ദില്ലിയിൽ പ്രതിഷേധം ശക്തമാകാൻ സാധ്യത; പൊലീസ് ആസ്ഥാനത്തെത്തി അമിത് ഷാ, 57 കേസുകൾ ക്രൈംബ്രാഞ്ചിന് കൈമാറി | Amit Shah Delhi Police headquarters visit

ദില്ലി: പ്രതിഷേധങ്ങൾ ശക്തമാകാൻ സാധ്യതയുള്ള സാഹചര്യത്തിൽ ഉന്നത പൊലീസ് ഉദ്യോഗസ്ഥരുമായി ചർച്ച നടത്തി കേന്ദ്ര ആഭ്യന്തര മന്ത്രി അമിത് ഷാ. ദില്ലി പൊലീസ് ആസ്ഥാനത്ത് നേരിട്ടെത്തിയായിരുന്നു കൂടിക്കാഴ്ച. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ പ്രതിഷേധങ്ങളുമായി ബന്ധപ്പെട്ട് ഇതുവരെ രജിസ്റ്റർ ചെയ്ത 57 കേസുകളും ക്രൈംബ്രാഞ്ചിന് കൈമാറിയതായി റിപ്പോർട്ടുകൾ വ്യക്തമാക്കുന്നു.
ഗ്യാനേഷ് കുമാറിനെതിരെ ഈ മാസം 30ന് പ്രതിപക്ഷം പ്രതീകാത്മക ഇംപീച്ച്‌മെന്റ് നടപടിയുമായി മുന്നോട്ടുപോകുമെന്നും റിപ്പോർട്ടിലുണ്ട്. അതേസമയം, പീസ് ബോണ്ടിൽ ഒപ്പിടില്ലെന്ന നിലപാട് നേഹ ബോറ ആവർത്തിച്ചു. ഇതുമായി ബന്ധപ്പെട്ട് ഇന്ന് സ്പെഷ്യൽ എക്സിക്യൂട്ടീവ് മജിസ്ട്രേറ്റിന് മുന്നിൽ ഹാജരായപ്പോഴാണ് അവർ നിലപാട് വ്യക്തമാക്കിയത്. (Amit Shah Delhi Police headquarters visit)

നവംബർ ഒന്നിന് കോൺഗ്രസ് പ്രഖ്യാപിച്ച മഹാറാലിക്കെതിരെയും ബിജെപി രംഗത്തെത്തി. സിഖ് സമൂഹത്തിന്റെ വികാരങ്ങളെ അവഗണിക്കുന്ന നടപടിയാണ് റാലിയെന്ന് ബിജെപി നേതാവ് രവിശങ്കർ പ്രസാദ് ആരോപിച്ചു. നവംബർ ഒന്ന് സിഖ് സമൂഹത്തിന് പ്രധാനപ്പെട്ട ദിനമാണെന്നും അന്ന് പ്രതിഷേധം പ്രഖ്യാപിച്ചത് ശരിയായ സമീപനമല്ലെന്നും അദ്ദേഹം പറഞ്ഞു. പ്രതിഷേധ വിഷയത്തിൽ ഇന്ത്യ സഖ്യത്തിനുള്ളിൽ തന്നെ അഭിപ്രായവ്യത്യാസങ്ങളുണ്ടെന്നും രവിശങ്കർ പ്രസാദ് അവകാശപ്പെട്ടു. രാഹുൽ ഗാന്ധിയുടെ നിലപാടിനോട് സഖ്യത്തിലെ എല്ലാവർക്കും യോജിപ്പില്ലെന്നായിരുന്നു അദ്ദേഹത്തിന്റെ പരാമർശം. കോൺഗ്രസിന് സിഖ് സമൂഹത്തോടുള്ള സമീപനം നേരത്തെയും വ്യക്തമാക്കിയിട്ടുണ്ടെന്നും അദ്ദേഹം ആരോപിച്ചു.

Summary: Union Home Minister Amit Shah visited Delhi Police headquarters to discuss the possibility of escalating protests with senior police officials. Reports say 57 cases linked to protests against Chief Election Commissioner Gyanesh Kumar have been transferred to the Crime Branch, while the BJP criticised the Congress’s planned November 1 rally.