ഇരിങ്ങാലക്കുട : കഴിഞ്ഞ അഞ്ചുവർഷങ്ങളിലായി ഇരിങ്ങാലക്കുട മണ്ഡലത്തിൽ നടത്തിയ സമാനതകളില്ലാത്ത വികസന പ്രവർത്തനങ്ങൾ ജനമനസ്സുകളിൽ എത്തിച്ചുകൊണ്ടും ഇനിയും വികസന തുടർച്ചയ്ക്കായി ഇടതുപക്ഷ ജനാധിപത്യ മുന്നണിക്ക് കീഴിൽ ജനലക്ഷങ്ങളെ അണിനിരത്തുന്നതിനുമായി ഇരിങ്ങാലക്കുട എംഎൽഎയും ഉന്നത വിദ്യാഭ്യാസ സാമൂഹ്യനീതി വകുപ്പ് മന്ത്രിയുമായ ഡോ. ആർ. ബിന്ദു ജാഥ ക്യാപ്റ്റനായി നയിക്കുന്ന എൽഡിഎഫ് ഇരിങ്ങാലക്കുട നിയോജക മണ്ഡലം വികസന മുന്നേറ്റ ജാഥയ്ക്ക് 27ന് തുടക്കമാകും.
സിപിഐ മണ്ഡലം സെക്രട്ടറി എൻ.കെ. ഉദയപ്രകാശ് വൈസ് ക്യാപ്റ്റനും, സിപിഎം ജില്ലാ കമ്മിറ്റി അംഗം ഉല്ലാസ് കളക്കാട്ട് മാനേജരുമായിരിക്കും.
27ന് വൈകീട്ട് 5 മണിക്ക് മാപ്രാണം സെൻ്ററിൽ സിപിഎം സംസ്ഥാന കമ്മിറ്റി അംഗം എം.എം. വർഗ്ഗീസ് വികസന മുന്നേറ്റ ജാഥ ഉദ്ഘാടനം ചെയ്യും.
സംസ്ഥാനത്ത് എൽഡിഎഫ് സർക്കാരും മണ്ഡലത്തിൽ മന്ത്രിയുടെ നേതൃത്വത്തിലും നടത്തിയ വികസന പ്രവർത്തനങ്ങൾ വിശദീകരിക്കുന്നതിനാണ് ജാഥ.
മാർച്ച് 1ന് ആളൂർ തിരുത്തിപറമ്പിലാണ് സമാപനം. സമാപന സമ്മേളനം സിപിഐ ജില്ല സെക്രട്ടറി കെ.ജി. ശിവാനന്ദൻ ഉദ്ഘാടനം ചെയ്യും.