തമിഴ്നാട്ടിൽ എൻജിനില്ലാതെ ഏഴ് ട്രെയിൻ കോച്ചുകൾ ആറു കിലോമീറ്റർ ഉരുണ്ടുനീങ്ങി; പാളം തെറ്റി | Jolarpettai railway yard incident

തിരുപ്പത്തൂർ: തമിഴ്നാട്ടിലെ തിരുപ്പത്തൂർ ജില്ലയിൽ എൻജിനില്ലാതെ തനിയെ നീങ്ങിയ ഏഴ് ഒഴിഞ്ഞ ട്രെയിൻ കോച്ചുകൾ ആറു കിലോമീറ്ററോളം സഞ്ചരിച്ചശേഷം പാളം തെറ്റി. ജോളാർപേട്ടൈ ജംക്‌ഷനിലെ റെയിൽവേ യാർഡിൽനിന്ന് നീങ്ങിയ കോച്ചുകൾ തമലേരി മുത്തൂരിന് സമീപമാണ് ബെംഗളൂരു–ചെന്നൈ പ്രധാന പാതയിൽ പാളം തെറ്റിയത്. സംഭവത്തെത്തുടർന്ന് ഈ റൂട്ടിലെ ട്രെയിൻ സർവീസുകൾ തടസ്സപ്പെട്ടു. (Jolarpettai railway yard incident)

കോച്ചുകൾ പാളം തെറ്റിയ വിവരം ലഭിച്ചതോടെ ജോളാർപേട്ടൈ ഭാഗത്തേക്ക് ബെംഗളൂരുവിൽനിന്ന് എത്തിയിരുന്ന ട്രെയിനുകൾ വിവിധ സ്ഥലങ്ങളിൽ തടഞ്ഞു. ഡ്യൂട്ടിയിലുണ്ടായിരുന്ന ഗേറ്റ് കീപ്പർ അസാധാരണ ശബ്ദം കേട്ട് ഉടൻ റെയിൽവേ അധികൃതരെ അറിയിച്ചതോടെയാണ് വലിയ അപകടം ഒഴിവായതെന്നാണ് പ്രാഥമിക വിവരം.
അറ്റകുറ്റപ്പണികൾക്കായി കോച്ച് മെയിന്റനൻസ് യാർഡിൽ നിർത്തിയിട്ടിരുന്ന ഏഴ് കോച്ചുകളാണ് നിയന്ത്രണം വിട്ട് നീങ്ങിയത്. എൻജിൻ ഉപയോഗിച്ച് തള്ളിനീക്കിയ കോച്ചുകൾ കൃത്യമായി ഉറപ്പിക്കുകയോ നിയന്ത്രണത്തിലാക്കുകയോ ചെയ്യാത്തതാണ് സംഭവത്തിന് കാരണമായതെന്നാണ് പ്രാഥമിക നിഗമനം. യാർഡിന്റെ പരിധി കടന്ന കോച്ചുകൾ ആറു കിലോമീറ്ററോളം നീങ്ങിയശേഷം പ്രധാന പാതയിൽ പാളം തെറ്റുകയായിരുന്നു.

റെയിൽവേ ജീവനക്കാർ സ്ഥലത്തെത്തി കോച്ചുകൾ പാളത്തിൽനിന്ന് നീക്കാനുള്ള നടപടികൾ ആരംഭിച്ചു. ഗ്യാസ് കട്ടിങ് ഉപകരണങ്ങൾ ഉപയോഗിച്ച് കോച്ചുകൾ തമ്മിലുള്ള ബന്ധിപ്പിച്ച ഭാഗങ്ങൾ വേർപെടുത്തുകയും ജെസിബി ഉപയോഗിച്ച് അവ പാളത്തിൽനിന്ന് മാറ്റുകയും ചെയ്തു. സംഭവത്തെത്തുടർന്ന് ബെംഗളൂരു–ചെന്നൈ റൂട്ടിലെ നിരവധി ട്രെയിനുകൾ വൈകി. ഏഷ്യയിലെ ഏറ്റവും വലിയ റെയിൽവേ യാർഡുകളിലൊന്നായി അറിയപ്പെടുന്ന ജോളാർപേട്ടൈ ജംക്‌ഷനിൽ 16 റെയിൽവേ ട്രാക്കുകളുണ്ട്. അറ്റകുറ്റപ്പണികൾക്കായി മാറ്റിയിടുന്ന കോച്ചുകൾ സുരക്ഷിതമായി ഉറപ്പിക്കുന്നതിലും നിരീക്ഷിക്കുന്നതിലും വീഴ്ചയുണ്ടായോ എന്നതടക്കമുള്ള ചോദ്യങ്ങൾ സംഭവം ഉയർത്തിയിട്ടുണ്ട്. വിശദമായ അന്വേഷണം നടത്തി അശ്രദ്ധ തെളിഞ്ഞാൽ നടപടി സ്വീകരിക്കണമെന്ന് യാത്രക്കാരും പൊതുജനങ്ങളും ആവശ്യപ്പെട്ടു.

Summary: Seven unattended railway coaches rolled nearly six kilometres from Jolarpettai railway yard in Tamil Nadu before derailing near Thamaleri Muthur. The incident disrupted Bengaluru–Chennai train services, but a gatekeeper’s alert helped avert a possible major accident.