“ലഹരി’യിൽ വീഴുമോ പഞ്ചാബ്? എഎപി നേരിടുന്ന വെല്ലുവിളി തിരഞ്ഞെടുപ്പ് ആയുധമാക്കാൻ ബിജെപി

പഞ്ചാബ് രാഷ്ട്രീയം വീണ്ടും വലിയൊരു വഴിതിരിവിലേക്ക്! വരാനിരിക്കുന്ന നിയമസഭാ തിരഞ്ഞെടുപ്പിൽ ഭരണകക്ഷിയായ ആം ആദ്മി പാർട്ടിയെ പ്രതിരോധത്തിലാക്കാൻ ബിജെപി ഒരുക്കുന്ന പുതിയ രാഷ്ട്രീയതന്ത്രം എന്താണ്? പഞ്ചാബ് നേരിടുന്ന ഏറ്റവും വലിയ സാമൂഹിക വിപത്തായ ലഹരി മാഫിയയെ എങ്ങനെയാണ് ബിജെപി തങ്ങളുടെ രാഷ്ട്രീയ ആയുധമാക്കുന്നത്? ദേശീയ മാധ്യമങ്ങളുടെ വിശകലനങ്ങൾ എന്തൊക്കെയാണ്? നമുക്ക് പരിശോധിക്കാം.

പഞ്ചാബിനെ സംബന്ധിച്ചിടത്തോളം ‘ലഹരി’ എന്നത് വെറുമൊരു രാഷ്ട്രീയ വിഷയമല്ല; മറിച്ച് ആയിരക്കണക്കിന് കുടുംബങ്ങളുടെ തീരാവേദനയാണ്.

 വർഷങ്ങളായി പഞ്ചാബിലെ എല്ലാ രാഷ്ട്രീയ പാർട്ടികളും ലഹരിവിരുദ്ധ മുദ്രാവാക്യങ്ങൾ ഉയർത്തിയിട്ടുണ്ടെങ്കിലും, പ്രശ്നം ഇന്നും പൂർണമായി പരിഹരിക്കപ്പെട്ടിട്ടില്ല.

ഈ സാഹചര്യത്തിലാണ് എഎപി സർക്കാരിന്‍റെ ഏറ്റവും വലിയ ഭരണപരമായ പരാജയമായി ലഹരി പ്രശ്നത്തെ ചൂണ്ടിക്കാട്ടി ബിജെപി ശക്തമായ നീക്കങ്ങൾ നടത്തുന്നത്.

എഎപി സർക്കാരിനെതിരെ ജനരോഷം ആളിക്കത്തിക്കുക എന്നതാണ് ബിജെപിയുടെ ലക്ഷ്യം. ‘പഞ്ചാബ് യാത്ര’ പോലെയുള്ള വലിയ കാമ്പെയ്നുകൾക്ക് അവർ തുടക്കവുമിട്ടു. കേന്ദ്ര ആഭ്യന്തര മന്ത്രി അമിത് ഷാ ഉൾപ്പെടെയുള്ള പ്രമുഖ നേതാക്കൾ വിഷയത്തിൽ നേരിട്ട് ഇടപെടുന്നുണ്ട്.

പഞ്ചാബിലെ യുവതലമുറയെ രക്ഷിക്കാൻ എഎപി പരാജയപ്പെട്ടു എന്ന സന്ദേശം  ജനങ്ങളിലേക്കെത്തിക്കുകയാണ് ബിജെപി ശ്രമം.  അതിലൂടെ പഞ്ചാബിലെ എഎപിയുടെ ഏറ്റവും വലിയ വെല്ലുവിളിയെത്തന്നെ തങ്ങളുടെ പ്രധാന തിരഞ്ഞെടുപ്പ് ആയുധമാക്കി മാറ്റാനാണ് ബിജെപി ലക്ഷ്യമിടുന്നത്.

എന്നാൽ ഈ തന്ത്രങ്ങൾ പഞ്ചാബിൽ പൂർണമായി ഫലിക്കുമോ? രാഷ്ട്രീയ നിരീക്ഷകർ ചില സംശയങ്ങൾ ഉന്നയിക്കുന്നുണ്ട്. 2024-ലെ ലോക്സഭാ തിരഞ്ഞെടുപ്പിൽ പഞ്ചാബിൽ ബിജെപിയുടെ വോട്ട് വിഹിതം 18.5 ശതമാനമായി ഉയർന്നിരുന്നു എന്നത് ശ്രദ്ധേയമാണ്.

എന്നാൽ നിയമസഭാ തിരഞ്ഞെടുപ്പിലേക്ക് എത്തുമ്പോൾ ഈ വോട്ടുകൾ വിജയകരമായി സീറ്റുകളിലേക്ക് മാറ്റുക എന്നത് കടുത്ത വെല്ലുവിളിയാണ്.

പ്രധാനമായും രണ്ട് വലിയ തടസങ്ങളാണ് ബിജെപിക്കുള്ളത്.  ഗ്രാമീണ മേഖലകളിലെ സ്വാധീനം വലിയ പ്രശ്നമായി ബിജെപിയുടെ തലയ്ക്കുമുകളിൽത്തന്നെ ഇപ്പോഴും നിൽക്കുന്നു.

ഗ്രാമങ്ങളിൽ ബിജെപിക്കെതിരെ നിലനിൽക്കുന്ന കർഷക പ്രതിഷേധവും പ്രാദേശിക തലത്തിലെ വിയോജിപ്പുകളും വലിയ പ്രശ്നമാണ്.  അകാലിദളും കോൺഗ്രസും ശക്തമായ സാന്നിധ്യമുള്ള പഞ്ചാബിൽ ബിജെപി സ്വന്തമായി ശക്തമായ അടിത്തറ ഉണ്ടാക്കിയെടുക്കേണ്ടതുണ്ട്. അതിനു ഇതുവരെ സാധിച്ചിട്ടില്ല. 

ലഹരി എന്ന വിപത്തിനെ രാഷ്ട്രീയ ആയുധമാക്കുന്നത് വഴി പഞ്ചാബിൽ പുതിയൊരു രാഷ്ട്രീയ മുന്നേറ്റം ഉണ്ടാക്കാൻ ബിജെപിക്കാകുമോ? അതോ എഎപി സർക്കാർ ഇതിനെ പ്രതിരോധിക്കുമോ? വരാനിരിക്കുന്ന തിരഞ്ഞെടുപ്പ് പഞ്ചാബ് രാഷ്ട്രീയത്തിൽ നിർണായകമായ പല മാറ്റങ്ങൾക്കും സാക്ഷ്യം വഹിക്കും എന്നതു തീർച്ചയാണ്.