‘മുഖ്യമന്ത്രിയെന്ന നിലയിലും സഹോദരനെന്ന നിലയിലും പരാജയം’; ജഗൻ റെഡ്ഡിക്കെതിരെ ചന്ദ്രബാബു നായിഡു | Chandrababu Naidu attacks Jagan Reddy
Current: മലയാളം
ആന്ധ്രപ്രദേശ് മുൻ മുഖ്യമന്ത്രി വൈഎസ് ജഗൻ മോഹൻ റെഡ്ഡിക്കെതിരെ രൂക്ഷവിമർശനവുമായി മുഖ്യമന്ത്രി ചന്ദ്രബാബു നായിഡു. മുഖ്യമന്ത്രിയെന്ന നിലയിലും രാഷ്ട്രീയ നേതാവെന്ന നിലയിലും മകനും സഹോദരനും പൗരനുമെന്ന നിലയിലും ജഗൻ പരാജയപ്പെട്ടെന്നാണ് നായിഡുവിന്റെ ആരോപണം. പ്രതികാര രാഷ്ട്രീയം പിന്തുടരുകയും തെറ്റായ വിവരങ്ങൾ പ്രചരിപ്പിക്കുകയും സംസ്ഥാനത്തിന്റെ പ്രതിച്ഛായയ്ക്ക് മങ്ങലേൽപ്പിക്കുകയും ചെയ്യുന്നുവെന്നും അദ്ദേഹം കുറ്റപ്പെടുത്തി. (Chandrababu Naidu attacks Jagan Reddy)
തദ്ദേശ തിരഞ്ഞെടുപ്പിനിടെ വൈഎസ്ആർ കോൺഗ്രസ് പാർട്ടി (വൈഎസ്ആർസിപി) അക്രമവും ഭീഷണിയും ഉപയോഗിച്ച് ജനാധിപത്യ പ്രക്രിയ തടസപ്പെടുത്തുകയാണെന്നും തെലുഗുദേശം പാർട്ടി (ടിഡിപി) അധ്യക്ഷൻ ആരോപിച്ചു. വിവിധ ജില്ലകളിൽ നടന്നതായി പറയുന്ന സംഭവങ്ങൾ ചൂണ്ടിക്കാട്ടി ‘ദി സെയിം വയലൻസ്, ദി സെയിം ലൈസ്, ദി സെയിം അനാർക്കി’ എന്ന പേരിൽ ലഘുപുസ്തകവും വിഡിയോകളും അദ്ദേഹം പുറത്തുവിട്ടു. ആരോപണങ്ങൾ ഉന്നയിക്കുകയും കോടതിയെ സമീപിക്കുകയും ചെയ്തശേഷം ഉത്തരവാദിത്വത്തിൽനിന്ന് ഒഴിഞ്ഞുമാറുന്ന രീതിയാണ് ജഗന്റേതെന്നും നായിഡു വിമർശിച്ചു. അക്രമവും തിരിച്ചടിയും സർക്കാരിന്റെ നയമല്ലെന്നും എന്നാൽ ഭയന്ന് പിന്നോട്ടുപോകില്ലെന്നും നായിഡു പറഞ്ഞു. നിയമവാഴ്ചയും ഭരണഘടനാ സ്ഥാപനങ്ങളോടുള്ള ബഹുമാനവും സർക്കാർ ഉറപ്പാക്കുമെന്നും അദ്ദേഹം വ്യക്തമാക്കി.
അതേസമയം, രാഷ്ട്രീയ സംഘർഷങ്ങൾ നിക്ഷേപകരുടെ മുന്നിൽ ആന്ധ്രപ്രദേശിന്റെ പ്രതിച്ഛായയെ ബാധിക്കുന്നുവെന്നും ക്ഷേമപദ്ധതികൾക്കും വികസനത്തിനും നിക്ഷേപ ആകർഷണത്തിനുമാണ് തന്റെ സർക്കാർ മുൻഗണന നൽകുന്നതെന്നും അദ്ദേഹം അവകാശപ്പെട്ടു. സംസ്ഥാനത്ത് ഏകദേശം 22 ലക്ഷം കോടി രൂപയുടെ നിക്ഷേപ വാഗ്ദാനങ്ങൾ ലഭിച്ചതായും നായിഡു പറഞ്ഞു. നാമനിർദേശ പത്രിക സമർപ്പിക്കുന്നത് തടഞ്ഞെന്ന പരാതികളെ തുടർന്ന് സുപ്രീംകോടതി നിർദേശപ്രകാരം കടപ്പ, തിരുപ്പതി, രാജംപേട്ട്, മൈദുകൂർ നഗര തദ്ദേശ സ്ഥാപനങ്ങളിൽ ഒക്ടോബർ 23, 24 തീയതികളിൽ നാമനിർദേശ നടപടികൾ വീണ്ടും തുറന്നു. 100 നഗര തദ്ദേശ സ്ഥാപനങ്ങളിലേക്കുള്ള വോട്ടെടുപ്പ് നവംബർ ഒന്നിനും വോട്ടെണ്ണൽ നവംബർ മൂന്നിനുമാണ് നിശ്ചയിച്ചിരിക്കുന്നത്. എംപിടിസി, സെഡ്പിടിസി തിരഞ്ഞെടുപ്പുകൾ നവംബർ മൂന്നിനും വോട്ടെണ്ണൽ നവംബർ അഞ്ചിനും നടക്കും. ഗ്രാമപഞ്ചായത്ത് തിരഞ്ഞെടുപ്പുകൾ നവംബർ 26, 29, ഡിസംബർ രണ്ട് തീയതികളിലായി മൂന്ന് ഘട്ടങ്ങളിലായി നടത്തും.
തിരഞ്ഞെടുപ്പ് നടപടികൾക്കിടെ സംഘർഷം, ഭീഷണി, നാമനിർദേശ പത്രിക സമർപ്പിക്കുന്നതിലെ തടസങ്ങൾ എന്നിവ സംബന്ധിച്ച് ഭരണകക്ഷിയായ ടിഡിപി നേതൃത്വത്തിലുള്ള എൻഡിഎ സഖ്യവും വൈഎസ്ആർസിപിയും പരസ്പരം ആരോപണങ്ങൾ ഉന്നയിക്കുന്ന സാഹചര്യത്തിലാണ് രാഷ്ട്രീയ പോര് ശക്തമായത്.
Summary: Andhra Pradesh Chief Minister Chandrababu Naidu accused YSRCP chief Y. S. Jagan Mohan Reddy of vindictive politics, misinformation and damaging the state’s reputation. The remarks come amid allegations of violence and intimidation during local body election proceedings, with both political camps trading accusations.
