സ്കൂട്ടർ മാറ്റുന്നതിനെച്ചൊല്ലി തർക്കം; അമൃത്സറിൽ യുവാവിനെ വെടിവെച്ചുകൊന്നു, പ്രതികൾ സഹോദരങ്ങൾ | Amit Sabharwal murder

അമൃത്സർ: റോഡിൽ പാർക്ക് ചെയ്ത സ്കൂട്ടർ മാറ്റുന്നതിനെച്ചൊല്ലിയുണ്ടായ തർക്കത്തിനിടെ 27കാരനെ വെടിവെച്ചുകൊന്നു. പഞ്ചാബിലെ അമൃത്സറിലെ ആനന്ദ് അവന്യൂവിൽ വെള്ളിയാഴ്ച രാത്രി നടന്ന സംഭവത്തിൽ അമിത് സബർവാളാണ് കൊല്ലപ്പെട്ടത്. സ്വകാര്യ കമ്പനിയിൽ മാർക്കറ്റിങ് വിഭാഗത്തിൽ ജോലി ചെയ്തിരുന്ന അമിത്, വീട്ടിന് മുന്നിൽവെച്ചാണ് വെടിയേറ്റു മരിച്ചത്. (Amit Sabharwal murder)

അമിത്തിന്റെ പിതാവിന്റെ പരാതിയിൽ അയൽവാസികളായ മൂന്ന് സഹോദരങ്ങൾക്കെതിരെ പൊലീസ് കൊലക്കേസ് രജിസ്റ്റർ ചെയ്തു. അഭി ഷാ, സണ്ണി ഷാ, റിതിക് ഷാ എന്നിവരാണ് പ്രതികൾ. ഇവർ അമിത്തിന്റെ സുഹൃത്തുക്കളായിരുന്നുവെന്നാണ് പിതാവ് പറയുന്നത്. സുഹൃത്തുക്കൾ തന്നെയാണ് മകനെ വെടിവെച്ചുകൊന്നതെന്നും അമിത്തിന് ആരുമായും വ്യക്തിവൈരാഗ്യമുണ്ടായിരുന്നില്ലെന്നും അദ്ദേഹം ആരോപിച്ചു.
വെള്ളിയാഴ്ച രാത്രി ഏകദേശം 11.30ഓടെയാണ് സംഭവം. സുഹൃത്തുക്കൾക്കൊപ്പം സമയം ചെലവഴിച്ചശേഷം വീട്ടിലെത്തിയ അമിത്, വഴിയിൽ പാർക്ക് ചെയ്തിരുന്ന ഹോണ്ട ആക്ടീവ സ്കൂട്ടർ മാറ്റുന്നതുമായി ബന്ധപ്പെട്ട തർക്കത്തിൽ ഏർപ്പെട്ടെന്നാണ് റിപ്പോർട്ട്. തർക്കം രൂക്ഷമായതോടെ അഭി ഷാ നാടൻ തോക്കുപയോഗിച്ച് വെടിയുതിർത്തെന്നാണ് പൊലീസിന് ലഭിച്ച വിവരം. ആറു തവണ വെടിയൊച്ച കേട്ടതായും അമിത്തിന്റെ തലയിലും അരക്കെട്ടിലും കാലിലും വെടിയേറ്റതായും പിതാവ് പറഞ്ഞു.

വീട്ടിലുണ്ടായിരുന്ന കുടുംബാംഗങ്ങൾ ആദ്യം പടക്കശബ്ദമാണെന്ന് കരുതി പുറത്തേക്ക് വന്നപ്പോഴാണ് രക്തത്തിൽ കുളിച്ചുകിടക്കുന്ന അമിത്തിനെ കണ്ടത്. ഉടൻ ആശുപത്രിയിലെത്തിച്ചെങ്കിലും വഴിമധ്യേ മരിച്ചു. പ്രദേശത്തെ സിസിടിവി ദൃശ്യങ്ങൾ പരിശോധിച്ചുവരികയാണെന്നും പ്രതികളെ പിടികൂടാൻ പരിശോധനകൾ നടത്തുകയാണെന്നും ഗേറ്റ് ഹക്കിമ പൊലീസ് അറിയിച്ചു. സംഭവത്തെച്ചൊല്ലി പഞ്ചാബിലെ ക്രമസമാധാന നിലയെ വിമർശിച്ച് ബിജെപി നേതാവ് രവ്‌നീത് സിങ് ബിട്ടു രംഗത്തെത്തി. മുഖ്യമന്ത്രി ഭഗവന്ത് മാൻ ആഭ്യന്തര വകുപ്പിന്റെ ചുമതല വഹിക്കുമ്പോൾ സംസ്ഥാനത്തെ കൊലപാതകങ്ങൾക്ക് ഉത്തരവാദിത്തം ഏറ്റെടുക്കണമെന്ന് അദ്ദേഹം ആവശ്യപ്പെട്ടു. ഒക്ടോബർ മൂന്നിന് അമൃത്സറിൽ മധുസൂദൻ ‘മാഡ്’ സന്ധു എന്ന മേക്കപ്പ് ആർട്ടിസ്റ്റും വെടിയേറ്റ് കൊല്ലപ്പെട്ടിരുന്നു. തുടർച്ചയായ കൊലപാതകങ്ങൾ സംസ്ഥാനത്തെ ക്രമസമാധാന നിലയെച്ചൊല്ലിയുള്ള രാഷ്ട്രീയ തർക്കം ശക്തമാക്കിയിരിക്കുകയാണ്.

Summary: A 27-year-old man, Amit Sabharwal, was shot dead outside his home in Amritsar after an argument over moving a parked scooter. Police have registered a murder case against three brothers, while CCTV footage is being examined and efforts are underway to arrest the accused.