ആണവ ചർച്ചകൾ പുരോഗമിക്കുന്നു: ഇറാനുമായി വീണ്ടുമൊരു യുദ്ധത്തിന് സാധ്യത കുറവെന്ന് ട്രംപ്
Current: മലയാളം
വാഷിംഗ്ടൺ: ഇറാനുമായി നിലവിൽ പുരോഗമിക്കുന്ന ആണവ ചർച്ചകൾ വിജയകരമായി മുന്നോട്ടുപോയാൽ രാജ്യത്തിനെതിരെ വീണ്ടുമൊരു സൈനിക നടപടിക്ക് സാധ്യത വളരെ കുറവാണെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് വ്യക്തമാക്കി. ഒരു ഫോൺ അഭിമുഖത്തിനിടെയാണ് യു.എസ്. പ്രസിഡന്റ് ഇറാന് മുന്നറിയിപ്പും നയതന്ത്ര സാധ്യതകളും ഒരുപോലെ വ്യക്തമാക്കുന്ന നിർണ്ണായക പ്രസ്താവന നടത്തിയത്.
ആണവ കരാറിൽ ഒപ്പിടാൻ ഇറാൻ തയ്യാറാകുമോ എന്നതിനെ ആശ്രയിച്ചായിരിക്കും ഭാവി തീരുമാനങ്ങളെന്ന് ട്രംപ് പറഞ്ഞു. “വീണ്ടുമൊരു സൈനിക നീക്കം ഇനി ആവശ്യമായി വരാൻ കടുത്ത സാധ്യതയില്ല. സാമ്പത്തികമായി തകർന്നുകൊണ്ടിരിക്കുന്ന ഒരു രാജ്യമാണ് ഇറാൻ. ഈ വർഷം രാജ്യത്ത് പണപ്പെരുപ്പം 301 ശതമാനത്തിലേക്ക് ഉയർന്ന വിവരം പുറത്തുവന്നത് നിങ്ങൾ കണ്ടതാണല്ലോ. അതിനാൽ യുദ്ധത്തിന്റെ ആവശ്യമില്ലെന്നാണ് ഞാൻ കരുതുന്നത്” ട്രംപ് വ്യക്തമാക്കി.
അമേരിക്കയുടെ സൈനിക-സാമ്പത്തിക ഉപരോധങ്ങൾ ഇറാന്റെ ശേഷിയെ കാര്യമായി ബാധിച്ചിട്ടുണ്ടെന്നും അദ്ദേഹം അവകാശപ്പെട്ടു. ആവശ്യമെങ്കിൽ കടുത്ത സൈനിക നടപടിക്ക് യു.എസ്. സജ്ജമാണെങ്കിലും ഇറാനുമായി ദീർഘകാല സുസ്ഥിരത ഉറപ്പാക്കുന്ന കടുത്ത നിബന്ധനകളുള്ള കരാറിലെത്താൻ സാധിക്കുമോ എന്നതിനെ ആശ്രയിച്ചായിരിക്കും യു.എസിന്റെ അടുത്ത നയതന്ത്ര-സൈനിക നീക്കങ്ങൾ എന്നും അദ്ദേഹം കൂട്ടിച്ചേർത്തു.
