ഇരിങ്ങാലക്കുട : കെഎസ്യു പ്രവർത്തകർ മന്ത്രിയുടെ അടുത്തു പോലും ചെല്ലാതിരുന്നിട്ടും അവരുടെ ആക്രമണത്തിൽ പരിക്ക് പറ്റി എന്ന ആരോഗ്യമന്ത്രി വീണ ജോർജ്ജിന്റെ അഭിനയത്തിനെതിരെയും, മേഖലയിലെ കോൺഗ്രസ്സിന്റെ ബോർഡുകളും കൊടി തോരണങ്ങളും സാമൂഹ്യ വിരുദ്ധർ നശിപ്പിച്ചതിനെതിരെയും പൊറത്തിശ്ശേരി മണ്ഡലം കോൺഗ്രസ്സ് കമ്മിറ്റി യോഗം പ്രതിഷേധിച്ചു.
ആരോഗ്യ വകുപ്പിന്റെ കെടുകാര്യസ്ഥതയിലും, എല്ലാ കേസുകളിലും കോടതി പരമാർശം മൂലം വികസന ജാഥ പൊളിഞ്ഞതിലും നാണം കെട്ട സർക്കാർ വരാനിരിക്കുന്ന തിരഞ്ഞെടുപ്പിൽ നിന്നും ജനശ്രദ്ധ തിരിച്ചു വിടുന്നതിനു വേണ്ടിയാണ് ആരോഗ്യമന്ത്രിക്ക് പരിക്കു പറ്റിയെന്ന നാടകം കളിക്കുന്നതെന്നും,
കെഎസ്യു പ്രവർത്തകരുടെ പേരിൽ വധശ്രമത്തിന് കേസെടുത്ത് പൊലീസിനെ കൊണ്ട് ഗുണ്ടാ പണി ചെയ്യിക്കുന്ന സർക്കാർ സാമൂഹിക അന്തരീക്ഷം തകർക്കുകയാണെന്നും യോഗം ആരോപിച്ചു.
മണ്ഡലത്തിലെ കൊടി തോരണങ്ങൾ നശിപ്പിച്ചതിനെതിരെ ഇരിങ്ങാലക്കുട പൊലീസിൽ പരാതി നൽകിയിട്ടുണ്ട്.
മണ്ഡലം പ്രസിഡന്റ് പി.കെ. ഭാസി അധ്യക്ഷത വഹിച്ചു.
ഡിസിസി സെക്രട്ടറിമാരായ ആന്റോ പെരുമ്പിളളി, സതീഷ് വിമലൻ, ബ്ലോക്ക് ഭാരവാഹികളായ ബൈജു കുറ്റിക്കാടൻ, കെ.കെ. അബ്ദുള്ളക്കുട്ടി, ജോബി തെക്കുടൻ, ജെയിംസ്, റോയ് പൊറത്തൂക്കാരൻ, എം.ആർ. ഷാജു, പി.എൻ. സുരേഷ്, പി.എ. ഷഹീർ, സുജിത് തുടങ്ങിയവർ പങ്കെടുത്തു.