ഇരിങ്ങാലക്കുട : ഡി സോൺ കലോത്സവത്തിൽ തൊട്ടതെല്ലാം പൊന്നാക്കി ഇരിങ്ങാലക്കുട സെൻ്റ് ജോസഫ്സ് കോളെജ്. 155 പോയൻ്റോടെ മൂന്നാം സ്ഥാനവും ഏറ്റവും മികച്ച വനിതാ കലാലയത്തിനുള്ള പുരസ്കാരവും കലാലയം സ്വന്തമാക്കി.
പങ്കെടുത്ത നാലിനങ്ങളിലും ഒന്നാം സ്ഥാനം നേടിയ ഇംഗ്ലീഷ് രണ്ടാം വർഷ ബിരുദ വിദ്യാർഥിനി നിരഞ്ജൻ ശ്രീലക്ഷ്മി കലാതിലകപ്പട്ടം സ്വന്തമാക്കി കോളെജിൻ്റെ അഭിമാനമായി.
കോളെജ് യൂണിയൻ
അലോകയുടെ നേതൃത്വത്തിൽ നൂറ്റമ്പതോളം വിദ്യാർഥിനികളാണ് കലോത്സവ വേദിയിൽ മാറ്റുരച്ചത്.
ചെയർപേഴ്സൺ അഫ്ല സിമിൻ, ഫൈൻ ആർട്സ് സെക്രട്ടറി റെയ്ച്ചൽ റോസ് തുടങ്ങിയവർ നയിച്ച ഫൈൻ ആർട്സ് ഗ്രൂപ്പിൻ്റെ കൺവീനർ സോന ദാസ് ആയിരുന്നു.
മാർഗ്ഗംകളി, ഒപ്പന, കവിതാരചന (തമിഴ്), സംസ്കൃതം കഥാരചന, പ്രബന്ധ രചന, കവിതാലാപനം, രംഗോലി, ദേശഭക്തി ഗാനം, സംഘഗാനം, മോഹിനിയാട്ടം, കുച്ചിപ്പുടി, കേരളനടനം തുടങ്ങിയവയിൽ ഒന്നാം സ്ഥാനവും മാപ്പിളപ്പാട്ട്, കഥകളി സംഗീതം, ഫോക് ഡാൻസ്, സ്കിറ്റ്, മലയാളം കവിതാരചന, അക്ഷരശ്ലോകം, ഇംഗ്ലീഷ് കവിതാരചന എന്നിവയിൽ രണ്ടാം സ്ഥാനവും വെസ്റ്റേൺ മ്യൂസിക്, കഥകളി സംഗീതം, മോഹിനിയാട്ടം, ലളിതഗാനം, ശാസ്ത്രീയ സംഗീതം, ഭരതനാട്യം, മോഹിനിയാട്ടം, കവിതാരചന, മൈം, കാർട്ടൂൺ, കാവ്യകേളി, തമിഴ് പ്രബന്ധ രചന തുടങ്ങിയവയിൽ മൂന്നാം സ്ഥാനവും നേടിയാണ് സെൻ്റ് ജോസഫ്സ് കോളെജ് മികച്ച നേട്ടം സ്വന്തമാക്കിയത്.
നേട്ടം സ്വന്തമാക്കാൻ കഠിനാദ്ധ്വാനം ചെയ്ത ഏവരെയും പ്രിൻസിപ്പൽ ഡോ. സി. ബ്ലെസി അനുമോദിച്ചു.
വൻ സ്വീകരണമൊരുക്കിയാണ് കോളെജ് വിജയികളെ വരവേറ്റത്.
തുടർച്ചയായ രണ്ടാം വർഷമാണ് സെൻ്റ് ജോസഫ്സ് കോളെജ് ഡി സോണിലെ മികച്ച വനിതാ കലാലയമായി തെരഞ്ഞെടുക്കപ്പെടുന്നത്.