Skip to content
November 20, 2026
⌕

പലസ്തീന്‍ ജനതയുടെ സ്വയം നിര്‍ണ്ണയാവകാശം, ഇസ്രായേല്‍ കുടിയേറ്റങ്ങള്‍ എന്നിവയുമായി ബന്ധപ്പെട്ട് ഐക്യരാഷ്ട്രസഭാ പൊതുസഭയില്‍ അവതരിപ്പിച്ച നാല് പ്രമേയങ്ങളെ പിന്തുണച്ച് ഇന്ത്യ. സ്വതന്ത്ര പലസ്തീന്‍ രാഷ്ട്രം സ്ഥാപിക്കാനുള്ള അവകാശം ഉറപ്പിക്കുന്ന പ്രമേയവും യു.എന്‍ ദുരിതാശ്വാസ ഏജന്‍സിയുടെ പ്രവര്‍ത്തനങ്ങള്‍ തുടരണമെന്ന പ്രമേയവും ഉള്‍പ്പെടെ നാലിനും ഇന്ത്യ അനുകൂലമായി വോട്ട് ചെയ്തു. ഇസ്രായേലും അമേരിക്കയും പ്രമേയങ്ങളെ എതിര്‍ത്തു

November 20, 2026
Share this post to

ഡല്‍ഹി: പലസ്തീന്‍ ജനതയുടെ സ്വയം നിര്‍ണ്ണയാവകാശം, അധിനിവേശ പ്രദേശങ്ങളിലെ ഇസ്രായേല്‍ കുടിയേറ്റങ്ങള്‍, പലസ്തീന്‍ അഭയാര്‍ത്ഥികളുടെ അവകാശങ്ങള്‍ എന്നിവയുമായി ബന്ധപ്പെട്ട് ഐക്യരാഷ്ട്രസഭാ പൊതുസഭ പാസാക്കിയ നാല് പ്രമേയങ്ങളെ ഇന്ത്യ പിന്തുണച്ചു. 193 അംഗരാജ്യങ്ങളുള്ള പൊതുസഭയില്‍ ബുധനാഴ്ച നടന്ന വോട്ടെടുപ്പിലാണ് നാല് പ്രമേയങ്ങള്‍ക്കും അനുകൂലമായി ഇന്ത്യ വോട്ട് ചെയ്തത്.


‘പലസ്തീന്‍ ജനതയുടെ സ്വയം നിര്‍ണ്ണയാവകാശം’ എന്ന പ്രമേയം 162 വോട്ടുകള്‍ക്ക് പാസായി. എട്ട് രാജ്യങ്ങള്‍ എതിര്‍ത്തും അത്രതന്നെ രാജ്യങ്ങള്‍ വിട്ടുനിന്നും വോട്ട് ചെയ്തു. സ്വതന്ത്ര പലസ്തീന്‍ രാഷ്ട്രം സ്ഥാപിക്കാനുള്ള അവകാശം ഉള്‍പ്പെടെ പലസ്തീന്‍ ജനതയുടെ സ്വയം നിര്‍ണ്ണയാവകാശം പ്രമേയം വീണ്ടും ഉറപ്പിച്ചു.


ഈ അവകാശം എത്രയും വേഗം യാഥാര്‍ത്ഥ്യമാക്കാന്‍ എല്ലാ രാജ്യങ്ങളും യു.എന്‍ ഏജന്‍സികളും സംഘടനകളും പിന്തുണയും സഹായവും തുടരണമെന്നും പ്രമേയത്തില്‍ ആവശ്യപ്പെട്ടു.

‘നിയര്‍ ഈസ്റ്റിലെ പലസ്തീന്‍ അഭയാര്‍ത്ഥികള്‍ക്കായുള്ള ഐക്യരാഷ്ട്രസഭാ ദുരിതാശ്വാസ-പ്രവര്‍ത്തന ഏജന്‍സിയുടെ പ്രവര്‍ത്തനങ്ങള്‍’ എന്ന പ്രമേയത്തിനും ഇന്ത്യ അനുകൂലമായി വോട്ട് ചെയ്തു. 

പലസ്തീന്‍ അഭയാര്‍ത്ഥികളുടെ ക്ഷേമത്തിനും സംരക്ഷണത്തിനും മാനുഷിക വികസനത്തിനും അടിയന്തര സഹായം ഉള്‍പ്പെടെയുള്ള സേവനങ്ങള്‍ തടസ്സമില്ലാതെ നല്‍കേണ്ടതിന്റെ പ്രാധാന്യവും ഏജന്‍സിയുടെ പ്രവര്‍ത്തനം തുടരേണ്ടതിന്റെ അനിവാര്യതയും ഈ പ്രമേയം വ്യക്തമാക്കി. 143 രാജ്യങ്ങള്‍ അനുകൂലിച്ച ഈ പ്രമേയത്തെ ഇസ്രായേലും അമേരിക്കയും ഉള്‍പ്പെടെ ഒമ്പത് രാജ്യങ്ങള്‍ എതിര്‍ത്തു; 20 രാജ്യങ്ങള്‍ വിട്ടുനിന്നു.


