‘എന്റെ ചോളി ദേശീയ ചർച്ചയായി’; രൂക്ഷമായ വിമർശനങ്ങളിൽ പ്രതികരിച്ച് കൃതി സനോൺ | Kriti Sanon Raksha Bandhan controversy

രക്ഷാബന്ധൻ പശ്ചാത്തലമാക്കി പുറത്തിറക്കിയ ആഭരണ പരസ്യത്തിലെ വസ്ത്രധാരണത്തെച്ചൊല്ലിയുണ്ടായ വിവാദത്തിൽ പ്രതികരണവുമായി നടി കൃതി സനോൺ. പരസ്യത്തിൽ ധരിച്ച ചോളി ദേശീയതലത്തിൽ ചർച്ചയായെന്ന് പറഞ്ഞ താരം, സ്ത്രീകളെ എല്ലാത്തിനും വിമർശിക്കുന്ന പ്രവണതയ്‌ക്കെതിരെയും തുറന്നടിച്ചു. കരീന കപൂർ ഖാന്റെ വാട്ട് വിമൻ വാണ്ട് എന്ന പരിപാടിയിൽ സംസാരിക്കുകയായിരുന്നു കൃതി (Kriti Sanon Raksha Bandhan controversy).

ഈ വർഷം ഓഗസ്റ്റിൽ പുറത്തിറങ്ങിയ ആഭരണ ബ്രാൻഡിന്റെ പരസ്യമാണ് വിവാദമായത്. രക്ഷാബന്ധൻ പശ്ചാത്തലത്തിലുള്ള പരസ്യത്തിൽ കൃതി ധരിച്ച വസ്ത്രം അനുചിതമാണെന്ന് ചിലർ സമൂഹമാധ്യമങ്ങളിൽ വിമർശിച്ചു. പിന്നാലെ താരത്തിനെതിരെ വ്യാപകമായ ട്രോളുകളും ഉയർന്നു. വിവാദത്തെത്തുടർന്ന് ബ്രാൻഡ് പരസ്യം പിൻവലിക്കുകയും ചെയ്തു. സമൂഹമാധ്യമങ്ങളിലെ വിമർശനങ്ങൾക്ക് സാധാരണയായി ശ്രദ്ധ നൽകാറില്ലെന്നും ഓരോ കാര്യത്തിനും വിശദീകരണം നൽകേണ്ടതില്ലെന്നുമാണ് കൃതി പറഞ്ഞത്. എന്നാൽ, തന്റെ വസ്ത്രധാരണം പ്രൈംടൈം വാർത്താചർച്ചയിൽ ആറുപേർ പങ്കെടുത്ത് ചർച്ച ചെയ്യുന്ന സാഹചര്യം വിശ്വസിക്കാനായില്ലെന്നും താരം പറഞ്ഞു. “എന്റെ ചോളി ദേശീയ ചർച്ചയായി മാറി. എന്താണ് സംഭവിക്കുന്നതെന്ന് എനിക്ക് മനസ്സിലായില്ല,” എന്നായിരുന്നു കൃതിയുടെ പ്രതികരണം. വിവാദം തന്റെ വസ്ത്രത്തെക്കുറിച്ചുള്ള ചർച്ച മാത്രമല്ലെന്നും സ്ത്രീകൾ എല്ലാത്തിനും നിരന്തരം വിചാരണ ചെയ്യപ്പെടുന്ന വലിയൊരു പ്രശ്നമാണെന്നും കൃതി അഭിപ്രായപ്പെട്ടു. ഒരു വസ്ത്രം ഇഷ്ടപ്പെട്ടില്ലെങ്കിൽ അതേക്കുറിച്ച് അഭിപ്രായം പറയാം. എന്നാൽ, അതിന്റെ പേരിൽ ഇത്രയധികം വിദ്വേഷം പ്രചരിപ്പിക്കുന്നത് എന്തിനാണെന്നും താരം ചോദിച്ചു.

സംസ്കാരത്തെയും ബഹുമാനത്തെയും കുറിച്ച് സംസാരിച്ച ചിലർ തന്റെ മാതാപിതാക്കളുടെയും സഹോദരി നൂപുർ സനോണിന്റെയും സമൂഹമാധ്യമ അക്കൗണ്ടുകളിൽ അധിക്ഷേപകരമായ കമന്റുകൾ എഴുതിയതായും കൃതി വെളിപ്പെടുത്തി. കമന്റുകൾ ഓഫ് ചെയ്യാൻ സഹോദരി നിർദേശിച്ചെങ്കിലും അതിന്റെ ആവശ്യമെന്താണെന്നായിരുന്നു തന്റെ ചോദ്യമെന്നും താരം പറഞ്ഞു. സ്ത്രീകളെ നിരന്തരം വിലയിരുത്തുന്നതിന് പകരം ആളുകൾ സ്വന്തം കാര്യങ്ങളിൽ ശ്രദ്ധിക്കണമെന്നാണ് താൻ ആഗ്രഹിക്കുന്നതെന്നും കൃതി വ്യക്തമാക്കി. അതേസമയം, മഡോക്ക് ഫിലിംസ് നിർമിക്കുന്ന ഹൊറർ ചിത്രത്തിലാണ് കൃതി അടുത്തതായി അഭിനയിക്കുന്നത്.

Summary: Kriti Sanon has addressed the backlash over her outfit in a jewellery advertisement set against a Raksha Bandhan backdrop. Speaking on Kareena Kapoor Khan’s What Women Want, she criticised the scrutiny and online abuse women face over their appearance.