോപണം അന്വേഷണം അർഹിക്കുന്ന ഒന്നായതിനാലാണ് വകുപ്പ് 17A പ്രകാരമുള്ള അനുമതി നൽകിയതെന്നും അദ്ദേഹം വ്യക്തമാക്കി.

വിജിലൻസിന്റെ ‘ടി’ സെക്ഷനെ വിവരാവകാശ നിയമത്തിന്റെ (RTI) പരിധിയിൽ നിന്നൊഴിവാക്കിയ തീരുമാനത്തെയും അദ്ദേഹം ന്യായീകരിച്ചു. വിജിലൻസ് അന്വേഷണങ്ങൾക്ക് രഹസ്യാത്മകത ആവശ്യമാണെന്നും മുൻപ് ഈ സെക്ഷൻ വിവരാവകാശ നിയമത്തിന് പുറത്തായിരുന്നുവെന്നും കഴിഞ്ഞ സർക്കാരാണ് ഇത് ആർ.ടി.ഐ പരിധിയിലാക്കിയതെന്നും ചെന്നിത്തല ഓർമ്മിപ്പിച്ചു. കൂടാതെ, സംസ്ഥാനത്ത് അനധികൃതമായി പ്രവർത്തിക്കുന്ന സ്പാകൾക്കെതിരെ ശക്തമായ നടപടികൾ തുടരുമെന്നും റെയ്ഡുകൾ കൂടുതൽ ഊർജ്ജിതമാക്കുമെന്നും ആഭ്യന്തര മന്ത്രി ഉറപ്പുനൽകി.

Story Summary

Kerala Home Minister Ramesh Chennithala addressed several prominent issues, asserting that food habits are a matter of personal choice regarding Governor Om Prakash Mathur’s Raj Bhavan non-veg restriction. He defended the Section 17A clearance for a Vigilance probe against CPM leader P.P. Divya, supported exempting the Vigilance T-Section from RTI for confidentiality, and confirmed ongoing strict raids against illegal spas across the state.