‘പലസ്തീന്‍ അഭയാര്‍ത്ഥികളുടെ സ്വത്തുക്കളും അവയില്‍ നിന്നുള്ള വരുമാനവും’ എന്ന പ്രമേയത്തില്‍, നീതിയുടെയും സമത്വത്തിന്റെയും തത്വങ്ങള്‍ക്കനുസൃതമായി അഭയാര്‍ത്ഥികള്‍ക്ക് അവരുടെ സ്വത്തുക്കള്‍ക്കും അതില്‍ നിന്നുള്ള വരുമാനത്തിനും അര്‍ഹതയുണ്ടെന്ന് ഉറപ്പിച്ചു.


അന്തിമ സമാധാന ചര്‍ച്ചകളുടെ ചട്ടക്കൂടിനുള്ളില്‍ ഈ വിഷയം പരിഹരിക്കാന്‍ പലസ്തീന്‍, ഇസ്രായേല്‍ പക്ഷങ്ങളോട് ആവശ്യപ്പെട്ട പ്രമേയം ഇന്ത്യ ഉള്‍പ്പെടെ 155 രാജ്യങ്ങളുടെ പിന്തുണയോടെ പാസായി. ഒമ്പത് രാജ്യങ്ങള്‍ എതിര്‍ക്കുകയും സമാന എണ്ണം രാജ്യങ്ങള്‍ വിട്ടുനില്‍ക്കുകയും ചെയ്തു.

‘കിഴക്കന്‍ ജെറുസലേം ഉള്‍പ്പെടെയുള്ള അധിനിവേശ പലസ്തീന്‍ പ്രദേശങ്ങളിലെയും അധിനിവേശ സിറിയന്‍ ഗോലാനിലെയും ഇസ്രായേല്‍ കുടിയേറ്റങ്ങള്‍’ എന്ന പ്രമേയവും പൊതുസഭ അംഗീകരിച്ചു. ഈ കുടിയേറ്റങ്ങള്‍ നിയമവിരുദ്ധവും സമാധാനത്തിനും സാമൂഹിക-സാമ്പത്തിക വികസനത്തിനും തടസ്സവുമാണെന്ന് പ്രമേയം ചൂണ്ടിക്കാട്ടി. 


കുടിയേറ്റ പ്രവര്‍ത്തനങ്ങള്‍ ഉടനടി പൂര്‍ണ്ണമായി അവസാനിപ്പിക്കണമെന്നും സുരക്ഷാ കൗണ്‍സിലിന്റെ പ്രസക്തമായ പ്രമേയങ്ങള്‍ പൂര്‍ണ്ണമായി നടപ്പിലാക്കണമെന്നും ആവശ്യപ്പെട്ടു. 143 രാജ്യങ്ങള്‍ അനുകൂലിച്ച ഈ പ്രമേയത്തെ ഇസ്രായേലും അമേരിക്കയും ഉള്‍പ്പെടെ 11 രാജ്യങ്ങള്‍ എതിര്‍ക്കുകയും 17 രാജ്യങ്ങള്‍ വിട്ടുനില്‍ക്കുകയും ചെയ്തു.


അതേസമയം, പലസ്തീനുമായി ഇന്ത്യയ്ക്ക് ചരിത്രപരമായ ബന്ധമാണുള്ളതെന്ന് ഇന്ത്യയിലെ പലസ്തീന്‍ അംബാസഡര്‍ അബ്ദുള്ള എം. അബു ഷാവേഷ് ന്യൂഡല്‍ഹിയില്‍ മാധ്യമപ്രവര്‍ത്തകരോട് പറഞ്ഞു. പലസ്തീന്‍ വിമോചന സംഘടനയെ പലസ്തീന്‍ ജനതയുടെ ഏക നിയമസാധുതയുള്ള പ്രതിനിധിയായി അംഗീകരിച്ച ആദ്യത്തെ മുസ്ലീമേതര, അറബ് ഇതര രാജ്യം ഇന്ത്യയാണെന്ന് അദ്ദേഹം ചൂണ്ടിക്കാട്ടി. 

ഭൂതകാലത്തും വര്‍ത്തമാനകാലത്തും ഇന്ത്യയുമായി നല്ല ബന്ധമാണുള്ളതെന്നും ഭാവിയിലും അങ്ങനെ തന്നെയായിരിക്കുമെന്നും പറഞ്ഞ അദ്ദേഹം, ദ്വിരാഷ്ട്ര പരിഹാരത്തെയും ഐക്യരാഷ്ട്രസഭയില്‍ പലസ്തീനെയും ഇന്ത്യ ശക്തമായി പിന്തുണയ്ക്കുന്നുണ്ടെന്നും കൂട്ടിച്ചേര്‍ത്തു.

 

Get more updates from Pudukad News on Google