വർക്കല പാലച്ചിറയിൽ കുടുംബം സഞ്ചരിച്ചിരുന്ന കാർ നിയന്ത്രണം വിട്ട് മതിലിലിടിച്ചുണ്ടായ അപകടത്തിൽ വീട്ടമ്മ മരിച്ചു. പാലച്ചിറ സ്വദേശിനി ലൈല (50) ആണ് അപകടത്തിൽ മരിച്ചത്. കാറിലുണ്ടായിരുന്ന ലൈലയുടെ ഭർത്താവിനും പന്ത്രണ്ട് വയസ്സുകാരനായ മകനും അപകടത്തിൽ ഗുരുതരമായി പരിക്കേറ്റു. പാലച്ചിറ ഭാഗത്ത് വെച്ച് കാർ പെട്ടെന്ന് നിയന്ത്രണം നഷ്ടപ്പെട്ട് റോഡരികിലെ മതിലിൽ ഇടിച്ചു തകരുകയായിരുന്നു. വലിയ ശബ്ദം കേട്ടെത്തിയ നാട്ടുകാർ ഉടൻ തന്നെ രക്ഷാപ്രവർത്തനം നടത്തിയാണ് കാറിനുള്ളിൽ കുടുങ്ങിയവരെ പുറത്തെടുത്തത്. ഇടിയുടെ ആഘാതത്തിൽ കാർ പൂർണ്ണമായും തകർന്നിരുന്നു.
പരിക്കേറ്റവരെ ഉടൻ തന്നെ വർക്കലയിലെ സ്വകാര്യ ആശുപത്രിയിൽ എത്തിച്ചെങ്കിലും ആശുപത്രിയിൽ എത്തുന്നതിന് മുൻപ് തന്നെ ലൈല മരണപ്പെട്ടിരുന്നു. നിലവിൽ തീവ്രപരിചരണ വിഭാഗത്തിൽ ചികിത്സയിലുള്ള ഭർത്താവിന്റെയും മകന്റെയും നില അതീവ ഗുരുതരമായി തുടരുകയാണ്. സംഭവത്തിൽ വർക്കല പോലീസ് കേസെടുത്തിട്ടുണ്ട്. അപകടത്തിന്റെ കാരണം വ്യക്തമാക്കാൻ മോട്ടോർ വാഹന വകുപ്പും പോലീസും വിശദമായ പരിശോധനകൾ നടത്തിവരികയാണ്.
The post വർക്കലയിൽ കാർ മതിലിലിടിച്ച് അപകടം! വീട്ടമ്മ മരിച്ചു; ഭർത്താവിനും മകനും ഗുരുതര പരിക്ക് appeared first on Express Kerala.